Read O‘zbek tilidagi Muqaddas Kitob, 2013 Korinfliklarga 2chi 6 Bible Online

Korinfliklarga 2chi 6 - O‘zbek tilidagi Muqaddas Kitob, 2013 bible

Korinfliklarga 2chi 6

¹Xudoning hamkorlari sifatida sizlarga yolvoramiz: Xudoning inoyati hayotingizda samarasiz bo‘lmasin.

²Xudo shunday deb aytyapti: “Muruvvat payti kelganda, Men senga quloq solaman. Najot kuni kelganda, Men senga yordam beraman.” O‘sha muruvvat payti hozirgi paytdir, o‘sha najot kuni bugungi kundir.

³Xizmatimizda birorta ayb topilmasin deb, hech kimni zarracha ranjitmaymiz.

⁴Biz Xudoning haqiqiy xizmatkorlari ekanligimizni o‘z harakatlarimiz bilan isbotlayapmiz. Har xil qiyinchiliklaru kulfatlar boshimizga tushganda, tang ahvolda qolganimizda sabr–toqat ko‘rsatyapmiz.

⁵Bizni urganlarida, qamoqqa tashlaganlarida, g‘alayonlarda qolganimizda, mashaqqat bilan mehnat qilganimizda, uyqusizlikda va och qolganimizda, hammasiga bardosh berdik.

⁶Poklik, donolik, sabr–toqat bilan yashab, mehribon bo‘lib, Muqaddas Ruh bizda maskan qilganini ko‘rsatib, samimiy muhabbatimiz bilan Xudoning xizmatkorlari ekanligimizni isbotladik.

⁷Biz haqiqatni e’lon qilyapmiz, Xudoning qudratiga tayanib xizmat qilyapmiz. O‘ngu so‘l qo‘limizda solihlik qurollarini tutib yuribmiz.

⁸Sharafga erishamizmi yoki isnodga qolamizmi, boshqalar bizni haqorat qiladimi yoki maqtaydimi, har qanday vaziyatda Xudoning xizmatkorlari ekanligimizni ko‘rsatyapmiz. Bizni yolg‘onchi odamlar, deb aytishadi, ammo biz haqiqatgo‘ymiz.

⁹Mashhur emasmiz, ammo bizni bilishadi. Bizni o‘lgan, deb hisoblaydilar, ammo mana, tirikmiz. Bizni jazoga tortadilar, ammo o‘limga mahkum qilmaydilar.

¹⁰Bizni xafa qilyaptilar, ammo doimo xursandmiz. O‘zimiz kambag‘almiz–u, ko‘p kishilarni boyitamiz. Hech narsamiz yo‘g‘–u, ammo hamma narsaga egamiz.

¹¹Ey, Korinfliklar! Sizlarga bemalol, ochiq–oydin gapirdik. Sizlarga bag‘rimizni keng ochdik.

¹²Biz sizlardan mehr–muhabbatimizni ayamadik, sizlar esa o‘z mehringizni bizdan qizg‘anasiz.

¹³Sizlarga o‘z farzandlarimga gapirayotganday gapiryapman. Biz sizlarga qanday muomala qilsak, sizlar ham bizga shunday muomala qiling: bizga bag‘ringizni keng oching.

¹⁴Imonsizlar bilan sherik bo‘lmanglar. Solihlik bilan qabihlikning orasida qanday aloqa bor?! Nur bilan zulmat orasida qanday umumiylik bo‘lishi mumkin?!

¹⁵Masih bilan shayton orasida qanday ittifoqlik bo‘lishi mumkin?! Imonli bilan imonsizning orasida qanday sheriklik bo‘lishi mumkin?!

¹⁶Xudoning ma’badi bilan butlar orasida qanday umumiylik bor?! Axir, biz barhayot Xudoning ma’badimiz–ku! Xudo shunday deb aytgan: “Men ularning orasida yashayman, Ularning orasida yuraman. Men ularning Xudosi bo‘laman, Ular esa Mening xalqim bo‘ladi.”

¹⁷Binobarin, Egamiz shunday degan: “Xalqlar orasidan chiqinglar, Ulardan ajralib chiqinglar, Haromga qo‘l tekkizmang, Shunda Men sizlarni qabul qilaman.”

¹⁸Sarvari Olam yana shunday deb aytgan: “Men sizlarga Ota bo‘laman, Sizlar esa Menga o‘g‘il–qizlar bo‘lasizlar.”