Read O‘zbek tilidagi Muqaddas Kitob, 2013 Korinfliklarga 2chi 8 Bible Online

Korinfliklarga 2chi 8 - O‘zbek tilidagi Muqaddas Kitob, 2013 bible

Korinfliklarga 2chi 8

¹Endi birodarlar, Xudoning Makedoniyadagi jamoatlarga ko‘rsatgan inoyati haqida sizlarga aytmoqchimiz.

²Ular og‘ir kulfatlarga yo‘liqib, sinalgan bo‘lsalar–da, jo‘shqin bir sevinchga to‘lib toshdilar, o‘ta kambag‘al bo‘lsalar–da, yuraklari saxiylikka boy ekanligini ko‘rsatdilar.

³Ular o‘z xohishlari bilan, qo‘llaridan kelgancha, hatto imkonlaridan ortiq xayr–ehson berganlariga men shohidman.

⁴Ular, Xudoning Quddusdagi azizlariga yordam berishda ishtirok etaylik, deb bizdan o‘tinib so‘radilar.

⁵Hatto umid qilganimizdan ham ziyodrog‘ini qildilar. Xudoning irodasi bo‘yicha ular avval o‘zlarini Rabbimiz Isoga, keyin esa bizga bag‘ishladilar.

⁶Titus sizlarning orangizda boshlagan xayrli ishini bitirsin, deb uni rag‘batlantirdik.

⁷Sizlar imon va ilm–ma’rifatga boy, gapga chechan, notiqlikda mohirsizlar, g‘ayratu tirishqoqlikda hech kimdan qolishmaysiz, qalbingizdagi biz tufayli uyg‘ongan mehr–muhabbatingiz cheksizdir. Shunday ekan, bu xayrli ish orqali saxiyligingizning cheksizligini ham ko‘rsating.

⁸Men buni sizlarga buyruq tariqasida emas, balki mehr–muhabbatingizning samimiyligini isbot qilinglar, deb aytyapman. Shuning uchun boshqalarning g‘ayratiyu tirishqoqligiga e’tiboringizni qaratyapman.

⁹Axir, o‘zingiz Rabbimiz Iso Masihning ko‘rsatgan inoyatini bilasizlar–ku, U boy bo‘lsa ham, sizlarni boy qilish uchun kambag‘al bo‘ldi.

¹⁰[10-11] Yuqorida aytib o‘tilgan xayr–ehsonlar haqida maslahatim quyidagichadir. O‘tgan yili nafaqat o‘sha xayrli ishni qilishni boshladingiz, balki bu ishga qo‘shilish haqida o‘zingiz xohish ko‘rsatgan edingiz. Endi o‘z manfaatingiz uchun xayrli ishingizni oxiriga yetkazinglar, qanday ishtiyoq bilan boshlagan bo‘lsangiz, shunday qilib, qo‘lingizdan kelganicha bitirishga harakat qilinglar.

¹²Agar inson hadya berishni xohlasa, undan yo‘q bo‘lgan narsa talab qilinmaydi, balki o‘zida bor narsasini bergani qabul qilinadi.

¹³Boshqalarning hayoti yengillashib, sizlar esa og‘ir ahvolda qolishingizni istamaymiz. Hammaning orasida tenglik bo‘lsin.

¹⁴Hozirgi paytda sizlardagi baraka ulardagi yetishmovchiliklarni to‘ldirsin, yana boshqa bir paytda ulardagi baraka sizlardagi yetishmovchiliklarni to‘ldirsin, shunday qilib tenglik bo‘lsin.

¹⁵Muqaddas Bitiklarda quyidagicha yozilgan: “Ko‘p yig‘ishtirganlardan hech narsa ortib qolmadi, oz yig‘ishtirganlar uchun esa yetarli bo‘ldi.”

¹⁶Xudoga shukr! Men sizlarga qanday g‘amxo‘r bo‘lsam, Titusning diliga U sizlarga nisbatan shunday g‘amxo‘rlikni jo qildi.

¹⁷Axir, Titusdan sizlarning oldingizga borishni iltimos qilganimda, u nafaqat rozi bo‘ldi, balki xohish va ishtiyoq bilan bordi.

¹⁸U bilan birga barcha jamoatlarda, Xushxabarning voizi, deb maqtalgan birodarni ham yubordik.

¹⁹Xayrli ishda yordam qilsin, deb jamoatlar uni bizga yo‘ldosh qilib sayladilar. Biz bu ishni Egamizni ulug‘lash uchun hamda o‘zimizning ishtiyoqimizni ko‘rsatish uchun qilyapmiz.

²⁰Saxiylik bilan berilgan xayr–ehsonlarni atalgan odamlarga yetkazishimizda hech qanday ayb ish qilmayotganimizni ko‘rsatish uchun o‘sha birodar bizning yo‘ldoshimiz bo‘ldi.

²¹Biz nafaqat Egamizning nazarida, balki insonlar oldida ham to‘g‘ri ishni qilishga harakat qilyapmiz.

²²Titus va va’zxon birodarga qo‘shib, yana bir birodarni ham yuboryapmiz. U biz tomondan ko‘p sinalgan va har jihatdan g‘ayratli ekanligini ko‘rsatgan. Sizlarga nisbatan ishonchi komil bo‘lgani uchun uning sizlarga xizmat qilish ishtiyoqi yanada ko‘proq.

²³Agar birov Titus haqida so‘rasa, u mening hamrohim va sizlar uchun xizmat qilayotgan hamkorim ekanligini aytinglar. Haligi ikki birodar esa jamoatlar tomonidan yuborilganlar va ular Masihga ulug‘vorlik keltiradilar.

²⁴Shunday qilib, jamoatlar oldida o‘sha birodarlarga bo‘lgan mehr–muhabbatingizni ko‘rsatib, ularga sizlarni maqtaganimiz bekor emasligini isbotlang.