Read O‘zbek tilidagi Muqaddas Kitob, 2013 Efesliklarga 2 Bible Online

Efesliklarga 2 - O‘zbek tilidagi Muqaddas Kitob, 2013 bible

Efesliklarga 2

¹Sizlar bir vaqtlar gunohlaru ayblaringiz tufayli ruhan o‘lik edingizlar.

²Sizlar bu dunyoning odatlari bo‘yicha, yovuz ruhiy kuchlarning hokimi bo‘lgan shaytonga bo‘ysunib, gunohga botib yashardingiz. Xudoga itoat qilmay yashayotganlarning yuraklarida amal qilayotgan — shayton.

³Biz ham bir vaqtlar xudbin istaklarimizni qondirib yashar edik. Tananing ehtiroslari va bema’ni o‘y–xayollarga berilib yashaydigan, barcha odamzod kabi tabiatan Xudoning qahr–g‘azabiga loyiq bo‘lgan itoatsiz insonlar edik.

⁴Ammo mehr–shafqatga boy Xudo O‘zining bizga bo‘lgan buyuk muhabbatini quyidagicha ko‘rsatdi:

⁵Garchi biz gunohlarimiz tufayli ruhan o‘lik bo‘lsak ham, Xudo bizni Masih bilan birga tiriltirdi. Biz Xudoning inoyati tufayli qutqarilganmiz.

⁶Xudo bizni Masih bilan birga tiriltirdi va bizga samoda U bilan birga joy berdi. Bular Iso Masih tufayli amalga oshdi.

⁷Xudoning inoyati behad mo‘l ekanligi to abad namoyon bo‘lishi uchun U bizga Iso Masih orqali mehr–shafqat ko‘rsatdi.

⁸Axir, sizlar Xudodan inoyat topib, imon orqali najot topgansiz. Bu Xudoning in’omidir, sizning yutug‘ingiz emas.

⁹Yana hech kim: “Men savob ishlarim tufayli qutulganman”, deb maqtanmasin.

¹⁰Axir biz Xudoning ijodimiz. Xudo bizni xayrli ishlar qilishimiz uchun Iso Masih orqali yaratdi, bu ishlarni biz uchun azaldanoq tayyorlab qo‘ygan edi.

¹¹Esingizda bo‘lsin, sunnat qilingan yahudiylar bir vaqtlar siz — g‘ayriyahudiy bo‘lganlarni “sunnatsiz”, deb atardilar. Vaholanki, yahudiylarning sunnati faqatgina jismoniy sunnat edi.

¹²O‘sha paytda sizlar Masihni bilmas edingizlar, Isroil xalqiga tegishli emasdingiz. Xudoning Isroil xalqi bilan tuzgan ahdlariga va bergan va’dalariga begona bo‘lib, bu dunyoda umidsiz va Xudosiz yashar edingiz.

¹³Sizlar oldin Xudodan uzoq edingiz, endi esa Iso Masih orqali, Uning to‘kilgan qoni tufayli Xudoga yaqinlashdingiz.

¹⁴Masihning O‘zi bizning tinchlik manbaimizdir. U O‘z tanasini fido qilib, yahudiylar va g‘ayriyahudiylarni birlashtirdi, ularning orasidagi adovat devorini qulatdi.

¹⁵Iso Masih yahudiylarga berilgan qonunni va uning amrlariyu qoidalarini bekor qildi. Masih tufayli g‘ayriyahudiylar bilan yahudiylar birlashib, yangi bir xalq bo‘ldilar, shunday qilib Masih tinchlik o‘rnatdi.

¹⁶Xochdagi o‘limi orqali Masih g‘ayriyahudiylarni ham, yahudiylarni ham Xudo bilan yarashtirdi–da, ularning orasidagi adovatni yo‘q qildi.

¹⁷Masih kelib, sizlarga, ya’ni oldin Xudodan uzoq bo‘lganlarga hamda Xudoga yaqin bo‘lganlarga tinchlik Xushxabarini e’lon qildi.

¹⁸Masih tufayli endi hammamiz bir Ruh orqali Otamiz Xudoning huzuriga kira olamiz.

¹⁹Demak, sizlar endi begona ham, kelgindi ham emassizlar, balki Xudoning aziz xalqi qatoridasiz, Uning xonadoni a’zosi bo‘ldingizlar.

²⁰Sizlar xuddi bir binodaysizlar. Bu binoning asosi havoriylaru payg‘ambarlardir. Binoning tamal toshi esa Iso Masihning O‘zidir.

²¹Bu imorat Rabbimiz Iso Masih orqali bir bo‘lib, yuksalib boradi va Unga bag‘ishlangan muqaddas ma’bad bo‘ladi.

²²Iso Masihga tegishli bo‘lganingiz uchun sizlar ham bu imoratning bir qismisiz. Bu imoratni Xudoning Ruhi O‘ziga maskan qilib oladi.