Read O‘zbek tilidagi Muqaddas Kitob, 2013 Kolosaliklarga 4 Bible Online

Kolosaliklarga 4 - O‘zbek tilidagi Muqaddas Kitob, 2013 bible

Kolosaliklarga 4

¹Ey xo‘jayinlar, sizning ham jannatda Xo‘jayiningiz borligini bilib, qullaringizga odil va to‘g‘ri muomala qiling.

²Doim ibodat qiling. Ibodatda hushyor bo‘lib, shukronalar keltiring.

³Shuningdek, bizlar uchun ham ibodat qilinglar: biz Xudoning kalomini e’lon qilishimiz va Masih sirini bayon etishimiz uchun Uning O‘zi bizga yo‘l ochib bersin. Men ana shu sir tufayli qamoqdaman.

⁴Bu sirni munosib ravishda izhor eta olishimni Xudodan so‘ranglar.

⁵Fursatni g‘animat bilib, imonlilar qatoriga qo‘shilmaganlarga nisbatan oqilona yo‘l tutinglar.

⁶Ular bilan qanday gaplashishni sizlarga o‘rgatay: ular bilan gaplashganingizda so‘zingiz hamisha yoqimli va mazmunli bo‘lsin.

⁷Men haqimdagi barcha yangiliklarni Rabbimiz Isoning sodiq xizmatkori, hamkorim va suyukli birodarim Tixik sizlarga aytib beradi.

⁸Sizlarga dalda berib, hol–ahvolimizni sizlarga bildirsin, deb men uni sizlarning oldingizga jo‘natyapman.

⁹Tixik bilan birga oldingizga sodiq va sevimli birodarimiz, hamshaharingiz O‘nisim ham boradi. Ular bu yerda bo‘lib o‘tgan hamma narsani sizlarga aytib berishadi.

¹⁰Men bilan birga qamalgan Aristarx va Barnaboning jiyani Mark ham sizlarga salom yo‘llayaptilar. Mark haqida buyruq olgansizlar: agar oldingizga borsa, uni yaxshi qabul qilinglar.

¹¹Yustus laqabli Iso ham sizlarga salom yo‘llayapti. Xudoning Shohligi yo‘lida mehnat qilayotgan bulardan boshqa yahudiy hamkorlarim yo‘q. Ular menga tasalli bo‘lib kelmoqdalar.

¹²Iso Masihning quli, hamshaharingiz Epafras sizlarga salom yo‘llayapti. Xudoning irodasini to‘liq bajaradigan, imoni komil insonlar bo‘linglar, deb Epafras zo‘r g‘ayrat bilan, tinmay sizlar uchun ibodat qilmoqda.

¹³U sizlar uchun hamda Laodikiya va Iyerapol shaharlaridagi imonlilar uchun ne-ne zahmatlar chekkaniga o‘zim shohidman.

¹⁴Sevimli tabib Luqo va Dimas sizlarga salom yo‘llashyapti.

¹⁵Laodikiya shahridagi birodarlarga, ayniqsa Nimfaga va uning uyida yig‘iladigan jamoatga salom aytinglar.

¹⁶Bu maktubim orangizda o‘qib berilgandan keyin, Laodikiyadagi jamoatda ham o‘qittirilsin. Sizlar esa Laodikiyadan keladigan maktubni o‘qinglar.

¹⁷Arxippga: “Sen Rabbimiz Isoning yo‘lida bo‘yningga olgan xizmatni oxiriga yetkazgin”, — deb aytib qo‘yinglar.

¹⁸Men, Pavlus, o‘z qo‘lim bilan bu duoyi salomni yozyapman. Qamoqda ekanligimni esdan chiqarmanglar. Xudoning inoyati sizlarga yor bo‘lsin.