Read O‘zbek tilidagi Muqaddas Kitob, 2013 Salonikaliklarga 1chi 4 Bible Online

Salonikaliklarga 1chi 4 - O‘zbek tilidagi Muqaddas Kitob, 2013 bible

Salonikaliklarga 1chi 4

¹Xullas, ey birodarlar, Xudoni mamnun qilib yashashni bizdan o‘rgandingiz. Ha, mana shu tarzda yashayapsiz. Endi Rabbimiz Iso nomidan sizlarga yolvoramiz, shu tarzda yashashga astoydil harakat qilavering.

²Rabbimiz Iso bizga bergan vakolat bilan sizlarga qanday yo‘l–yo‘riq ko‘rsatganimizni bilasiz.

³Sizlarning muqaddas bo‘lishingiz Xudoning irodasidir. Shuning uchun jinsiy axloqsizlik qilmang.

⁴Har biringiz muqaddaslik va izzat–hurmatga loyiq holda o‘zingizni tuta bilishingiz kerak.

⁵Xudoni bilmagan butparastlarday bo‘lib, shahvoniy hislaringizga qul bo‘lmang.

⁶Jinsiy hayot tarziga kelganda, o‘z birodarlaringizning ishonchini suiiste’mol qilmang, ularga xiyonat qilmang. Mana shunday hamma gunohlar uchun Egamiz jazolaydi. Biz sizlarga bu haqda oldindan aytib, qattiq ogohlantirganmiz.

⁷Xudo bizni harom yo‘ldan yurishga emas, balki muqaddas bo‘lib yashashga chaqirdi.

⁸Shunday ekan, kim mana shu ta’limni rad qilsa, insonlarni emas, sizlarga O‘z muqaddas Ruhini beradigan Xudoni rad qilgan bo‘ladi.

⁹Birodarlik muhabbati haqida esa sizlarga yozishning hojati yo‘q, chunki bir-biringizni yaxshi ko‘rishni Xudodan o‘rgangansiz.

¹⁰Zotan, sizlar Makedoniya o‘lkasi bo‘ylab yashovchi barcha birodarlaringizga ham shunday munosabatda bo‘lyapsizlar. Shunga qaramay, ularni yanada ko‘proq yaxshi ko‘ring, deb undaymiz.

¹¹Sizlarga aytganimizday, osoyishta hayot kechirishni, o‘z ishingiz bilan mashg‘ul bo‘lishni, qo‘llaringiz mehnati bilan tirikchilik qilishni o‘z oldingizga maqsad qilib qo‘ying.

¹²Shunda Rabbimiz Isoga ishonmaydiganlarning izzat–hurmatini qozonasiz va boshqalarning qo‘liga qarab qolmaysiz.

¹³Birodarlar, umidsiz yashayotgan boshqa odamlar kabi qayg‘uga to‘lmang, deb bu olamdan o‘tganlar haqidagi haqiqatni sizlarga bildirishni xohlaymiz.

¹⁴Biz Isoning o‘lib, tirilganiga ishonamiz. Shunday ekan, Isoga ishongan holda hayotdan ko‘z yumgan imonlilarni ham Xudo tiriltirib, O‘z oldiga olib ketishiga aminmiz. Bu voqea Iso kelganda yuz beradi.

¹⁵Rabbimiz Isoning ta’limoti bo‘yicha sizlarga aytamizki, o‘sha paytda biz, hali tirik bo‘lganlar, o‘lgan birodarlarimizdan oldin emas, ular bilan birga Isoni qarshilab olamiz.

¹⁶Zotan, Rabbimiz Iso Masih buyuk bir sado, bosh farishtaning ovozi va Xudoning karnayi sadosi ostida kelganda, birinchi bo‘lib Unga ishongan holda o‘lganlar tiriladi.

¹⁷So‘ng biz, hali tirik bo‘lganlar, havoda Rabbimizni qarshilab olish uchun ular bilan birga bulutlarda ko‘tarilamiz. Shunday qilib, hammamiz Rabbimiz bilan abadiy birga bo‘lamiz.

¹⁸Shuning uchun mana shu so‘zlar bilan bir–biringizga dalda bering.