Read O‘zbek tilidagi Muqaddas Kitob, 2013 Salonikaliklarga 1chi 5 Bible Online

Salonikaliklarga 1chi 5 - O‘zbek tilidagi Muqaddas Kitob, 2013 bible

Salonikaliklarga 1chi 5

¹Birodarlar, bular qachon, qaysi payt sodir bo‘lishi haqida sizlarga yozishimizning hojati yo‘q.

²Axir, Rabbimiz Iso, kechasi o‘g‘ri tushganday, nogahon kelishini o‘zingiz bilasiz–ku!

³Homilador ayolning to‘lg‘oq og‘riqlari kutilmaganda kelganiday, odamlar: “Hammasi tinch, osoyishta”, deb yurganlarida, birdaniga boshlariga halokat tushadi. Ular qochib qutula olmaydilar.

⁴Biroq, birodarlar, sizlar zulmatda yurmaysizlarki, bu kun o‘g‘riday, kutilmaganda kelib, sizlarni hayratda qoldirsa!

⁵Sizlarning hammangiz yorug‘likda yashaysiz, kunduz kunga tegishlisiz. Biz zulmatga, tunga tegishli emasmiz.

⁶Shuning uchun boshqalarga o‘xshab uxlab qolmaylik. Biz uyg‘oq, hushyor bo‘lishimiz kerak.

⁷Chunki uxlaydiganlar kechasi uxlaydi, ichkilikka berilganlar ham kechasi ichadi.

⁸Biz esa kunduz kunga tegishli ekanmiz, kelinglar, imon va sevgini sovut qilib, boshimizga esa najot umidini dubulg‘a qilib kiyib, hushyor bo‘laylik.

⁹Chunki Xudo bizni g‘azabga uchrasin, deb emas, balki Rabbimiz Iso Masih orqali najot topishimiz uchun tayinladi.

¹⁰Biz tirik bo‘lsak ham, hayotdan ko‘z yumsak ham, U bilan birga yashashimiz uchun Rabbimiz Iso biz uchun o‘ldi.

¹¹Shuning uchun ham hozir qilayotganingizdek, bundan keyin ham bir-biringizga dalda berib, kuch va g‘ayrat bag‘ishlang.

¹²Birodarlar, sizlarga iltijo qilamiz. Orangizda ishlab, Rabbimiz Isoning yo‘lida sizlarga yetakchilik qilayotgan, yo‘l–yo‘riq ko‘rsatayotganlarni hurmat qiling.

¹³Qilayotgan ishlari uchun muhabbat bilan ularni e’zozlang. Bir–biringiz bilan tinch–totuv yashang.

¹⁴Ey birodarlar, sizlardan o‘tinib so‘raymiz: beboshlarni ogohlantiring, jur’atsizlarga dalda bering, zaiflarga yordam ko‘rsating, hammaga sabr–toqatli bo‘ling.

¹⁵Hech biringiz yomonlikka yomonlik qaytarmang, balki har doim bir–biringizga va hammaga yaxshilik qilishga intiling.

¹⁶Hamisha xursand bo‘lib yuringlar.

¹⁷Tinmay ibodat qilinglar.

¹⁸Har qanday sharoitda ham Xudoga shukr qilinglar, chunki sizlar, ya’ni Iso Masihga imon keltirganlar uchun Xudoning irodasi shudir.

¹⁹Muqaddas Ruhning o‘tini so‘ndirmang.

²⁰Bashoratlarni kamsitmanglar.

²¹Hammasini tekshirib ko‘ringlar. Yaxshilikni mahkam tutib,

²²har qanday yomonlikdan qochinglar.

²³Tinchlik manbayi bo‘lgan Xudoning O‘zi sizlarni butunlay poklasin. Rabbimiz Iso Masih kelguncha, butun ruhingiz, joningiz va taningiz aybsiz saqlansin.

²⁴Sizlarni chaqirgan Xudo sadoqatlidir, U har doim O‘z aytganini bajaradi.

²⁵Birodarlar, biz uchun ibodat qiling.

²⁶Hamma birodarlar bilan o‘pishib ko‘rishinglar.

²⁷Rabbimiz nomi bilan sizlarga buyuraman, mana shu xatni barcha birodarlarga o‘qib beringlar.

²⁸Rabbimiz Iso Masihning inoyati sizlarga yor bo‘lsin.