Read O‘zbek tilidagi Muqaddas Kitob, 2013 Yoshua 11 Bible Online

Yoshua 11 - O‘zbek tilidagi Muqaddas Kitob, 2013 bible

Yoshua 11

¹Xazor shahrining [1] shohi Yobin Yoshuaning g‘alabalari haqida eshitdi. U quyidagi shohlarga shoshilinch xabar yubordi: Madon shohi Yo‘vovga, Shimron shohiga, Axshof shohiga,

²shimoldagi qirlarning shohlariga, Jalila ko‘lining [2] janubidagi Iordan vodiysining [3] shohlariga, g‘arbdagi qir etaklari va Nafo‘t–Do‘r shohlariga,

³sharq va g‘arbdagi Kan’on xalqlarining shohlariga, Amor, Xet, Pariz xalqlarining shohlariga, qirlardagi Yobus shohlariga, Mispax yeridagi [4], Xermon tog‘ining etagida yashaydigan Xiv xalqiga.

⁴Ular butun lashkarlari, juda ko‘p otlariyu jang aravalarini to‘plab, Isroil xalqiga qarshi jang qilish uchun yig‘ilishdi. Ularning jangchilari dengiz qirg‘og‘idagi qumday son–sanoqsiz edi.

⁵Isroil xalqi bilan jang qilishga mana shu shohlarning hammasi lashkarlarini birlashtirishdi. Ular Mirom [5] suvlari oldida qarorgoh qurdilar.

⁶Egamiz Yoshuaga shunday dedi: “Ulardan qo‘rqmagin, Men O‘zim ularni sizlarning qo‘lingizga beraman, ertaga shu paytda ularning hammasi o‘lgan bo‘ladi. Ularning otlarini mayib qilib, jang aravalarini yondirasizlar.”

⁷Yoshua o‘zining butun lashkari bilan Miromga borib, dushman qo‘shinlari ustiga to‘satdan hujum qildi.

⁸Egamiz Isroil lashkariga dushmanlari ustidan g‘alaba berdi. Isroil lashkarlari dushmanlarini shimol tomonda Buyuk Sidon va Misrafo‘t–Mayimgacha, sharq tomonda esa Mispax vodiysigacha [6] quvib borib, ularning hammasini halok qildi. Dushmanlarning birortasi ham tirik qolmadi.

⁹Yoshua ular bilan Egamiz buyurganday qildi, ularning otlarini mayib qilib, jang aravalarini yondirib tashladi.

¹⁰O‘shandan keyin Yoshua o‘z lashkari bilan orqaga qaytib, Xazor shahriga bordi. Uni qo‘lga kiritib, shohini halok qildi. U paytda Xazor o‘sha shohliklar orasida eng qudratlisi edi.

¹¹Isroil lashkari shahar aholisining hammasini butunlay yo‘q qildi [7]. U yerda birorta ham tirik jon qolmadi. Shaharni esa yondirib tashlashdi.

¹²Yoshua bilan Isroil lashkari o‘sha shaharlarning hammasini bosib olib, ularning shohlariyu barcha aholisini qilichdan o‘tkazdi. Egamizning quli Muso buyurganday, ularni butunlay vayron qildi.

¹³Isroil lashkari tepaliklarda [8] qurilgan shaharlardan faqatgina Xazor shahrini yondirib tashladi.

¹⁴Isroil lashkari shaharlardagi mol–mulklarni va barcha chorvani o‘zlariga o‘lja qilib oldilar. Ammo shaharlarning barcha aholisini qilichdan o‘tkazdilar. U yerda birorta ham tirik jon qolmadi.

¹⁵Egamiz o‘z quli Musoga bergan amrlarni Muso Yoshuaga yetkazgan edi. Yoshua Muso aytganday qilib, barcha amrlarni bitta qoldirmay bajardi.

¹⁶Shunday qilib, Yoshua butun yurtni: janubiy qirlaru o‘sha qirlarning etaklarini, butun Nagav cho‘lini [9], butun Go‘shen yerini [10], Iordan vodiysini, shimoliy qirlar va o‘sha qirlarning etaklarini bosib oldi.

¹⁷Isroil xalqi bosib olgan yerning janubiy chegarasi Seir yurti yonidagi Xalak tog‘i edi, shimoldagi chegarasi esa Xermon tog‘ining etagida joylashgan Lubnon vodiysidagi Baal–Gad shahri edi. Yoshua o‘sha yerlarning shohlarini mag‘lub qilib, hammasini halok qildi.

¹⁸Bu shohlarni mag‘lub qilguncha, Yoshua uzoq vaqt ular bilan urush qilgan edi.

¹⁹Givondagi Xiv xalqidan tashqari [11] hech bir shahar aholisi Isroil xalqi bilan sulh tuzmagan edi. Ularning hammasi jangda mag‘lub bo‘lishdi.

²⁰Egamiz o‘sha xalqlarni o‘jaru takabbur qilib qo‘ygani uchun, ular Isroil xalqiga qarshi jangga chiqaverdi. Egamiz Musoga buyurganday, Isroil lashkari ularni butunlay yo‘q qilib, shafqatsiz o‘ldirishlari uchun shunday qilgan edi.

²¹O‘sha paytda Yoshua qirlarda yashagan Inoq avlodini [12] yo‘q qilib tashlagan edi. Ular Xevron, Davir, Onov shaharlarida, butun janubiy va shimoliy qirlarda yashardilar. Yoshua ularni o‘ldirib, shaharlarini vayron qildi.

²²Isroil xalqining yurtida Inoq avlodidan hech kim qolmadi, faqatgina G‘azo, Gat va Ashdod shaharlarida [13] bir nechtasi qoldi.

²³Shunday qilib, Musoga Egamiz aytganday, Yoshua butun yurtni qo‘lga kiritdi. Yoshua bu yerlarni Isroil xalqining qabilalariga mulk qilib berdi. Endi yurtda tinchlik barqaror bo‘ldi.