Read O‘zbek tilidagi Muqaddas Kitob, 2013 Yoshua 12 Bible Online

Yoshua 12 - O‘zbek tilidagi Muqaddas Kitob, 2013 bible

Yoshua 12

¹Muso boshchiligida Isroil xalqi Iordan daryosining sharqida bo‘lgan shohlarni mag‘lub qilib, ularning yerlarini egallab olgan edi. Bu shohlar janubdagi Arnon soyligidan shimoldagi Xermon tog‘igacha bo‘lgan yerlarda hukmronlik qilgan edi. Ularning yerlari Iordan vodiysining [1] sharqidagi barcha yerlarni o‘z ichiga olar edi.

²Isroil xalqi mag‘lub qilgan shohlardan biri Amor xalqining shohi Sixo‘n [2] edi. U Xashbon shahrida yashagan edi. Uning shohligi Arnon soyligining chetida joylashgan Aror shahrini va o‘sha soylikning o‘rtasidan to Yavoq daryosigacha cho‘zilgan joylarni, ya’ni Giladning yarmini o‘z ichiga olar edi. Yavoq daryosi Ommon xalqi yerining chegarasi edi.

³Sixo‘n Iordan vodiysining sharq tomonida ham hukmronlik qilgan edi. Bu hudud shimol tomondagi Jalila ko‘lining [3] g‘arbiy qirg‘oqlarigacha, janub tomondagi O‘lik dengizgacha [4], Bayt–Yashimo‘tdan Fisgax tog‘ tizmasining yon bag‘irlarigacha bo‘lgan joylarni o‘z ichiga olar edi.

⁴Mag‘lub bo‘lgan Bashan shohi O‘g [5] o‘z shaharlari Ashtaro‘t va Edreyda yashardi. U Rafa xalqining [6] qolganlaridan biri edi.

⁵Uning shohligi shimoldagi Xermon tog‘igacha, sharqdagi Salko shahrigacha cho‘zilib, g‘arbdagi Gashur va Maxo shohliklarining chegaralarigacha yetib borgan Bashan yerlarini ham o‘z ichiga olgan edi. Bu shohlik yana Giladning shimoliy yarmini ham o‘z ichiga olib, Xashbon shohi Sixo‘n hududi chegarasigacha yetib borardi.

⁶Egamizning quli Muso va Isroil xalqi mana shu ikki shohni mag‘lub qilib, ularning yerlarini egallab olishgan edi. Muso shu yerlarni Ruben, Gad qabilalari va Manashe qabilasining yarmiga [7] mulk qilib bergan edi.

⁷Iordanning g‘arbida — shimoldagi Lubnon vodiysida joylashgan Baal–Gaddan tortib, janubdagi Seir yonida joylashgan Xalak tog‘igacha bo‘lgan joylarda yashagan shohlarni Isroil xalqi Yoshua boshchiligida mag‘lub qildi. O‘sha shohlarning yerlarini Yoshua Isroil qabilalariga mulk qilib bo‘lib berdi.

⁸Qirlarni, g‘arbdagi qirlar etaklarini, Iordan vodiysiyu uning g‘arbidagi qir yon bag‘irlarini, Yahudo adirlaridagi va Nagav cho‘lidagi [8] yerlarni bo‘lib berdi. Bu yerlarda Xet, Amor, Kan’on, Pariz, Xiv va Yobus xalqlari yashashardi. Isroil xalqi mag‘lub qilgan shohlar quyidagilardir:

⁹Yerixo shohi, Baytilning yonidagi Ay shohi,

¹⁰Quddus shohi, Xevron shohi,

¹¹Yarmut shohi, Laxish shohi,

¹²Eglon shohi, Gezer shohi,

¹³Davir shohi, Geder shohi,

¹⁴Xo‘rmax shohi, Arod shohi,

¹⁵Libna shohi, Adullam shohi,

¹⁶Makkedo shohi, Baytil shohi,

¹⁷Tappux shohi, Xafer shohi,

¹⁸Ofoq shohi, Sharon shohi,

¹⁹Madon shohi, Xazor shohi,

²⁰Shimron–Maron shohi, Axshof shohi,

²¹Tanax shohi, Maxido‘ shohi,

²²Kedesh shohi, Karmildagi Yoxnayom shohi,

²³Nafo‘t–Do‘rdagi [9] Do‘r shohi, Gilgaldagi [10] Go‘yim shohi,

²⁴Tirza shohi. Isroil xalqi hammasi bo‘lib o‘ttiz bitta shohni mag‘lub qildi.