Read O‘zbek tilidagi Muqaddas Kitob, 2013 Yoshua 13 Bible Online

Yoshua 13 - O‘zbek tilidagi Muqaddas Kitob, 2013 bible

Yoshua 13

¹Yillar o‘tib, Yoshua ancha keksayib qolgan paytda Egamiz unga shunday dedi: “Sen qariding, yoshing ham o‘tib qoldi, lekin bu yurtning ko‘p joylari hali bosib olinmagan.

²Isroil xalqi hali quyidagi yerlarni egallamagan: butun Filist va Geshir xalqining yerlari,

³ya’ni hozir Kan’on xalqiga tegishli bo‘lib, Misrning sharqiy chegarasidagi Shixor irmog‘idan [1] shimoldagi Exron chegaralarigacha bo‘lgan yerlar. O‘sha joyda Filist xalqining beshta hukmdori yashaydi. Ular quyidagi shaharlarda hukmronlik qiladi: G‘azo, Ashdod, Ashqalon, Gat va Exron. Janubdagi Avim xalqining [2] yerlari ham hali bosib olinmagan.

⁴Shimolda esa Isroil xalqi hali quyidagi yerlarni bosib olmagan: Kan’on xalqining barcha yerlari. Bu yerlar Sidon xalqiga tegishli bo‘lgan Meraxni o‘z ichiga olib, shimol tomonga, Amor xalqi yerlarining chegarasidagi Ofoq [3] degan joygacha cho‘ziladi.

⁵Yana Gabolliklarning [4] yerlarini, Lubnon tog‘li yerlarining sharq tomonini — Xermon tog‘ining etagidagi Baal–Gaddan Levo–Xomatgacha [5] bo‘lgan joylarni,

⁶Lubnondan Misrafo‘t–Mayimgacha bo‘lgan qirlarning aholisi — barcha Sidonliklarni ham Isroil xalqi hali mag‘lub qilmagan. Men O‘zim mana shu xalqlarni bu yurtdan, Isroil xalqining oldidan haydayman. Men senga buyurganimday, mana shu yerlarni albatta Isroil xalqiga mulk qilib bergin.

⁷Xullas, mana shu yerlarni qolgan to‘qqizta qabilaga va Manashe qabilasining yarmiga [6] mulk qilib bo‘lib bergin.”

⁸Ruben, Gad qabilalari va Manashe qabilasining boshqa yarmi Iordan daryosining sharqida o‘z ulushlarini olib bo‘lgan edilar. Ularga bu yerlarni Egamizning quli Muso bergan edi.

⁹Ularning hududi janubdagi Arnon soyligining chetida joylashgan Aror shahridan tortib soylikning o‘rtasidagi shahargacha cho‘zilib, Midavodan Dibongacha bo‘lgan butun yassi tepalikni o‘z ichiga oladi.

¹⁰Bu hudud Xashbon shahrida hukmronlik qilgan Amor xalqining shohi Sixo‘n qo‘li ostida bo‘lgan hamma shaharlarni, Ommon xalqining chegarasigacha bo‘lgan yerlarni o‘z ichiga olardi.

¹¹Gilad hududi, Gashur va Maxo xalqlarining yerlari, shimoldagi butun Xermon tog‘i, sharqdagi Salkogacha bo‘lgan butun Bashan,

¹²Rafa xalqining [7] eng oxirgi avlodi bo‘lgan shoh O‘gning hamma yerlari ham o‘sha hududga kirar edi. Bashan hududining Ashtaro‘t va Edrey shaharlarida shoh O‘g hukmronlik qilgan edi. O‘sha yerlarning xalqlarini Muso mag‘lub qilib haydab chiqargan edi.

¹³Lekin Isroil xalqi Gashur va Maxo xalqlarini haydab chiqarmadi, ular bugungacha Isroil xalqi orasida yashaydilar.

¹⁴Faqatgina Levi qabilasiga Muso ulush bermadi. Isroil xalqining Xudosi — Egamiz aytganday, qurbongohda Unga atab kuydiriladigan qurbonliklar Levi qabilasining ulushidir.

¹⁵Muso Ruben qabilasiga urug‘lari bo‘yicha ulush bergan edi.

¹⁶Ularning hududi janubdagi Arnon soyligining chetida joylashgan Aror shahridan tortib soylikning o‘rtasidagi shahargacha cho‘zilib, Midavo atrofidagi butun yassi tepalikni o‘z ichiga oladi.

¹⁷Mana shu hudud Xashbon shahrini va yassi tepalikda joylashgan quyidagi hamma shaharlarni o‘z ichiga olar edi: Dibon, Bomo‘t–Baal va Bayt–Baal–Miyon,

¹⁸Yaxaz, Kadamo‘t, Mifat,

¹⁹Xiratayim, Sivmo va Iordan vodiysida joylashgan qirning ustidagi Zaret–Xashaxar,

²⁰Bayt–Piyor, Fisgax tog‘ tizmasining yon bag‘irlari, Bayt–Yashimo‘t shaharlari.

²¹Ruben qabilasining yerlari yassi tepalik ustidagi barcha shaharlar, Xashbonda hukmronlik qilgan Amor xalqining shohi Sixo‘nning butun shohligini o‘z ichiga olardi. Muso Sixo‘nni va u bilan ittifoq tuzgan Midiyon hukmdorlarini mag‘lub qildi. Ularning ismlari Evi, Rahem, Zur, Xur va Raba edi.

²²Isroil xalqi yana Bavo‘r o‘g‘li Balomni [8] ham qilichdan o‘tkazdi. U folbinlik bilan shug‘ullanar edi.

²³Ruben qabilasi hududining g‘arbiy chegarasi Iordan daryosi va uning qirg‘oqlari edi. Mana shu yerlar Ruben qabilasiga mulk qilib berilgan edi.

²⁴Muso Gad qabilasiga ham urug‘lari bo‘yicha ulush berdi.

²⁵Yazir shahri, Gilad viloyatidagi hamma shaharlar, Rabba shahrining [9] sharqidagi Aror shahrigacha [10] bo‘lgan Ommonlar yerining yarmi ularning hududiga kirar edi.

²⁶Ularning yeri yana janubdagi Xashbon shahridan shimol tomondagi Ramat–Mispi va Batonim shaharlarigacha, shuningdek, shimoldagi Moxanayimdan Debirgacha [11] cho‘zilgan edi.

²⁷Gad qabilasining yeri Iordan vodiysida Bayt–Xaram, Bayt–Nimro, Suxo‘t, Zofun shaharlarini hamda Xashbon hukmdori bo‘lgan Sixo‘n shohining qolgan shohligini ham o‘z ichiga olar edi. Bu hududning g‘arbiy chegarasi Iordan daryosi bo‘lib, shimoldagi Jalila ko‘ligacha [12] cho‘zilgan edi.

²⁸Mana shu hududdagi shaharlar va atroflaridagi qishloqlari Gad qabilasiga mulk qilib berilgan edi.

²⁹Muso Manashe qabilasining yarmiga ham urug‘lari bo‘yicha ulush bergan edi.

³⁰Ularning hududi Moxanayim shahridan shimolga cho‘zilib, butun Bashan hududini va Yovir bosib olgan oltmishta shaharni o‘z ichiga olar edi. Bashan shohi O‘g mana shu joylarda hukmronlik qilgan edi.

³¹Gilad viloyatining yarmi, Bashandagi O‘g shohligining poytaxt shaharlari Ashtaro‘t va Edrey ham ularning hududiga kirar edi. Mana shu yerlar Manashe o‘g‘li Moxirdan kelib chiqqan naslning yarmiga berilgan edi.

³²Iordanning sharqida, Mo‘ab tekisligida, Yerixoning ro‘parasida Muso bo‘lib bergan ulushlar mana shulardir.

³³Lekin Levi qabilasiga Muso ulush bermagan edi. Isroil xalqining Xudosi — Egamiz ularga: “Men O‘zim sizlarning ulushingiz bo‘laman”, deb va’da bergan edi [13].