Read O‘zbek tilidagi Muqaddas Kitob, 2013 Yoshua 18 Bible Online

Yoshua 18 - O‘zbek tilidagi Muqaddas Kitob, 2013 bible

Yoshua 18

¹Isroil xalqi butun yurtni qo‘lga kiritgandan keyin butun Isroil jamoasi Shilo‘ shahrida [1] yig‘ildi. Ular o‘sha yerda Uchrashuv chodirini tikdilar.

²Isroil xalqining orasida hali ulush olmagan yettita qabila qolgan edi.

³Yoshua Isroil xalqiga shunday dedi: “Qachongacha ota–bobolaringiz Xudosi — Egamiz sizlarga bergan yurtni qo‘lga kiritishni orqaga surasizlar?!

⁴Har bir qabiladan uch kishini tanlanglar. Men ularni butun yurtni kezib chiqish uchun yuboraman. Ular o‘z qabilalarining ulushi bo‘yicha, o‘sha yerni tasvirlab yozib kelishadi.

⁵Janubdagi Yahudo qabilasining hududi va shimoldagi Yusuf avlodlarining [2] hududlaridan tashqari qolgan butun yurtni yettiga bo‘lasizlar.

⁶Keyin shularni yozib, mening oldimga olib kelinglar. Men Egamiz Xudo oldida sizlar uchun qur’a tashlayman [3].

⁷Sizlarning orangizda Levi qabilasiga ulush bermayman. Egamizga ruhoniy bo‘lib xizmat qilish ularning ulushidir. Gad, Ruben qabilalari va Manashe qabilasining boshqa yarmi [4] Iordanning sharq tomonida o‘z ulushlarini olib bo‘lganlar. Egamizning quli Muso o‘sha yerlarni ularga bergan.”

⁸Shunday qilib, Yoshua yerning tasvirini yozib kelishni buyurgan kishilar yo‘lga tushdilar. Ular ketmasdan oldin, Yoshua ularga shunday deb tayinlagan edi: “Butun yerni kezib, uning tasvirini yozib kelganingizdan keyin, men Shilo‘da, Egamiz oldida sizlar uchun qur’a tashlayman.”

⁹U kishilar borib, yerni yetti qismga bo‘ldilar. Butun yurtni tasvirlab yozib, shaharlarini ro‘yxatga oldilar. Keyin Yoshuaning oldiga, Shilo‘dagi qarorgohga qaytib keldilar.

¹⁰Yoshua Shilo‘da, Egamiz oldida ular uchun qur’a tashlab, o‘sha yerlarni Isroil xalqiga bo‘lib berdi. Qur’a bo‘yicha har bir qabilaga bir ulushdan berdi.

¹¹Qur’a tashlanganda Benyamin qabilasiga Yahudo qabilasi va Yusuf avlodlari [5] hududlarining orasidagi yerlar ulush bo‘lib tushdi.

¹²Benyamin hududining shimoliy chegarasi sharq tomonda Iordan daryosidan boshlanadi, keyin Yerixo qirining yon bag‘ridan shimol tomonga boradi. Qirlar bo‘ylab g‘arb tomonga o‘tib, Bayt–Obun atrofidagi sahroga boradi.

¹³U yerdan chegara Luz, ya’ni Baytil tomonga borib, Luzning janubidagi qir bo‘ylab cho‘ziladi. Keyin chegara Otro‘t–Adar shahriga borib, u yerdan pastki Bayt–Xo‘ron shahrining janubidagi qirgacha boradi.

¹⁴U yerdan chegara Bayt–Xo‘ron qarshisidagi qirning g‘arb tomoni bo‘ylab janub tomonga cho‘zilib, Xirat–Baal, ya’ni Xirat–Yorim qishlog‘ida tugaydi. Bu qishloq Yahudo qabilasiga tegishli. G‘arbiy chegara mana shudir.

¹⁵G‘arbda janubiy chegara Xirat–Yorimning chetidan boshlanib, Naftuva buloqlarigacha boradi.

¹⁶Keyin chegara Rafa soyligining shimolidagi tog‘ etagiga boradi. Xinnum soyligi mana shu yerdan boshlanardi. Chegara janub tomonga davom etib, Xinnum soyligi bo‘ylab Yobusning [6] janubidagi qir yon bag‘riga boradi. U yerdan esa En–Ro‘g‘ol tomonga qarab davom etadi.

¹⁷Chegara u yerdan shimolga, En–Shamash tomonga buriladi va Adum dovonining qarshisidagi Gelilo‘tga boradi. Keyin Ruben o‘g‘li Bo‘xan nomi bilan atalgan toshning yonidan o‘tadi.

¹⁸Keyin Iordan vodiysining [7] yonidagi qir yon bag‘rining shimol tomonidan o‘tib, vodiyni ham kesib o‘tadi.

¹⁹U yerdan chegara Bayt–Xo‘glax qirining shimol tomoniga o‘tib, Iordan daryosi O‘lik dengizga [8] quyiladigan joyda tugaydi. Bu Benyamin qabilasi hududining janubiy chegarasidir.

²⁰U yerning sharqiy chegarasi Iordan daryosidir. Benyamin qabilasiga ulush qilib berilgan yerlarning chegaralari mana shular edi.

²¹Quyidagi shaharlar Benyamin qabilasiga berildi: Yerixo, Bayt–Xo‘glax, Emix–Qaziz,

²²Bayt–Araba, Zamorayim, Baytil,

²³Avim, Poro, O‘fra,

²⁴Xafar–Ommonax, Ofnax va G‘ibo. Hammasi bo‘lib o‘n ikkita shahar va ularning atroflaridagi qishloqlar.

²⁵Quyidagi shaharlar ham Benyamin qabilasiga berildi: Givon, Rama, Bero‘t,

²⁶Mispax, Xafira, Mo‘zox

²⁷Rahem, Yirpayel, Taralo,

²⁸Zila, Elef, Yobus (ya’ni Quddus), Givo va Xirat–Yorim [9]. Hammasi bo‘lib o‘n to‘rtta shahar va ularning atroflaridagi qishloqlar. Mana shu yerlarni Benyamin qabilasiga Yoshua ulush qilib berdi.