Read O‘zbek tilidagi Muqaddas Kitob, 2013 Yoshua 19 Bible Online

Yoshua 19 - O‘zbek tilidagi Muqaddas Kitob, 2013 bible

Yoshua 19

¹Qur’a bo‘yicha [1] ikkinchi bo‘lib Shimo‘n qabilasi ulush oldi. Shimo‘n qabilasiga ulush qilib berilgan yerlarning atrofini Yahudo qabilasining hududi o‘rab olgan edi.

²Quyidagi shaharlar Shimo‘n qabilasiga berildi: Bersheva (yoki Sheba) [2], Mo‘lodax,

³Xazor–Shuvol, Bala, Ezam,

⁴Elto‘lad, Batul, Xo‘rmax,

⁵Zixlax, Bayt–Markobo‘t, Xazor–Susa,

⁶Bayt–Laboyo‘t va Shoruxan. Hammasi bo‘lib o‘n uchta shahar va ularning atrofidagi qishloqlar.

⁷Quyidagi shaharlar ham Shimo‘n qabilasiga tegishli edi: Oyin, Rimmon, Eter va Oshon. To‘rtta shahar va ularning atrofidagi qishloqlar.

⁸Shimo‘n qabilasining hududi yana janubdagi Baalat–Ber, ya’ni Nagav cho‘lidagi [3] Ramagacha bo‘lgan yerlardagi barcha shaharlarni va ularning atroflaridagi qishloqlarni o‘z ichiga olar edi.

⁹Yoshua Yahudo qabilasiga bergan ulush ular uchun keragidan ham ortiq edi. Shuning uchun ularning hududidan bir bo‘lagini olib, Shimo‘n qabilasiga ulush qilib berdi.

¹⁰Qur’a bo‘yicha uchinchi bo‘lib Zabulun qabilasi ulush oldi. Ularga tekkan hududning chegarasi Sorid shahridan boshlanib,

¹¹g‘arb tomonga boradi va Maralo shahridan o‘tadi. Keyin Dabbeshet shahrining yonidan o‘tib, Yoxnayom shahrining sharqidagi soylikkacha yetadi.

¹²Sorid shahrining sharq tomonidan chegara Xislo‘t–Tovur shahrining chegarasigacha cho‘ziladi. Keyin Dovarat shahrigacha borib, Yofiya shahrigacha davom etadi.

¹³Chegara yana sharq tomonga davom etib, Gat–Xafer va Et–Kozin shaharlarigacha boradi. Keyin chegara Rimmon shahrigacha borib, u yerdan Niyox shahri tomon buriladi [4].

¹⁴Hududning shimoliy chegarasi Xannaton shahridan o‘tib, Yiftox–El soyligida tugaydi.

¹⁵Zabulun qabilasining hududida hammasi bo‘lib o‘n ikkita shahar va ularning atroflaridagi qishloqlar bor edi. O‘sha shaharlarning ba’zilari Kattot, Nahalil, Shimron, Yidalo va Baytlahm [5] shaharlari edi.

¹⁶Mana shu shaharlar va ularning atroflaridagi qishloqlarning hammasini Zabulun qabilasi ulush qilib oldi.

¹⁷Qur’a bo‘yicha to‘rtinchi bo‘lib Issaxor qabilasi ulush oldi.

¹⁸Bu qabilaga ulush qilib berilgan yerlarda quyidagi shaharlar bor edi: Yizril, Xasullo‘t, Shunam,

¹⁹Xaforayim, Shiyon, Anaxarat,

²⁰Rabbit, Xishion, Avaz,

²¹Remot, En–Xannim, En–Xaddax, Bayt–Pazez.

²²Shimoldagi bu hududning chegarasi Tovur tog‘idan boshlanib, Iordan daryosida tugaydi. Tovur [6], Shaxazimo va Bayt–Shamash [7] shaharlari ham mana shu hududga kirar edi. Hammasi bo‘lib o‘n oltita shahar va ularning atroflaridagi qishloqlar.

²³Mana shu shaharlar va ularning atroflaridagi qishloqlarni Issaxor qabilasi ulush qilib oldi.

²⁴Qur’a bo‘yicha beshinchi bo‘lib Osher qabilasi ulush oldi.

²⁵Ularning hududi quyidagi shaharlarni o‘z ichiga olar edi: Xalkat, Xaliy, Beten, Axshof,

²⁶Alammalek, Emod va Mishol. Hududning janubiy chegarasi O‘rta yer dengizidan boshlanib, Karmil qirlarining etaklaridagi Shixor–Libnat soyligi bo‘ylab cho‘ziladi.

²⁷U yerdan chegara sharq tomonga burilib, Bayt–Do‘g‘on shahrigacha boradi va Yiftox–El vodiysidagi Zabulun qabilasi hududining chegarasi bilan tutashadi. Keyin sharqiy chegara shimol tomonga burilib, Bayt–Emix va Nabiyol shahrigacha boradi. Hududning chegarasi Kavul,

²⁸Abdo‘n [8], Rexob, Xammon, Kanax shaharlaridan o‘tib, Buyuk Sidon shahrigacha yetadi.

²⁹Bu yerdan g‘arbga burilib, mana shu shimoliy chegara Ramaga [9] boradi–da, mustahkam Tir shahrigacha yetadi. Keyin chegara Xo‘sax shahri tomon burilib ketadi va O‘rta yer dengizining oldida tugaydi. Osher qabilasining hududi quyidagi shaharlarni ham o‘z ichiga olar edi: Maxalav, Axsib [10],

³⁰Ummo [11], Ofoq va Rexob. Hammasi bo‘lib yigirma ikkita shahar va ularning atroflaridagi qishloqlar.

³¹Mana shu yerlarning hammasini Osher qabilasi ulush qilib oldi.

³²Qur’a bo‘yicha oltinchi bo‘lib Naftali qabilasi ulush oldi.

³³Naftali qabilasi hududining janubiy chegarasi Xalef shahridan Zananim shahri yonidagi eman daraxti yonigacha boradi. U yerdan chegara Adamiy–Naxab, Yobnail [12] va Laxum shaharlarigacha davom etib, Iordan daryosida tugaydi.

³⁴Hududning g‘arbiy chegarasi Ozno‘t–Tovur shahridan o‘tib, Huqqoq shahrigacha boradi. Naftali qabilasining hududi janub tomonda Zabulun qabilasining hududi bilan chegaradosh, g‘arb tomonda Osher qabilasining hududi bilan chegaradosh. Sharqiy chegarasi esa Iordan daryosidir [13].

³⁵Naftali qabilasining hududidagi mustahkam shaharlar quyidagilardir: Ziddim, Zer, Xammat, Raxat, Keneret,

³⁶Adama, Rama [14], Xazor,

³⁷Kedesh, Edrey [15], En–Xazor,

³⁸Iro‘n, Migdal–El, Xorem, Bayt–Onot va Bayt–Shamash [16]. Hammasi bo‘lib o‘n to‘qqizta shahar va ularning atroflaridagi qishloqlar.

³⁹Naftali qabilasi mana shu yerlarni ulush qilib oldi.

⁴⁰Qur’a bo‘yicha yettinchi bo‘lib Dan qabilasi ulush oldi.

⁴¹Ularning hududi quyidagi shaharlardan iborat edi: Zorox, Eshtoyo‘l, Ir–Shamash,

⁴²Shalabbin, Oyjavlon, Yitla,

⁴³Elo‘n, Timnax, Exron,

⁴⁴Eltaxa, Gibiton, Baalat

⁴⁵Yohud, Bani–Baraq, Gat–Rimmon,

⁴⁶Mejarkon, Raxxo‘n va Yaffaning qarshisidagi joylar.

⁴⁷[47-48] Mana shu shaharlar va ularning atroflaridagi qishloqlar Dan qabilasining ulushi edi. Ammo keyinchalik dushmanlar kelib, bu yerlarni bosib oldilar. Shunda Dan qabilasi shimol tomonga borib, Layish [17] shahriga hujum qildi [18]. Ular shaharni qo‘lga kiritib, butun shahar aholisini qirib tashladilar. O‘zlari esa shu shaharda joylashib, uni o‘z bobosi Dan sharafiga Dan, deb atadilar.

⁴⁸

⁴⁹Barcha yerlar Isroil qabilalariga bo‘lib berilgandan keyin, Isroil xalqi Yoshuaga ham ulush berdi.

⁵⁰Egamiz Isroil xalqiga, Yoshua xohlagan shaharni unga beringlar, deb amr qilgan edi. Yoshua Efrayim qirlaridagi Timnat–Serax shahrini so‘radi. Isroil xalqi o‘sha shaharni Yoshuaga berdi. Yoshua u shaharni qaytadan qurib, o‘sha yerda joylashdi.

⁵¹Mana shu yerlarning hammasini ruhoniy Elazar [19], Nun o‘g‘li Yoshua va qabilalar boshliqlari Isroil qabilalariga ulush qilib berdilar. Shilo‘dagi [20]Uchrashuv chodiriga kiraverishda, Egamizning huzurida qur’a tashlab [21] shunday qildilar. Shunday qilib, butun yurtni bo‘lib olish ham o‘z nihoyasiga yetdi.