Read O‘zbek tilidagi Muqaddas Kitob, 2013 Yoshua 3 Bible Online

Yoshua 3 - O‘zbek tilidagi Muqaddas Kitob, 2013 bible

Yoshua 3

¹Ertasiga tongda Yoshua butun Isroil xalqi bilan birga Shitim qarorgohidan chiqib, Iordanga yetib kelishdi. Daryoni kechib o‘tishdan oldin ular o‘sha yerda qarorgoh qurishdi.

²Uch kundan keyin qabila nazoratchilari qarorgoh bo‘ylab yurib,

³xalqqa shunday deyishdi: “Levi ruhoniylari Egangiz Xudoning ahd sandig‘ini ko‘tarib ketayotganini ko‘rganingizda yo‘lga chiqasizlar. Uning orqasidan boringlar,

⁴shunda boradigan yo‘lingizni bilib olasizlar, chunki sizlar bu yo‘ldan oldin yurmagansizlar. Lekin sandiq bilan sizlarning orangizdagi masofa taxminan ikki ming tirsak [1] bo‘lishi kerak. Orangizdagi masofa mana shundan kam bo‘lmasin.”

⁵Keyin Yoshua xalqqa: “O‘zingizni poklang [2], chunki ertaga Egamiz oramizda mo‘jizalar qiladi”, — dedi.

⁶Ertasiga Yoshua ruhoniylarga shunday dedi: “Ahd sandig‘ini olib, xalqning oldida yuringlar.” Ruhoniylar ahd sandig‘ini ko‘tarib, xalq oldida borishdi.

⁷Egamiz Yoshuaga shunday dedi: — Bugundan boshlab seni butun Isroil xalqi oldida ko‘kka ko‘taraman, shunda ular Men Muso bilan bo‘lganimdek, sen bilan birga bo‘lishimni bilishadi.

⁸Ahd sandig‘ini ko‘tarib boradigan ruhoniylarga aytasan: “Iordan daryosiga yetib borganingizdan keyin daryoga kirib to‘xtanglar.”

⁹Keyin Yoshua Isroil xalqiga shunday dedi: — Yaqinroq kelib, Egangiz Xudoning gaplarini eshiting.

¹⁰[10-11] Mana, butun olam Rabbiysining ahd sandig‘i oldingizda Iordan daryosidan o‘tadi [3]. Shunday qilib, barhayot Xudo sizlarning orangizda ekanligini, Uning O‘zi Kan’on, Xet, Xiv, Pariz, Girgosh, Amor va Yobus xalqlarini albatta sizlarning oldingizdan quvib yuborishini bilasizlar.

¹²Endi Isroil xalqining har bir qabilasidan bittadan, jami o‘n ikkita erkakni tanlang.

¹³Butun olam Rabbiysi, Egamizning ahd sandig‘ini ko‘targan ruhoniylarning oyoqlari Iordan daryosining suvlariga tegishi bilanoq oqim to‘xtab qoladi, suv bir joyda yig‘ilib turadi.

¹⁴Xalq o‘z chodirlarini yig‘ib, Iordandan o‘tish uchun yo‘lga tushganda, ahd sandig‘ini ko‘targan ruhoniylar ularning oldida borar edi.

¹⁵Iordan suvi hosil paytida [4] qirg‘oqlaridan ham toshib oqardi. Ahd sandig‘ini ko‘targan ruhoniylar Iordanga yaqinlashdi. Ularning oyoqlari suvga tegishi bilanoq

¹⁶daryoning oqimi to‘xtab qoldi. Suv uzoqda joylashgan Zoraton yonidagi Adama shahri [5] oldida yig‘ilib qoldi, O‘lik dengizga [6] quyiladigan suv esa butunlay to‘xtab qoldi. Shundan keyin xalq daryodan o‘tib, Yerixo shahrining yonidagi yerlarga bordi.

¹⁷Butun Isroil xalqi quruq yerdan yurib, Iordandan o‘tib bo‘lmaguncha, ahd sandig‘ini ko‘targan ruhoniylar daryoning o‘rtasida, quruq yerda turishdi.