Read O‘zbek tilidagi Muqaddas Kitob, 2013 Yoshua 9 Bible Online

Yoshua 9 - O‘zbek tilidagi Muqaddas Kitob, 2013 bible

Yoshua 9

¹Iordan daryosining g‘arb tomonida turadigan barcha shohlar Yoshuaning g‘alabalari haqida eshitishgan edi. Ular qirlarda, qirlarning etaklarida, butun O‘rta yer dengizi qirg‘og‘i bo‘ylab to shimoldagi Lubnongacha bo‘lgan joyda yashaydigan Xet, Amor, Kan’on, Pariz, Xiv va Yobus xalqlarining shohlari edilar.

²O‘sha shohlar o‘z qo‘shinlarini bir qilib, Yoshua va butun Isroil xalqiga qarshi jang qilishga to‘plandilar.

³Ammo Givon [1] aholisi Yoshuaning Yerixo va Ay shaharlariga qilgan ishlari haqida eshitib,

⁴ayyorlik bilan ish tutdi. Ulardan bir nechtasi yo‘lga tayyorgarlik ko‘rib [2], o‘z eshaklariga eski xurjunlar va eski, yirtilib yamalgan meshlarni yukladilar.

⁵Oyoqlariga eski, yamalgan oyoq kiyimlar, ustilariga esa juldur kiyimlar kiyishdi. Ular olgan nonlarning suvi qochib, mog‘or bosgan edi.

⁶Ular Gilgaldagi qarorgohga [3] borib, Yoshua va butun Isroil xalqiga: — Biz juda ham olis bir yurtdan keldik, biz bilan sulh tuzinglar, — deyishdi.

⁷Ammo Isroil xalqi bu Xiv xalqidan bo‘lganlarga [4] shunday dedi: — Balki sizlar bizga yaqin joyda yasharsizlar, biz qanday qilib sizlar bilan sulh tuzamiz? [5]

⁸— Shunda ular Yoshuaga: — Biz sizlarning qullaringizmiz, — deyishdi. Yoshua esa ulardan: — Sizlar kimsizlar? Qayerdan keldingiz? — deb so‘radi.

⁹Ular Yoshuaga shunday deb javob berishdi: — Biz sizning qullaringizmiz, Egangiz Xudoni deb juda ham uzoq bir yurtdan keldik. Biz sizning Xudoyingiz haqida eshitdik. U Misrda nima qilganini,

¹⁰Iordanning sharqidagi Amor xalqlarining ikki shohiga — Xashbon shohi Sixo‘n va Ashtaro‘tda yashagan Bashan shohi O‘gga nimalar qilganingizni eshitdik [6].

¹¹Shuning uchun oqsoqollarimiz va yurtimiz aholisi bizni sizlarning oldingizga yuborib: “Uzoq safarga tayyorlaninglar. Isroil xalqi oldiga yetib borgach, bizning xalqimiz ularga qul ekanligini aytib, ular bilan sulh tuzib kelinglar”, deb tayinlashdi.

¹²Mana, nonimizga qarang, yo‘lga chiqqanimizda issiqqina edi, endi esa suvi qochib, mog‘or bosib qolgan.

¹³Mana bu sharob meshlari ularni to‘ldirganimizda yangi edi, endi esa qarang, yorilib ketgan, ust–boshimiz va oyoq kiyimlarimiz ham yo‘l uzoqligidan eskirib ketdi.

¹⁴Isroil oqsoqollari ularning oziq–ovqatlarini tekshirib ko‘rdilar, Egamizdan esa yo‘l–yo‘riq so‘ramadilar.

¹⁵Yoshua ular bilan tinchlik sulhini tuzdi. Jamoa oqsoqollari ularni o‘ldirmaslikka qasam ichib, mana shu sulhni ma’qulladilar.

¹⁶Sulh tuzilib, uch kun o‘tgandan keyin Isroil xalqi Givonliklar o‘zlariga yaqin joyda yashashlarini eshitib qolishdi.

¹⁷Isroil xalqi yo‘lga chiqib ularning shaharlariga uch kunda yetib borishdi. Givon, Xafira, Bero‘t va Xirat–Yorim [7] ularning shaharlari edi.

¹⁸Ammo Isroil xalqi ularga hujum qilmadi, chunki jamoa oqsoqollari Isroil xalqining Xudosi — Egamiz nomi bilan qasam ichib, ularga va’da berishgan edi. Shunda butun jamoa ming‘illab, oqsoqollarga nolidi.

¹⁹Oqsoqollar jamoaga shunday dedilar: — Biz ularga Isroil xalqining Xudosi — Egamiz nomi bilan qasam ichib va’da berganmiz, endi biz ularga tegmasligimiz kerak.

²⁰[20-21] Mayli, yashayverishsin, ichgan qasamimizni buzib, boshimizga Egamizning g‘azabini keltirmaylik. Ammo Givonliklar butun jamoa uchun o‘tin yoruvchi, suv tashuvchi bo‘lib qolsin. Shunday qilib, oqsoqollar Givonliklarga nisbatan o‘z va’dasida qoldilar.

²²Yoshua Givonliklarni chaqirib so‘radi: — Bizga yaqin joyda yasharkansiz. Nimaga, sizlardan uzoq joyda yashaymiz, deb bizni aldadingiz?

²³Shuning uchun endi sizlar la’natisizlar, sizlar endi abadiy mening Xudoyim uyi [8] uchun o‘tin yoruvchi, suv tashuvchi qul bo‘lib qolasizlar.

²⁴Ular Yoshuaga javob berdilar: — Biz aniq eshitdik, Egangiz Xudo O‘zining quli Musoga butun yurtni sizlarga berib, uning butun aholisini qirib tashlashni buyuribdi. O‘z jonimizni o‘ylab, sizlardan qo‘rqqanimizdan shu ishni qildik.

²⁵Endi biz sizning qo‘lingizdamiz, nima to‘g‘ri va nima yaxshi, deb o‘ylasangiz, bizni shunday qiling.

²⁶Isroil xalqi Givonliklarni o‘ldirishiga Yoshua yo‘l qo‘ymadi.

²⁷Ammo o‘sha kuni Yoshua ularni, Egamizning qurbongohi qayerda qurilishidan qat’iy nazar, ana shu qurbongoh va Isroil jamoasi uchun o‘tin yoruvchi va suv tashuvchi qilib qo‘ydi. Hatto bugungacha [9] ularning vazifasi shudir.