Read O‘zbek tilidagi Muqaddas Kitob, 2013 Timo‘tiyga 2chi 4 Bible Online

Timo‘tiyga 2chi 4 - O‘zbek tilidagi Muqaddas Kitob, 2013 bible

Timo‘tiyga 2chi 4

¹Xudo huzurida hamda tirigu o‘liklarni hukm qiladigan Iso Masih huzurida, Uning kelishi va hukmronligi haqi, senga qat’iy buyuraman:

²Xudoning kalomini targ‘ib qil. “Hozir buning vaqtimi, vaqti emasmi?” demay, uni astoydil e’lon qil. Odamlarga ta’lim berib, ularni to‘g‘ri yo‘lga sol, tanbeh ber, nasihat qil. Hammasini sabr–toqat bilan bajar.

³Chunki shunday vaqt keladiki, odamlar sog‘lom ta’limotga toqat qilmaydigan bo‘ladilar, ular atrofiga o‘zlariga mos, quloqlariga yoqimli so‘zlar aytadigan muallimlar to‘playdilar.

⁴Ular haqiqatdan yuz o‘girib, afsonalarga berilib ketadilar.

⁵Ammo sen har qanday sharoitda aql bilan ish tut, azoblarga chida, Xushxabarni targ‘ib qil, o‘z xizmatingni to‘liq bajargin.

⁶Men hademay bu dunyodan o‘tib ketaman, jonim Xudoga qurbon.

⁷Men ulug‘ kurashda jang qildim, zimmamdagi vazifani oxiriga yetkazdim, Xushxabarga sodiq qoldim.

⁸Meni solihlik toji kutmoqda. Odil hakam — Rabbimiz Iso kelgan kunida o‘sha tojni menga O‘zi beradi. Bunday toj faqat menga emas, balki Uning kelishini intizorlik bilan kutayotganlarning hammasiga nasib bo‘ladi.

⁹Mening oldimga tezroq kelishga harakat qil.

¹⁰Chunki Dimas bu dunyoga ko‘ngil bog‘lab, meni tark etdi. U Salonika shahriga ketdi. Kriskiy Galatiyaga, Titus Dalmatiyaga ketdi. Yonimda faqat Luqo bor.

¹¹Markni o‘zing bilan birga olib kel, u xizmatimda menga yordam beradi.

¹²Men Tixikni Efes shahriga yubordim.

¹³Kelayotganingda o‘zing bilan to‘nimni olib kel, men uni Troas shahridagi Karpnikida qoldirganman. Qo‘lyozmalarni ham, ayniqsa, charmga yozilganlarini olib kel.

¹⁴Temirchi Iskandar menga ko‘p yomonlik qildi. Rabbimiz Iso uni qilmishiga yarasha jazolaydi.

¹⁵Sen Iskandardan ehtiyot bo‘l, chunki u bizning ta’limotimizga qattiq qarshilik ko‘rsatdi.

¹⁶Meni birinchi marta mahkamaga olib borishganda, hech kim meni yoqlamadi. Hamma meni tashlab ketdi. Xudo bu aybni ularning bo‘yniga qo‘ymasin!

¹⁷Ammo Rabbim Iso yonimda turdi, Xushxabarni to‘lig‘icha barcha xalqlarga yetkazishim uchun Uning O‘zi menga kuch berdi. U meni o‘lim changalidan qutqardi.

¹⁸Rabbim meni bundan keyin ham har qanday yomonlikdan xalos qiladi va O‘zining samoviy Shohligiga sog‘–salomat yetkazadi. Unga abadulabad shon–sharaflar bo‘lsin! Omin.

¹⁹Priskilla bilan Akilga va Onisiforning xonadoniga salom aytib qo‘y.

²⁰Yerast Korinf shahrida qoldi. Trofim esa kasal bo‘lgani uchun, uni Milit shahrida qoldirdim.

²¹Qish boshlanmasdan oldin kelishga harakat qil. Evvul, Pud, Lin, Klavdiya va qolgan hamma birodarlar senga salom yo‘llayaptilar.

²²Rabbimiz Iso senga hamroh bo‘lsin. Uning inoyati hammangizga yor bo‘lsin.