Read O‘zbek tilidagi Muqaddas Kitob, 2013 Titusga 3 Bible Online

Titusga 3 - O‘zbek tilidagi Muqaddas Kitob, 2013 bible

Titusga 3

¹Sen jamoatdagilarga eslatib tur: ular davlat boshliqlariyu hokimlarga bo‘ysunsinlar, itoat etib, har qanday xayrli ishga tayyor bo‘lsinlar.

²Hech kimni yomonlamasinlar, janjallashmasinlar, boshqalarga nisbatan doim muloyim va mehribon bo‘lsinlar.

³Bir vaqtlar bizlar ham fahmsiz, itoatsiz, adashgan odamlar edik, har xil zavqu ehtiroslarning quli bo‘lib, gina–kudurat va hasadgo‘ylik bilan kun kechirardik, bir–birimizdan nafratlanadigan razil odamlar edik.

⁴Ammo Najotkorimiz Xudo bizga bo‘lgan ezguligi va mehr–muhabbatini ko‘rsatdi.

⁵Savobli ishlarimiz tufayli emas, balki O‘zining rahm–shafqati tufayli U bizni qutqardi. Muqaddas Ruh orqali gunohlarimizni yuvdi, bizni yangidan tug‘dirib, yangi hayot ato etdi.

⁶Najotkorimiz Iso Masih orqali Xudo bizning ustimizga Muqaddas Ruhini mo‘l–ko‘l qilib yog‘dirdi.

⁷Biz Isoning inoyati bilan oqlandik, endi abadiy hayotga umid bog‘lab, Xudo va’da qilgan barakalardan bahramand bo‘la olamiz.

⁸Bu gaplarning hammasi to‘g‘ri va asoslidir. Ushbu ta’limotning foydasi katta. Jamoatdagilarga yaxshilab uqtir, ular o‘rgatganlarimning hammasiga rioya qilsinlar. Xudoga ishonganlar xayrli ishlarga astoydil bel bog‘lasinlar.

⁹Sen esa ahmoqona bahslardan, shajaralar hamda Tavrot qonunlari borasidagi munozarayu janjallardan o‘zingni olib qoch. Bular foydasiz va behudadir.

¹⁰Orangizga nizo urug‘ini sepayotgan odamni bir–ikki marta ogohlantir, agar gapingga kirmasa, u bilan aloqani uz.

¹¹O‘zing bilasan–ku, bunday odamning fikri buzuq. Uning qilayotgan gunohlari o‘zini mahkum etadi.

¹²Artemas yoki Tixikni sening yoningga yuborganimdan keyin, Nikopol shahriga, mening oldimga tezroq kelishga harakat qil. Chunki men qishni shu yerda o‘tkazishga qaror qildim.

¹³Qo‘lingizdan kelgancha qonunshunos Zinas va Apollosga yordam qilinglar, safarga chiqishlari uchun kerakli hamma narsani ularga bekamu ko‘st qilib yetkazib beringlar.

¹⁴Toki jamoatdagilar ham xayrli ishlarga astoydil bel bog‘lashga odatlansinlar, boshqalarning zaruriy ehtiyojlarini qondirsinlar, shunda hayotlari samarasiz bo‘lmaydi.

¹⁵Yonimdagilarning hammasi senga salom yo‘llayaptilar. Bizni yaxshi ko‘radigan imondagi birodarlarimizga salom aytgin. Xudoning inoyati hammangizga yor bo‘lsin.