Read O‘zbek tilidagi Muqaddas Kitob, 2013 Ibroniylarga 10 Bible Online

Ibroniylarga 10 - O‘zbek tilidagi Muqaddas Kitob, 2013 bible

Ibroniylarga 10

¹Qonun bo‘lg‘usi xayr–barakalarning asl surati emas, bor–yo‘g‘i soyasidir. Har yili qonun bo‘yicha Xudoga bir xil qurbonliklar keltiriladi. Demak, qonun bu qurbonliklar orqali Xudoga sajda qiluvchilarni kamolotga yetkaza olmaydi.

²Bordi–yu, o‘sha odamlar qurbonliklari orqali gunohdan poklana olganlarida edi, ularning vijdoni qiynalmasdi va ular qurbonlik keltirishni bas qilardilar.

³Holbuki, qurbonliklar har yili odamlarga gunohlarini eslatadi, xolos.

⁴Chunki buqayu takalarning qoni hech qachon gunohlarni yuva olmaydi.

⁵[5-6] Shuning uchun Masih dunyoga kelganda Xudoga shunday degan edi: “Sen qurbonligu nazrni istamading, Kuydiriladigan qurbonligu gunoh nazridan mamnun bo‘lmading, Itoat qilishim uchun Menga badan hozirlading.

⁷O‘shanda dedimki: ‘Mana, men keldim. Muqaddas Bitiklarda Men haqimda yozilgan. Sening xohishingni ado etish uchun keldim, ey Xudoyim.’”

⁸Dastlab Masih qonun talab qilgan qurbonliklar haqida so‘z yuritib, Xudoga: “Sen qurbonligu nazrni istamading, kuydiriladigan qurbonligu gunoh nazridan mamnun bo‘lmading”, — deb aytgan.

⁹So‘ng esa haqiqiy itoatkorlikni tilga olib, shunday degan: “Sening xohishingni ado etish uchun keldim, ey Xudoyim”. Bundan ko‘rinib turibdiki, Masih qurbonlik marosimlariga asoslangan avvalgi ahdni bekor qildi. Uning maqsadi yurakning itoatkorligiga asoslangan yangi ahdni o‘rnatish edi.

¹⁰Masih Xudoning xohishini bajarib, O‘z tanasini biz uchun qurbon qildi. Bu yagona qurbonligi orqali bizni gunohdan pokladi.

¹¹Ruhoniylar har kuni Xudoga xizmat qiladilar. Bir xil qurbonliklarni qayta–qayta keltiradilar. Ammo bu qurbonliklar hech qachon gunohni yuva olmaydi.

¹²Masih esa gunohlarni abadiy yuvib tashlaydigan yagona qurbonlikni keltirib, Xudoning o‘ng tomonida o‘tirdi.

¹³“Xudo dushmanlarimni oyoqlarim ostiga poyandoz qiladi”, — deb Masih o‘sha vaqtdan beri kutmoqda.

¹⁴Darvoqe, U bittagina qurbonlik orqali gunohdan poklagan odamlarini to abad barkamol qildi.

¹⁵Muqaddas Ruh ham bu haqda bizga shahodat berib, dedi:

¹⁶“Egamiz shunday demoqda: ‘Men kelajakda Isroil xalqi bilan tuzadigan ahd shunday bo‘ladi: Men qonunlarimni odamlarning yuragiga solib qo‘yaman, qonunlarimni onglariga yozaman.

¹⁷Men ularning gunohlaru qabihliklarini hech qachon esga olmayman.’”

¹⁸Demak, Xudo gunohlarni kechirgan bo‘lsa, boshqa qurbonlik keltirishning hojati yo‘q.

¹⁹Ey birodarlarim, Iso Masihning qoni tufayli endi biz Eng muqaddas xonaga dadillik bilan kira olamiz.

²⁰Chunki Iso biz uchun yangi yo‘lni ochib berdi. U Chodirdagi parda orqali, ya’ni qurbon qilingan O‘z tanasi orqali hayot sari yetaklaydigan yo‘lni ochdi.

²¹Ha, bizning ulug‘ Ruhoniyimiz bor, U Xudoning butun xonadoni ustidan mas’uldir.

²²Shunday ekan, samimiy qalb va mustahkam ishonch bilan Xudoga yaqinlashaylik. Axir, Masih O‘z qoni bilan qalblarimizni poklab, vijdonimizni qiynagan hamma gunohlardan tozaladi. Badanimiz ham toza suv bilan yuvildi.

²³Endi o‘zimiz e’tirof etgan umidimizni ikkilanmay mahkam tutaylik. Chunki va’da bergan Xudo O‘z so‘ziga sodiqdir.

²⁴Bir–birimizga e’tiborli bo‘lib, bir–birimizni mehr–muhabbatga va xayrli ishlarga chorlaylik.

²⁵Ba’zi odamlarga o‘xshab, yig‘ilishlarimizni qoldirmaylik. Aksincha, Rabbimiz Isoning keladigan kuni yaqinlashib qolganini bilib, bir–birimizni yanada ko‘proq ruhlantiraylik.

²⁶Agar biz haqiqatni bilib olgandan keyin, ataylab gunoh qilishda davom etsak, bu gunohlarimizni hech qanday qurbonlik yuva olmaydi.

²⁷Shunda qo‘rquv ichra Xudoning hukmini kutishdan boshqa ilojimiz qolmaydi. Oqibatda Xudoning dushmanlari bilan birga lovullagan olovda yonish bizning qismatimiz bo‘ladi.

²⁸Musoning Tavrotiga bo‘ysunishni rad etgan odam ikki yoki uch guvohning shahodati asosida shafqatsizlarcha o‘ldirilardi.

²⁹Shunday ekan, Xudoning O‘g‘lini oyoq osti qilgan odamni qanday jazo kutishini bir tasavvur qilib ko‘ringlar! Masihning ahd qoni bilan poklanib, so‘ng uni bulg‘agan odamning holi nima kechadi?! Xudoning inoyat Ruhini haqorat qilganning holi nima kechadi?!

³⁰Axir, biz quyidagi so‘zlarni aytgan Xudoni yaxshi bilamiz: “Men qasos olaman, jazosini beraman. Men O‘z xalqimni hukm etaman.”

³¹Ha, barhayot Xudoning qo‘liga tushib qolish naqadar dahshatlidir!

³²O‘tmishingizni eslanglar. O‘shanda sizlar Xudoning nurini ko‘rib, ko‘p azob–uqubatlarga bardosh bergan edingizlar.

³³Ba’zida sizlarni hammaning oldida haqoratlab, xor qilishardi. Boshqa paytlarda bunday ahvolda qolgan birodarlaringizga yon bosardingiz.

³⁴Qamoqda bo‘lganlarga hamdard bo‘lardingiz, mulkingiz musodara qilinganda buni xursandchilik bilan qabul qilardingiz, chunki sizlarda boqiy boylik borligini bilardingizlar.

³⁵Shunday ekan, oldingiday imonda qat’iyatli bo‘linglar! Shunda buyuk mukofot olasizlar.

³⁶Sabr–toqatli bo‘lib, Xudoning irodasini bajaringlar. Shunda Xudoning va’dasiga erishasizlar.

³⁷Axir, Muqaddas Bitiklarda yozilganday, hademay kelishi kerak bo‘lgan Zot keladi. U kech qolmaydi.

³⁸Xudoning solihlari Unga bo‘lgan sadoqati tufayli tirik qolishadi. Bordi–yu, birortasi imondan qaytsa, Xudo undan rozi bo‘lmaydi.

³⁹Biz esa imondan qaytib, halok bo‘ladigan odamlardan emasmiz. Biz imonimizga sodiq qolgan, najot topgan odamlarmiz.