Read O‘zbek tilidagi Muqaddas Kitob, 2013 Ibroniylarga 3 Bible Online

Ibroniylarga 3 - O‘zbek tilidagi Muqaddas Kitob, 2013 bible

Ibroniylarga 3

¹Ey birodarlarim, sizlar Xudoning aziz xalqisizlar. Xudo sizlarni O‘z huzuriga kirishga da’vat etgan. Kelinglar, Xudoning elchisi va biz e’tirof etgan e’tiqodimizning oliy ruhoniysi Iso haqida mulohaza qilaylik.

²Xudo Isoni Oliy ruhoniy qilib tayinladi. Muso Xudoning xonadonida sodiq xizmatkor bo‘lgani kabi, Iso ham Xudoga sodiq bo‘ldi.

³Biroq Iso Musodan ko‘ra ko‘proq ulug‘vorlikka loyiq bo‘ldi. Axir, uydan ko‘ra uni qurgan odam ko‘proq e’tiborga sazovor–ku!

⁴Albatta, har bir uyning quruvchisi bor, ammo aslida butun borliqning binokori — Xudo.

⁵Muso sodiq qul edi. U Xudoning butun xalqi orasida eng ishonchlisi bo‘lib, uning xizmati kelajakda oshkor bo‘ladigan ilohiy haqiqatning sharpasi edi, xolos.

⁶Masih esa sodiq O‘g‘il edi. Unga Xudoning xonadonini boshqarish topshirildi. Xudoning xonadoni esa bizmiz. Biz faqat jasur bo‘lib, umidimizni mahkam tutishimiz kerak. Axir, biz bu umidimiz bilan faxrlanamiz.

⁷Shunday ekan, Muqaddas Ruhning aytgan gaplarini yodingizda tuting: “Qaniydi bugun Mening ovozimga quloq solsangiz!

⁸Menga qarshi isyon qilgan otalaringizday tosh yurak bo‘lmanglar, Meni sahroda sinagan o‘sha ajdodlaringizday bo‘lmanglar.

⁹Otalaringiz qirq yil qilgan ishlarimni ko‘rsa ham, U yerda Meni sinab ko‘rdilar.

¹⁰Shu bois Men bu nasldan g‘azablanib, dedim: ‘Ular doim Mendan yuz o‘girishadi, Amrlarimga bo‘ysunishdan bosh tortishadi.’

¹¹Shuning uchun g‘azablanib, ont ichdim: ‘Ular farog‘at diyorimga kirmaydi’, dedim.”

¹²Ey birodarlarim, ehtiyot bo‘linglar! Yomon niyatga qalbingizdan o‘rin bermanglar, Xudoga bo‘lgan ishonchingizni yo‘qotmanglar. Aks holda bu illatlar sizlarni barhayot Xudodan qaytaradi.

¹³Har kunni Muqaddas Bitiklardagi “bugun” deb bilib, bir–biringizga nasihat qilinglar. Tag‘in birortangiz gunohga aldanib, yuragingizni tosh qilmanglar.

¹⁴Axir, biz Masihga sherik bo‘ldik. Faqat boshida ega bo‘lgan imonimizni oxirigacha mahkam tutishimiz lozim.

¹⁵Bir–biringizga Zaburdagi shu so‘zlarni eslatib turinglar: “Qaniydi bugun Mening ovozimga quloq solsangiz! Menga qarshi isyon qilgan otalaringizday tosh yurak bo‘lmanglar!”

¹⁶O‘shanda Xudoning ovozini eshitib turib, isyon qilgan kim edi? Muso Misrdan olib chiqqanlarning hammasi!

¹⁷Qirq yil davomida Xudo kimdan g‘azablangandi? Gunoh qilgan odamlardan! Ular hammasi o‘ldi, sahro ularga qabr bo‘ldi.

¹⁸Xudo ont ichib: “Ular farog‘at diyorimga kirmaydi”, deya kim haqida aytgan edi? Albatta bo‘ysunmagan odamlar haqida!

¹⁹Demak, ular Xudoga ishonmaganlari uchun farog‘at diyoriga kira olmadilar.