Read O‘zbek tilidagi Muqaddas Kitob, 2013 Ibroniylarga 4 Bible Online

Ibroniylarga 4 - O‘zbek tilidagi Muqaddas Kitob, 2013 bible

Ibroniylarga 4

¹Xudoning farog‘at diyoriga kirish haqidagi va’dasi hanuz kuchda qolgan. Shuning uchun ehtiyot bo‘laylik, tag‘in va’da qilingan farog‘at diyoriga kirishga nomunosib bo‘lib qolmaylik.

²Axir, farog‘at diyori haqidagi Xushxabar Isroil xalqiga sahroda e’lon qilinganday, bizga ham e’lon qilindi. Ammo ular bu Xushxabarni eshitsalar ham, uning qadriga yetmadilar. Ular bizga o‘xshab, bu xabarga quloq solganlarida edi, ishongan bo‘lar edilar.

³Biz bu xabarga ishonganimiz uchun farog‘at diyoriga kiramiz. Ishonmaganlar haqida esa Xudo shunday degandi: “Shuning uchun g‘azablanib, ont ichdim: ‘Ular farog‘at diyorimga kirmaydi.’” Holbuki, Xudo farog‘at diyorini dunyoni yaratganidayoq tayyorlab qo‘ygan.

⁴Chunki yaratilishning yettinchi kuni haqida Muqaddas Bitiklarda shunday deyilgan: “Yettinchi kuni Xudo hamma ishlarini bitirib, dam oldi.” Ammo ba’zi odamlar Xudoning farog‘at diyoriga kirmadilar.

⁵Yuqoridagi parchada aytilganday: “Ular farog‘at diyorimga kirmaydi.”

⁶Bundan anglashiladiki, farog‘at haqidagi Xushxabarni birinchi bo‘lib eshitganlar itoatsizligi uchun farog‘at diyoriga kirmaganlar. Ammo ba’zi kishilarga u yerga kirish uchun imkoniyat bor.

⁷Xudo o‘sha kishilarni ko‘zda tutib, “bugun” deb atalgan yana bir kunni tayin qildi. Ko‘p yillardan keyin U bu kun haqida Dovud orqali gapirdi. Xudoning bu gapini men oldin ham aytib o‘tganman: “Qaniydi bugun Mening ovozimga quloq solsangiz! Menga qarshi isyon qilgan otalaringizday tosh yurak bo‘lmanglar!”

⁸Agar Yoshua Isroil xalqini farog‘atga erishtirganda edi, o‘shandan keyin Xudo boshqa bir kun haqida gapirmagan bo‘lardi.

⁹Xullas, Xudoning xalqini Shabbat kuniga o‘xshagan farog‘at kutmoqda.

¹⁰Xudoning farog‘at diyoriga kirganlar Xudo kabi o‘z ishlaridan dam oladilar, chunki Xudo ham dunyoni yaratib bo‘lgandan keyin dam olgan edi.

¹¹Shunday ekan, farog‘at diyoriga kirishga jon kuydiraylik. Aks holda biz ham Isroil xalqiday itoatsizlik qilib, farog‘atdan bebahra qolamiz.

¹²Xudoning kalomi jonli va ta’sirli, har qanday dudama qilichdan o‘tkirroqdir. U jon bilan ruhni, bo‘g‘inlar bilan ilikni ajratgudek suqilib kiradi. Xudoning kalomi xayolu yurakning niyatlarini fosh etadi.

¹³Butun borliq Xudoning ko‘zi oldida yap–yalang‘och va ochiqdir. Hech kim va hech narsa Undan pinhon emas. Biz Unga hisob beramiz!

¹⁴Shunday ekan, o‘zimiz e’tirof etgan e’tiqodimizni mahkam tutaylik! Zotan bizning ulug‘ Oliy ruhoniyimiz bor. Xudoning samodagi huzuriga kirib borgan bu Oliy ruhoniyimiz Xudoning O‘g‘li Isodir.

¹⁵U zaifliklarimizga hamdard bo‘la oladi. Axir, U biz kabi har tomonlama sinalgan, lekin bizga o‘xshab gunoh qilmagan.

¹⁶Kelinglar, inoyatli Xudoyimizning taxtiga jasorat bilan yaqinlashaylik. Shunda U bizga marhamat ko‘rsatadi, Uning inoyati zarur vaqtda bizga yordam beradi.