Read O‘zbek tilidagi Muqaddas Kitob, 2013 Ibroniylarga 7 Bible Online

Ibroniylarga 7 - O‘zbek tilidagi Muqaddas Kitob, 2013 bible

Ibroniylarga 7

¹Maliksidiq — Salim shohi va Xudoyi Taoloning ruhoniysi edi. Ibrohim to‘rtta shohni mag‘lub etib, qaytib kelayotganda, Maliksidiq uni kutib olgani chiqib, duo qilgan edi.

²Ibrohim esa Maliksidiqqa olgan hamma o‘ljasining o‘ndan birini bergandi. Maliksidiq ismining ma’nosi “adolat shohi” demakdir. U yana “tinchlik shohidir”, chunki Salim “tinchlik” ma’nosini beradi.

³Uning na otasi, na onasi, na nasabnomasi bor. Hayotining boshi ham, oxiri ham yo‘q. U Xudoning O‘g‘li singari to abad ruhoniy bo‘lib qoladi.

⁴Maliksidiq qanchalik buyuk zot ekanligini bilib qo‘ying! Hatto ulug‘ ajdodimiz Ibrohim ham o‘ljasining o‘ndan birini unga bergandi.

⁵Levi naslidan bo‘lgan ruhoniylar esa Tavrotda buyurilishicha Isroil xalqidan, ya’ni o‘z birodarlaridan ushr yig‘ishlari kerak edi. Vaholanki, Isroil xalqining hammasi Ibrohimning avlodlaridir.

⁶Maliksidiq Levi naslidan bo‘lmasa–da, Ibrohimdan ushr oldi. So‘ng Ibrohimni — Xudoning va’dalarini olgan zotni duo qildi.

⁷Hammamizga ma’lumki, duo qilgan odam duo olgan odamdan ulug‘roqdir.

⁸Ushr yig‘adigan ruhoniylar foniy bandalar edi. Ibrohimdan ushr olgan Maliksidiq esa, Muqaddas Bitiklarda yozilishicha hanuz barhayotdir.

⁹Hatto aytishimiz mumkinki, ushr oluvchi levi ruhoniylari ham Ibrohim orqali Maliksidiqqa ushr bergandilar.

¹⁰Chunki Maliksidiq Ibrohimni kutib olganda, levi ruhoniylari hali bobokaloni Ibrohimning pushti kamarida edilar.

¹¹Levi ruhoniylari bizni barkamol qila olmaydilar. Shuning uchun Xudo Horunning nasabidan bo‘lgan ruhoniyni emas, balki Maliksidiqqa o‘xshagan boshqa bir ruhoniyni yubordi. Isroil xalqiga berilgan qonunlar levi ruhoniylari orqali joriy qilingan edi.

¹²Shunday ekan, Xudo yangi ruhoniylikni tashkil qilganda, yangi qonunlarni ham joriy qildi.

¹³[13-14] Buni biz aytib o‘tgan ruhoniy, ya’ni Rabbimiz Iso misolida aniq ko‘rishimiz mumkin. Biz bilamizki, Rabbimiz Iso Levi qabilasidan emas, balki Yahudo qabilasidan kelib chiqqan. Yahudo qabilasidan hech kim ruhoniy bo‘lib, qurbongohda xizmat qilmagan. Buning ustiga, Muso bu qabila haqida gapirganda ruhoniylikka doir biron ko‘rsatma bermagan.

¹⁵Yangi qonunlar joriy qilinganini yana shundan aniq ko‘rishimiz mumkin: Rabbimiz xuddi Maliksidiq kabidir.

¹⁶Uning ruhoniyligi bu foniy dunyoning talabiga, ya’ni nasl–nasabga doir qoidalarga asoslanmagan, balki Maliksidiqning ruhoniyligi singari cheksiz hayot qudratiga asoslangan.

¹⁷Zotan Muqaddas Bitiqda U haqda shunday yozilgan: “Sen Maliksidiq singari To abad ruhoniysan.”

¹⁸Demak, avvalgi qonun–qoidalar ojiz va samarasiz bo‘lgani uchun bekor qilindi.

¹⁹Chunki qonun biron–bir kishini kamolotga yetkaza olmagan. Endi qonun o‘rniga bizga a’loroq bir umid berildi, biz bu umid orqali Xudoga yaqinlasha olamiz.

²⁰[20-21] Bundan tashqari, Isoni Xudo Oliy ruhoniy qilib tayinlaganda ont ichgandi. Muqaddas Bitiklarda bu haqda shunday deyilgan: “Egamiz ont ichgan, qarorini o‘zgartirmas: ‘Sen to abad ruhoniysan.’” Ammo levi ruhoniylari tayinlanganda, Xudo biron marta ont ichmagan.

²²Demak, Xudo Iso orqali bizni a’loroq bir ahdga erishtirdi, Isoning O‘zi bunga kafildir.

²³Yana bir farq shundaki: levi ruhoniylarining soni ko‘p edi, chunki o‘lim ruhoniylarga xizmatlarini davom etishga monelik qilar edi.

²⁴Ammo Iso mangu bo‘lgani uchun, to abad ruhoniy bo‘lib xizmat qiladi.

²⁵Shuning uchun U O‘zi orqali Xudoga yaqinlashuvchilarga abadiy najot bera oladi. Axir, Iso doim barhayot bo‘lib, ular uchun Xudoga iltijo qiladi.

²⁶Bizga aynan shunday — muqaddas, beg‘ubor va pok Oliy ruhoniy kerak edi. Iso gunohkorlardan ayrilgan, osmondan ham yuqoriga ko‘tarilgan.

²⁷U boshqa oliy ruhoniylar kabi har kuni, oldin o‘z gunohlari uchun, keyin xalqning gunohlari uchun qurbonlik keltirishi kerak emas. Chunki U bir marta O‘zini qurbon qilib, xalqning gunohlari uchun keltiriladigan hamma qurbonliklarga chek qo‘ydi.

²⁸Tavrotga binoan oliy ruhoniylikka ojiz bandalar tayinlanardi. Ammo endi Xudoning ont ichib bergan va’dasiga binoan oliy ruhoniylikka barkamollikka erishgan va to abad barkamol qoladigan Xudoning O‘g‘li tayin etildi. Xudo buni ont ichib bergan va’dasiga ko‘ra amalga oshirdi.