Read O‘zbek tilidagi Muqaddas Kitob, 2013 Yoqub 5 Bible Online

Yoqub 5 - O‘zbek tilidagi Muqaddas Kitob, 2013 bible

Yoqub 5

¹Menga qaranglar, ey boylar, boshingizga tushadigan falokatlar uchun ho‘ngrab yig‘langlar!

²Boyligingiz chirib ketgan, kiyimingizni kuya yegan.

³Oltinu kumushlaringizni zang bosgan. Bu zang sizga qarshi guvoh bo‘ladi, u tufayli tanangiz Xudoning qahri olovida yonadi. Oxir zamon kelib qoldi, sizlar esa boylik to‘plash bilan ovorasizlar.

⁴Sizlar ekinlaringizni o‘rgan o‘roqchilarni aldab, ish haqini bermadingizlar. Ana, o‘sha pullar sizlardan norozi bo‘lib, nola qilmoqda! O‘roqchilarning dod–fig‘oni Sarvari Olamning qulog‘iga yetib bordi.

⁵[5-6] Sizlar qarshilik ko‘rsata olmagan aybsiz odamlarni qoralab, qatl qildingizlar. Bu dunyoda huzur–halovatda, maishatga berilib yashadingizlar. Bo‘rdoqilarday semirib ketdingiz! Mana, endi hukm kunida so‘yilishga tayyor bo‘lib qoldingiz!

⁷Ey birodarlarim, Rabbimiz Iso keladigan kunga qadar sabr–toqat qilinglar! Axir, dehqon ham dalasi mo‘l hosil yetishtirishini kutadi. U kuzgi va bahorgi yomg‘irni poylab, qancha sabr–toqat qiladi!

⁸Sizlar ham sabr qilinglar. Dadil bo‘linglar, chunki Rabbimizning keladigan kuni yaqinlashib qoldi.

⁹Birodarlarim, mahkum bo‘lmasligingiz uchun bir–biringizdan shikoyat qilmanglar. Mana, hukm qiluvchi Rabbimiz Iso ostonada turibdi!

¹⁰Ey birodarlarim, payg‘ambarlardan o‘rnak olinglar! Ular Egamizning nomidan gapirib, azob–uqubatlarga dosh berganlar.

¹¹Darhaqiqat, sabr qilgan bunday odamlarni biz baxtli deb hisoblaymiz. Ayubning sabr–toqati haqida eshitgansizlar, oxirida Egamiz unga qanchalar baraka berganini bilasizlar. Ha, Egamiz rahmdil va mehr–shafqatlidir.

¹²Ey birodarlarim, eng avvalo, qasamxo‘r bo‘lmanglar! Lafzi yo‘q inson kabi, bo‘lar–bo‘lmasga osmon haqi, yer haqi va boshqa narsa haqi, deb qasam ichavermanglar. Javobingiz “ha” yoki “yo‘q” bo‘lsin. Shunda Xudo sizlarni hukm qilmaydi.

¹³Orangizda azob–uqubat chekayotgan bironta odam bormi? Agar bo‘lsa, ibodat qilsin. Xursand bo‘lgani bormi? Xudoga hamdu sanolar kuylasin.

¹⁴Orangizda kasal bo‘lgan bormi? Jamoat oqsoqollarini chaqirtirsin. Ular ibodat qilib, Rabbimiz Iso nomi bilan bemorning boshiga zaytun moyini surtsinlar.

¹⁵Imon bilan qilingan ibodat bemorni sog‘aytiradi, Rabbimizning O‘zi unga shifo beradi. Agar bemor gunoh qilgan bo‘lsa, Rabbimiz uni kechiradi.

¹⁶Shuning uchun qilgan gunohlaringizni bir–biringiz oldida tan olinglar, bir–biringiz uchun ibodat qilinglar, shifo topasizlar. Solih odamning iltijosi kuchli ta’sirga egadir!

¹⁷Ilyos ham bizga o‘xshagan oddiy bir inson edi. Yomg‘ir yog‘masin, deb u astoydil iltijo qildi va yer yuziga uch yilu olti oy yomg‘ir yog‘madi.

¹⁸So‘ng u yomg‘ir yog‘sin, deb ibodat qildi, osmondan yomg‘ir yog‘ib, yer hosil berdi.

¹⁹Ey birodarlarim, agar orangizdagi birorta kishi haq yo‘ldan ozgan bo‘lsa, uni to‘g‘ri yo‘lga soling.

²⁰Esingizda bo‘lsin, gunohkorni nohaq yo‘ldan qaytargan odam o‘sha gunohkorning najot topishiga va behisob gunohlarining yuvilishiga sababchi bo‘ladi.