Read O‘zbek tilidagi Muqaddas Kitob, 2013 1 Butrus 2 Bible Online

1 Butrus 2 - O‘zbek tilidagi Muqaddas Kitob, 2013 bible

1 Butrus 2

¹Endi har qanday yomon niyat, hiyla–nayrang, ikkiyuzlamachilik, rashk–hasad va g‘iybatni o‘zingizdan soqit qilinglar.

²Yangi tug‘ilgan chaqaloq sof ona sutini tusaganday, sizlar ham Xudo kalomiga tashna bo‘linglar. Kalom bilan oziqlanib, ulg‘ayib, najotga erishinglar.

³Axir, sizlar Rabbimiz Isoning muruvvatidan bahramand bo‘ldingizlar.

⁴Insonlar rad etgan, lekin Xudo qimmatbaho deb tanlagan tirik Tosh — Rabbimiz Isoga yaqinlashinglar.

⁵Shunda o‘zlaringiz ham tirik toshlarday bo‘lasizlar. Xudo sizlardan ruhiy ma’bad barpo etadi. Sizlar muqaddas ruhoniylar bo‘lib xizmat qilasizlar va Iso Masih orqali Xudoga maqbul ruhiy qurbonliklar keltirasizlar.

⁶Zero, Muqaddas Bitiklarda Xudo shunday degan: “Mana, Men joylashtiryapman Quddusda, Tanlangan, qimmatbaho tamal Toshini. Unga ishonganlar aslo uyatga qolmas.”

⁷Siz — Masihga ishonganlar uchun bu Tosh qimmatbahodir. Ammo ishonmaganlarga Muqaddas Bitiklardagi shu so‘zlar to‘g‘ri keladi: “Binokorlar rad etgan tosh Binoning tamal toshi bo‘ldi. Ba’zilar bu toshga qoqinadi,

⁸Uning dastidan yiqiladi.” Imonsizlar Xushxabarga quloq solmaganlari uchun, qoqinadilar. Ular ana shu qismatga mahkum bo‘lganlar.

⁹Ammo sizlar — Shohanshoh ruhoniylari, tanlangan bir nasl, muqaddas qavm, Xudoning aziz xalqisiz. Xudo sizlarni zulmatdan O‘zining ajoyib nuriga da’vat etgan, Uning buyuk ishlarini e’lon qilishingiz uchun sizlarni tanlagan.

¹⁰Sizlar bir vaqtlar Xudoga begona edingizlar, endi esa Uning xalqisizlar. Bir vaqtlar Xudoning marhamatidan bebahra edingizlar, endi esa Undan marhamat topdingizlar.

¹¹Ey azizlarim, sizlardan o‘tinib so‘rayman, jonga qarshi kurashadigan nafs ehtiroslaridan saqlaninglar. Axir, sizlar bu dunyoda g‘aribu musofirsizlar.

¹²Imonsizlar orasida Xudoga munosib hayot kechiringlar. Ular sizlarni yomonlikda ayblasalar–da, ezgu ishlaringizni ko‘rib, kim bilsin, balki tavba qilishar va qiyomat kuni Xudoni ulug‘lashar.

¹³Insonlar tomonidan o‘rnatilgan har qanday hokimiyatga, Egamiz haqi–hurmati, bo‘ysuninglar. Oliy hokim bo‘lgan shohga ham,

¹⁴u tayinlagan hokimlarga ham itoat qilinglar. Zero, hokimlar yomonlik qilganlarni jazolash uchun, yaxshilik qilganlarni esa taqdirlash uchun tayinlangan.

¹⁵Siz haqiqatni bilmagan nodon odamlarning og‘izlarini qilgan yaxshiligingiz orqali yopinglar, chunki bu Xudoning xohishidir.

¹⁶Ozod odamlardek yashanglar, ammo ozodlik niqobi ostida yomonlik qilmanglar. Xudoning qullariday hayot kechiringlar.

¹⁷Hamma odamlarni hurmat qilinglar. Imonli birodarlaringizni yaxshi ko‘ringlar. Xudodan qo‘rqinglar, davlat rahbariga izzat–ehtirom ko‘rsatinglar.

¹⁸Ey qullar, Xudodan qo‘rqqaningiz uchun xo‘jayinlarga itoat qilinglar. Nafaqat mehribon va muloyim xo‘jayinlarga, balki qattiqqo‘llariga ham bo‘ysuninglar.

¹⁹Agar sizlar Xudoni mamnun qilmoqchi bo‘lib, to‘g‘ri ish qilsangiz–u, nohaq azoblarga chidasangiz, Xudoni rozi qilgan bo‘lasiz.

²⁰Bordi–yu qilgan gunohingiz uchun tayoq yeb chidasangiz, bu sizga sharaf keltirarmidi?! Ammo yaxshilik qilib turib, nohaq azoblarga chidasangiz, Xudoning maqtoviga sazovor bo‘lasiz.

²¹Hatto azob chekkaningizda ham Xudo sizlarni yaxshilik qilishga da’vat etgan. Masih sizlar uchun azob chekib, namuna bo‘ldi. Unga taqlid qilinglar. Axir,

²²U hech qanday gunoh qilmagan, og‘zidan biron yolg‘on so‘z chiqmagan.

²³U haqorat qilinganda hech kimga haqorat bilan javob qaytarmadi, azob chekkanda hech kimga tahdid qilmadi. Faqat odilona hukm qiladigan Xudoga O‘zini topshirdi.

²⁴U gunohlarimizni O‘ziga oldi, a’zoi badani xochda azob chekdi. Shu tufayli biz gunoh uchun o‘lganmiz va solih hayot kechira olamiz. Uning yaralaridan biz shifo topdik.

²⁵Ilgari sizlar adashib yurgan cho‘ponsiz qo‘ylarga o‘xshar edingizlar, endi esa jonlaringizning Posboni bo‘lgan Cho‘ponga qaytib keldingizlar.