Read O‘zbek tilidagi Muqaddas Kitob, 2013 Hakamlar 10 Bible Online

Hakamlar 10 - O‘zbek tilidagi Muqaddas Kitob, 2013 bible

Hakamlar 10

¹Abumalekning o‘limidan so‘ng Puvax o‘g‘li To‘lo Isroil xalqini dushmanlardan ozod qildi. U Issaxor qabilasidan bo‘lgan Do‘do‘ning nabirasi bo‘lib, Efrayim qirlaridagi Shomir shahrida istiqomat qilardi.

²U Isroil xalqiga yigirma uch yil davomida hakam [1] bo‘lib xizmat qildi. So‘ngra olamdan ko‘z yumib, Shomirda dafn qilindi.

³Undan keyin Giladlik Yovir hakam bo‘ldi. U yigirma ikki yil davomida Isroilga rahnamolik qildi.

⁴Uning o‘ttizta o‘g‘li bor edi. Ular o‘ttizta eshakni minishar va Gilad o‘lkasidagi o‘ttizta shaharga egalik qilishardi [2]. Bu shaharlar bugunga qadar [3] Yovir qishloqlari [4], deb atalmoqda.

⁵Yovir olamdan o‘tib, Kamonda dafn qilindi.

⁶Isroil xalqi yana Egamizning oldida qabihliklar qilib, Baal va Ashtaretning tasvirlariga sig‘inish bilan bir qatorda, Oram, Sidon, Mo‘ab, Ommon va Filist xalqlarining xudolariga sajda qildi. Egamizdan yuz o‘girib, Unga sajda qilmay qo‘ydi.

⁷Bundan nihoyatda g‘azablangan Egamiz Isroil xalqini Filist va Ommon xalqlarining qo‘liga berdi.

⁸O‘sha yili ular Isroil xalqiga zulm qilib, rosa ezdilar. Iordanning sharqida, ya’ni Gilad hududida istiqomat qilgan Isroil xalqiga ular o‘n sakkiz yil davomida zulmini o‘tkazib keldilar. Ilgarilari bu yerlar Amor xalqiga tegishli edi.

⁹Shunisi yetmaganday, Ommon xalqi Yahudo, Benyamin va Efrayim qabilalariga ham hujum qilmoqchi bo‘lib, Iordan daryosining narigi qirg‘og‘iga o‘tib olgan edi. Bundan qattiq tashvishga tushgan

¹⁰Isroil xalqi: — Biz gunoh qildik! — deya Egamizga faryod qildi. — Biz o‘z Xudoyimizdan yuz o‘girib, Baalning tasvirlariga sig‘indik.

¹¹Egamiz esa ularga shunday dedi: — Men sizlarni Misr, Amor, Ommon va Filist xalqlarining zulmidan qutqardim.

¹²Sidonliklar, Omolek va Moyun [5] xalqlarining jabru zulmidan nolib, Menga yolvorganingizda, sizlarga najot berdim.

¹³Shunga qaramay, sizlar Mendan yuz o‘girib, boshqa xudolarga sig‘indingizlar. Bo‘ldi, yetar! Endi sizlarni qutqarmayman!

¹⁴Borib, o‘zlaringiz tanlab olgan xudolaringizga iltijo qilinglar. Qiynalganingizda ular sizlarga najot berishsin.

¹⁵— Biz gunoh qildik! Bizga xohlaganingni qil, ammo bugun bizni dushmanlarimizdan qutqargin, — deya o‘tindi Isroil xalqi.

¹⁶Shunday qilib, ular begona xudolarning tasvirlarini yo‘q qilib, Egamizga sajda qildilar. Isroil xalqining chekkan azob–uqubatlarini ko‘rgan Egamiz ularga nihoyatda achindi.

¹⁷Ommon xalqi odamlarini jangga safarbar qilib, qarorgohini Gilad hududida joylashtirdi. Isroil xalqi esa to‘planib, qarorgohini Mispaxda [6] joylashtirdi.

¹⁸Isroil qabilalarining rahnamolari: “Ommon xalqiga kim birinchi bo‘lib hujum qilar ekan?” — deya bir–birlariga qarab olishdi. So‘ng: “Jangni boshqargan odam Giladga hokim bo‘ladi”, — degan qarorga kelishdi.