Read O‘zbek tilidagi Muqaddas Kitob, 2013 Hakamlar 11 Bible Online

Hakamlar 11 - O‘zbek tilidagi Muqaddas Kitob, 2013 bible

Hakamlar 11

¹Giladlik Yiftox dovyurak jangchi edi. Uning otasi Gilad, onasi esa fohisha bir ayol edi.

²Giladning o‘z xotinidan tug‘ilgan o‘g‘illari ham bor edi. Ular ulg‘aygach, Yiftoxga: “Otamizdan qolgan merosga sening hech qanday haqing yo‘q! Bor, yo‘qol! Sen boshqa ayolning bolasisan”, — deya haydagan edilar.

³Yiftox aka–ukalaridan qochib, Tov yurtiga borgan edi. O‘sha yerda o‘rnashib olganidan so‘ng, atrofiga yaramas odamlarni to‘plab, bosqinchilik qila boshlagan edi.

⁴Oradan ma’lum vaqt o‘tgach, Ommon xalqi Isroil xalqiga hujum qildi.

⁵Ommon xalqi Isroil xalqiga hujum qilganda, Gilad oqsoqollari Yiftoxni olib kelgani Tov yurtiga jo‘nadilar.

⁶Ular Yiftoxga: — Biz bilan yuraqol, — dedilar. — Ommon xalqi bilan jang qilganimizda bizga rahnamolik qilgin.

⁷— Sizlar meni mensimay otamning uyidan haydagan edingiz–ku! — deya zarda qildi ularga Yiftox, — Nima uchun endi boshingizga kulfat tushganda mening oldimga keldingizlar?

⁸— Bo‘lar ish bo‘ldi endi, — deyishdi Gilad oqsoqollari. — Biz sening oldingga bosh egib keldik, biz bilan borib Ommon xalqiga qarshi jang qil, Giladliklarga o‘zing bosh bo‘l.

⁹Yiftox Gilad oqsoqollariga shunday dedi: — Xo‘p mayli, sizlarga qo‘shilib, Ommon xalqiga qarshi jang qildim ham deylik. Bordi–yu, Egam dushmanlarni qo‘limga bersa, men sizlarga hukmronlik qilaman.

¹⁰Gilad oqsoqollari esa Yiftoxni ishontirib: — Xudo shohid, hammasi aytganingday bo‘ladi, — dedilar.

¹¹Yiftox Gilad oqsoqollari bilan ketdi. Xalq uni hokim va lashkarboshi qilib tayinladi. Yiftox esa Mispaxda [1]Egamizning huzurida qo‘ygan shartlarini qayd qildi.

¹²Yiftox Ommon shohiga choparlarni yuborib dedi: “Oramizda nima bo‘lib o‘tgan ediki, sen mening yurtimga jang qilib kelding?”

¹³Ommon shohi Yiftox choparlariga shunday javob berdi: “Isroil xalqi Misrdan chiqib kelganda, janubdagi Arnon soyligidan to shimoldagi Yavoq daryosigacha va g‘arbdagi Iordan daryosigacha bo‘lgan hamma yerlarimni tortib olgan edi. Borib Yiftoxga aytinglar, yerlarimni menga tinchgina qaytarib bersin.”

¹⁴Yiftox yana choparlarini Ommon shohiga yuborib

¹⁵dedi: “Isroil xalqi na Mo‘ab, na Ommon yerlarini tortib olgan.

¹⁶Ular Misrdan chiqqandan keyin, Qizil dengiz [2] tomon sahrodan yurib Kadeshga [3] kelgan edilar.

¹⁷Shunda Edom shohi huzuriga elchilar jo‘natib, Edom yurti orqali o‘tib ketishga ijozat so‘radilar. Ammo Edom shohi quloq solmadi. Ular Mo‘ab shohidan ham ijozat so‘radilar, biroq u ham rozi bo‘lmagandan keyin, Kadeshda qoldilar.

¹⁸Keyin ular sahroga yo‘l olib, Edom va Mo‘ab yurtlarini aylanib o‘tdilar. Mo‘ab hududining sharqiy chegarasi bo‘ylab yurib, qarorgohni Arnon soyligining narigi qirg‘og‘ida qurdilar. Arnon soyligi Mo‘abning chegarasi bo‘lgani uchun, ular daryodan o‘tmadilar, Mo‘ab yurtiga oyoqlarini ham bosmadilar.

¹⁹So‘ng elchilarini Xashbonda hukmronlik qilgan Amor xalqining shohi Sixo‘n oldiga yuborib, hududingizdan yurtimizga o‘tib ketaylik, deb ijozat so‘radilar.

²⁰Ammo shoh Sixo‘n rozi bo‘lmadi. U barcha odamlarini yig‘di–da, qarorgohini Yaxazda joylashtirib, Isroil xalqiga hujum qildi.

²¹Ammo Isroil xalqining Xudosi — Egamiz Sixo‘nni barcha odamlari bilan Isroil xalqining qo‘liga berdi. Shuning uchun Isroil xalqi o‘sha yurtda istiqomat qilgan Amor xalqining barcha yerlarini qo‘lga kiritdi.

²²Ular Arnondan Yavoqqacha, sahrodan Iordangacha bo‘lgan Amor xalqining barcha yerlariga ega bo‘ldilar.

²³Isroil xalqining Xudosi — Egamizning O‘zi bu yerlarni Amor xalqidan tortib olib, xalqi Isroilga berdi. Shunday ekan, ularni qaytarib olishga sening hech qanday haqing yo‘q.

²⁴Undan ko‘ra, xudoying Xamo‘sh [4] bergan narsalarga egalik qil! Biz esa Egamiz Xudo bizga bergan hamma narsaga egalik qilamiz!

²⁵Nima, sening Zippur o‘g‘li Boloqdan ortiq joying bormidi?! [5] U Mo‘ab shohi bo‘la turib, Isroil xalqi bilan biron marta ham tortishgan emas. Biron marta ham bizga qarshi jang qilgan emas.

²⁶Isroil xalqi uch yuz yildan beri Arnon soyligining bo‘yidagi shaharlarda, Xashbon, Aror va ularning atrofidagi qishloqlarda yashab kelmoqda. Nima uchun shu paytgacha o‘sha yerlarni qaytarib olmading?!

²⁷Men senga hech qanday yomonlik qilmadim, sen esa menga qarshi jang qilmoqchi bo‘lib noto‘g‘ri ish qilyapsan. Xudo qozi, Uning o‘zi bugun kim haq, kim nohaq ekanini ko‘rsatsin.”

²⁸Ammo Ommon shohi Yiftoxning so‘zlarini eshitishni ham xohlamadi.

²⁹Egamizning Ruhi Yiftoxni qamrab oldi. Yiftox Gilad va Manashe yerlaridan o‘tib, Giladdagi Mispax shahriga yetib bordi. U yerdan yo‘lida davom etib, Ommon yurti tomon yurdi.

³⁰So‘ng qasam ichib, Egamizga dedi: “Agar jangda Ommon xalqini yengishimga yordam bersang,

³¹uyimga eson–omon qaytib borganimdan so‘ng meni qarshilab chiqqan birinchi tirik jonni Senga qurbonlik qilib kuydiraman.”

³²Yiftox lashkari bilan Ommon xalqining ustiga bostirib borib, jang qildi. Egamiz Ommon xalqini Yiftoxga taslim qildi.

³³Yiftox Arordan Minnit atrofigacha bo‘lgan yigirmata shaharni va Ovil–Karomgacha bo‘lgan barcha qishloqlarni vayron qildi. Katta talafot ko‘rgan Ommon xalqi Isroil xalqiga bo‘ysundi.

³⁴Yiftox Mispaxdagi o‘z uyiga qaytib kelganda, qizi childirma chalib o‘ynaganicha, uni qarshilab chiqdi. Bu qiz uning yolg‘iz farzandi edi.

³⁵Yiftox uni ko‘rgach, qayg‘u–alamdan kiyimlarini yirtib: — Voy qizim! Nima qilib qo‘yding?! — dedi. — Yurak–bag‘rimni qon qilding–ku! Men Egamizga qasam ichgan edim, endi so‘zimni qaytib ololmayman!

³⁶— Otajon, — dedi qizi, — Egamizga so‘z bergan bo‘lsangiz, zinhor so‘zingizdan qaytmang, chunki Egamiz sizga dushmaningiz — Ommon xalqi ustidan g‘alaba berdi.

³⁷Mening esa birgina tilagim bor. Menga ikki oy muhlat bersangiz, men dugonalarim bilan toqqa chiqib, u yerda yoshligim xazon bo‘lganidan qayg‘uray. Chunki men endi hech qachon turmushga chiqmayman.

³⁸Yiftox unga ijozat berib, ikki oyga toqqa jo‘natib yubordi. Qiz dugonalari bilan toqqa chiqib, qayg‘urib yig‘ladi.

³⁹Ikki oy o‘tgach, otasining yoniga qaytib keldi. Yiftox Egamizga bergan va’dasiga vafo qoldi. Qiz bokira edi. Shundan keyin Isroilda bir odat paydo bo‘ldi:

⁴⁰har yili Isroil qizlari tog‘larga chiqib, to‘rt kun davomida Giladlik Yiftoxning qizi uchun motam tutadigan bo‘lishdi.