Read O‘zbek tilidagi Muqaddas Kitob, 2013 Hakamlar 13 Bible Online

Hakamlar 13 - O‘zbek tilidagi Muqaddas Kitob, 2013 bible

Hakamlar 13

¹Isroil xalqi yana Egamizning oldida qabih ishlar qilgani uchun, Egamiz ularni qirq yilga Filist xalqining qo‘liga berdi.

²O‘sha zamonda Zoroxlik bir odam bor edi. U Dan qabilasidan [1] bo‘lib, uning ismi Monuvax edi. Uning xotini bepusht bo‘lib, farzandi yo‘q edi.

³Bir kuni Egamizning farishtasi ayolga zohir bo‘lib shunday dedi: “Sen shu paytgacha bola ko‘rishga ojiz eding, ammo ko‘p o‘tmay sen homilador bo‘lib, o‘g‘il tug‘asan.

⁴Sharob va o‘tkir ichimliklarni endi icha ko‘rma, harom narsani ham yema,

⁵chunki sen homilador bo‘lib, o‘g‘il ko‘rasan. Bola tug‘ilishi bilanoq Xudoga nazr qilingay [2], shuning uchun bolaning boshiga ustara tegmasin. Isroilni Filistlarning qo‘lidan ozod qilishni boshlaydigan o‘shadir.”

⁶Keyin ayol erining oldiga borib dedi: “Oldimga Xudoning bir odami keldi, uning ko‘rinishi xuddi Xudoning farishtasiga o‘xshagan juda qo‘rqinchli edi. Uning qayerdan kelganini so‘ramabman. O‘zi ham menga ismini aytmadi.

⁷Uning gapiga qaraganda, men homilador bo‘lib, o‘g‘il ko‘rar ekanman. Bola tug‘ilishi bilanoq bir umrga Xudoga nazr qilinar ekan, shuning uchun men sharobni ham, o‘tkir ichimlikni ham, harom narsani ham og‘zimga olishim mumkin emas ekan.”

⁸“Yo, Rabbiy, — deya Egamizga yolvordi Monuvax. — O‘sha odamingni yana oldimizga yuborishingni iltijo qilib so‘rayman. U kelib, bo‘lajak o‘g‘limizga nima qilishimiz kerakligini o‘rgatib ketsin.”

⁹Monuvaxning ibodati ijobat bo‘ldi. Ayol dalada o‘tirgan bir paytda Xudoning farishtasi yana ayolning oldiga keldi. Ammo o‘sha paytda Monuvax u yerda yo‘q edi.

¹⁰Ayol shoshib–pishib erining oldiga yugurdi–da: “Tunov kun oldimga kelgan odam yana menga zohir bo‘ldi!” — deb aytdi.

¹¹Monuvax turib xotiniga ergashdi. O‘sha odamning oldiga kelib: — Bu ayolga gapirgan sizmidingiz? — deb so‘radi. — Ha, men edim, — deya javob berdi u.

¹²— Aytganlaringiz amalga oshganidan so‘ng, bola qay tarzda yashashi kerak? U nima ish qiladi? — deb so‘radi Monuvax.

¹³Egamizning farishtasi Monuvaxga shunday deb javob berdi: — Xotining aytganlarimning hammasini so‘zsiz bajarsin.

¹⁴Uzumdan tayyorlangan bironta narsani ham og‘ziga olmasin. Sharob va o‘tkir ichimliklarni ichmasin, hech qanday harom narsa yemasin. Aytganlarimning hammasiga rioya qilsin.

¹⁵Monuvax Egamizning farishtasiga: — Biroz kutib tursangiz, sizga bir uloqcha tayyorlab bersam, — dedi.

¹⁶— Kutganim bilan, baribir, taomingni yemayman, — dedi Egamizning farishtasi. — Lekin uloqchani kuydiriladigan qurbonlik qilmoqchi bo‘lsang, uni Egamizga baxshida et. Monuvax u Egamizning farishtasi ekanligini bilmagandi.

¹⁷Keyin Monuvax Egamizning farishtasiga: — Bizga ismingizni ayting. Toki aytganlaringiz ro‘yobga chiqqanda, sizni duo qilib yuraylik, — dedi.

¹⁸Egamizning farishtasi esa: — Nega ismimni so‘rayapsan? Aytganim bilan baribir unga aqling yetmaydi, — dedi.

¹⁹Monuvax Egamizga atab, uloqchani katta bir toshning ustida qurbonlik qilib kuydirdi, unga qo‘shib don nazri ham kuydirdi. Shu onda Monuvax va uning xotini oldida Egamiz ajoyib bir mo‘jiza yaratdi:

²⁰qurbongoh alangasi osmonga chirmashayotgan edi. Egamizning farishtasi ham alangaga qo‘shilib yuqoriga ko‘tarilib ketdi. Buni ko‘rgan Monuvax bilan xotini yerga muk tushishdi.

²¹Farishta ko‘zdan g‘oyib bo‘ldi–yu, boshqa ularga ko‘rinmadi. Shundan keyin Monuvax o‘sha odam Egamizning farishtasi ekanligini angladi.

²²Monuvax xotiniga: — Biz o‘lamiz, chunki biz Xudoni ko‘rdik! [3] — dedi.

²³— Agar Egamiz bizni o‘ldirmoqchi bo‘lganda, don nazri va qurbonligimizni qabul qilmagan bo‘lardi, — dedi xotini. — Bu mo‘jizalarni bizga ko‘rsatib, bunday narsalarni aytib o‘tirmagan bo‘lardi.

²⁴Ayol o‘g‘il ko‘rdi, uning ismini Shimsho‘n qo‘ydi. Bola katta bo‘ldi, Egamiz esa uni yorlaqadi.

²⁵Shimsho‘n Zorox bilan Eshtoyo‘l shaharlari [4] orasidagi Dan qabilasining qarorgohida [5] bo‘lganda, Egamizning Ruhi uni boshqara boshladi.