Read O‘zbek tilidagi Muqaddas Kitob, 2013 Hakamlar 18 Bible Online

Hakamlar 18 - O‘zbek tilidagi Muqaddas Kitob, 2013 bible

Hakamlar 18

¹Bu voqealar sodir bo‘lgan davrda Isroilda shoh yo‘q edi. Dan qabilasi Isroil qabilalari orasida o‘ziga ulush bo‘lib tushgan yerni hanuz qo‘lga kiritmagani sababli istiqomat qilish uchun joy qidirib yurgan edi.

²Bir kuni ular o‘z qabilasining jamiki urug‘lari orasidan beshta jangchini tanlab: “Boringlar, yurtni sinchiklab tekshirib chiqinglar”, — deya ularni Zorox va Eshtoyo‘l shaharlaridan [1] jo‘natib yubordilar. Bu odamlar yo‘l yurib Efrayim qirlaridagi Mixoning uyiga kelib qolishdi va tunni o‘sha yerda o‘tkazishdi.

³Ular Mixoning uyida bo‘lganlarida yosh levini [2] shevasidan tanib qolishdi–da, uning oldiga borib: — Bu yerga qanday qilib kelib qolding? Bu yerda nima qilib yuribsan? — deb so‘rashdi.

⁴U javob berib: “Mixo meni ishga oldi, ruhoniy qilib tayinladi”, — dedi. Mixo unga qilgan hamma yaxshiliklarini aytib berdi.

⁵Shunda ular leviga: — Xudoga iltijo qilib, ishimiz o‘ngidan kelish–kelmasligini bilib ber, — dedilar.

⁶— Hech narsadan xavotirlanmanglar. Egamizning o‘zi sizlarga bu ishda madadkordir, — dedi ruhoniy.

⁷Beshala odam yo‘lga ravona bo‘ldi. Ular Layish shahriga kelib, u yerda Sidon [3] aholisi kabi muloyim, xotirjam va tinch–totuv yashayotgan odamlarni ko‘rishdi. Bundan tashqari, atrofdagi xalqlardan birontasi o‘sha xalqqa xavf solmagan, yurtiga tajovuz qilmagandi. Ular Sidondan ancha uzoqda bo‘lib, atrofdagi shaharlar bilan [4] hech qanday aloqa o‘rnatmagan edilar.

⁸Beshala odam Zorox bilan Eshtoyo‘lga — o‘z urug‘–aymoqlarining oldiga qaytib borishdi. — Bizga qanday xabar olib keldingizlar? — deb so‘radi ulardan qarindosh–urug‘lari.

⁹Ular shunday javob berishdi: — Kelinglar, Layishga hujum qilaylik! Biz ko‘rgan yurt nihoyatda yaxshi ekan. Nimaga qaqqayib turibsizlar?! Bo‘linglar, o‘sha yerga borib yurtni qo‘lga kiritaylik.

¹⁰U yerga borganlaringda, xotirjam yashayotgan odamlarga duch kelasizlar. Barcha narsaga mo‘l va keng bu yerni Xudo chindan ham qo‘lingizga beryapti.

¹¹Dan qabilasining olti yuzta odami jang aslahalari bilan qurollanib, Zorox bilan Eshtoyo‘ldan safarga otlanishdi.

¹²Ular yo‘l yurib, o‘z qarorgohini Yahudodagi Xirat–Yorim shahrining g‘arb tomonida qurishdi. Shuning uchun o‘sha joy bugunga qadar [5] Dan qarorgohi [6], deb ataladi.

¹³U yerdan ular Efrayim qirlari tomon yo‘l olib, Mixoning uyiga yaqinlashib qolishdi.

¹⁴Shunda yurtni, aniqrog‘i, Layish shahrining atroflarini ko‘rib chiqqan beshta odam birodarlariga deyishdi: “Bu xonadonlarning birida ruhoniylar libosi [7], xonaki sanamlar [8] va but borligidan xabarlaring bormi? Nima qilishimiz kerakligini yaxshi o‘ylab ko‘ringlar.”

¹⁵Ular yosh levi turadigan Mixoning uyiga borib, levidan hol–ahvol so‘radilar.

¹⁶Olti yuzta qurollangan Dan qo‘shini darvozaning yonida turgan edi.

¹⁷Ayg‘oqchilik qilgan beshta odam to‘ppa–to‘g‘ri ichkariga bostirib kirib, ruhoniylar libosi, xonaki sanamlar va kumush bilan qoplangan butni olmoqchi bo‘ldilar. Levi esa qurollangan olti yuzta odam bilan darvoza yonida qolgan edi.

¹⁸Ayg‘oqchilar Mixoning uyiga kirib, ruhoniylar libosi, xonaki sanamlar va butni olganlarini ko‘rgan levi ularga: — Bu nima qilganlaring? — dedi.

¹⁹— Jim bo‘l! — deb do‘q qildi ular. — Ovozingni o‘chirib biz bilan yur. Bizga maslahatchi va ruhoniy bo‘l. O‘zing o‘ylab ko‘r, sen bittagina xonadonga ruhoniy bo‘lganing yaxshimi yoki Isroilning butun bir qabilasigami?

²⁰Ruhoniyga bu taklif ma’qul keldi. U ruhoniylar libosi, xonaki sanamlar va kumush bilan qoplangan butni olib, Dan odamlari bilan ketdi.

²¹Dan odamlari bola–chaqalarini, chorvayu mol–mulkini oldinga o‘tkazib, safarlarini davom ettirishdi.

²²Ular Mixoning uyidan ancha uzoqlashib qolganlarida, Mixo qo‘ni–qo‘shnilarini to‘pladi–da, Dan odamlarining ketidan quvib ketdi.

²³So‘ng ovozi boricha baqirib, Dan odamlarini chaqirdi. Ular esa orqaga o‘girilib Mixoga: — Tinchlikmi?! Shuncha odamni yetaklab kelibsan?! — dedilar.

²⁴— Sizlar men yasatgan xudolar bilan ruhoniyimni olib ketib, meni ship–shiydam qildingiz–ku. Yana: “Tinchlikmi?” deganingiz nimasi?! — deya javob berdi Mixo.

²⁵— Ovozingni o‘chir, — dedi unga Dan odamlari. — Bo‘lmasa, qoni qaynagan birodarlarimiz jag‘ingni ezib, o‘zingni ham, uyingdagilarni ham yo‘q qilib yuborishadi.

²⁶Dan odamlari yo‘ldan qolmadilar. Mixo esa ularga bas kelolmasligini ko‘rib, uyiga qaytib ketdi.

²⁷Dan qabilasi Mixo yasattirgan narsalarni va uning xizmatida bo‘lgan ruhoniyni Layishga olib bordilar. Ular Layishda tinch va xotirjam yashayotgan odamlarni qilichdan o‘tkazib, shaharga o‘t qo‘ydilar.

²⁸Layish aholisiga najot beradigan hech kim yo‘q edi, chunki Layish Sidondan juda uzoqda bo‘lib, yaqin atrofidagi shaharlar bilan esa hech qanday aloqa o‘rnatmagan edi. Layish Bayt–Rexob shahri bilan bir vodiyda joylashgan edi. Dan qabilasi shaharni tiklab, u yerda o‘rnashib oldi.

²⁹Shaharni esa ota–bobosi Yoqub [9] o‘g‘li Danning nomi bilan atadi. Dan shahrining eski nomi Layish edi.

³⁰Dan qabilasi o‘zi uchun Mixodan tortib olgan, kumush bilan qoplangan butni o‘rnatdi. Gershom o‘g‘li Yo‘natan esa ularga ruhoniy bo‘ldi. Yo‘natan Musoning [10] nabirasi edi. Isroil xalqi surgun bo‘lguniga qadar [11] Yo‘natanning butun nasli ham Dan qabilasiga ruhoniylik qildi.

³¹O‘sha davrda Xudoning uyi Shilo‘ shahrida [12] joylashgan edi, ammo Dan qabilasi u yerga bormay, Mixo yasatgan butga sajda qilib keldi.