Read O‘zbek tilidagi Muqaddas Kitob, 2013 Hakamlar 20 Bible Online

Hakamlar 20 - O‘zbek tilidagi Muqaddas Kitob, 2013 bible

Hakamlar 20

¹Dan va Bersheva shaharlarining orasidagi keng hududda va Gilad o‘lkasida yashagan butun Isroil xalqi bir yoqadan bosh chiqarib, Egamiz huzurida Mispaxda [1] to‘plandi.

²Xudo ahlining yig‘inida jamiki Isroil qabilalarining yo‘lboshchilari va 400.000 qurollangan piyoda sipoh qatnashdi.

³Mispaxdagi yig‘in haqidagi xabar tez orada Benyamin qabilasiga ham yetib bordi. Isroil xalqi shunday dedi: — Bu jinoyat qanday qilib yuz berganini bizga aytib ber.

⁴O‘ldirilgan ayolning eri levi javob berdi: — Men xotinim [2] bilan tunamoq uchun Benyamin qabilasiga qarashli Givo shahriga bordim.

⁵Kechasi Givoning ba’zi bir odamlari uyni o‘rab olishdi. Ular meni o‘ldirmoqchi bo‘lib, mening o‘rnimga xotinimni shu qadar zo‘rlashdiki, bechora jon berdi.

⁶Aql bovar qilmaydigan bu razolat Isroilda sodir bo‘ldi! Shuning uchun men xotinimning jasadini bo‘lak–bo‘lak qilib, bo‘laklarni Isroil bo‘ylab jo‘natdim.

⁷Endi esa birodarlarim, hammalaringiz shu haqda mulohaza qilib, biron–bir maslahat beringlar.

⁸Yig‘inda ishtirok etganlar turib bir ovozdan: — Birontamiz ham o‘z chodirimizga yoki uyimizga qaytib ketmaymiz, — dedi.

⁹— Biz bunday qilamiz: Givoga qarshi jang qilishdan oldin, shaharga kim hujum qilishi kerakligini Xudodan so‘rab, qur’a tashlaymiz [3].

¹⁰Isroil xalqining o‘ndan bir qismi jangchilarni oziq–ovqat bilan ta’minlab turadi. Qolganlar esa Benyamin yeridagi Givo [4] aholisini Isroilda qilgan sharmandaligi uchun jazolaydi.

¹¹Shunday qilib, butun Isroil xalqi bir yoqadan bosh chiqarib, shaharga hujum qilish uchun to‘plandi.

¹²Isroil qabilalari Benyamin qabilasi bo‘ylab odamlarni yuborib dedilar: “Ey, xaloyiq, orangizdagi ayrim odamlar dahshatli bir jinoyatga qo‘l urdi.

¹³Givodagi buzuqlarni hoziroq bu yerga chiqaringlar, biz ularni o‘ldirib, Isroil xalqi orasidan yovuzlikni yo‘q qilamiz.” Ammo Benyamin qabilasi Isroil xalqining gaplariga quloq solmadi.

¹⁴Ular shaharlaridan chiqib, Isroil xalqiga qarshi jang qilish uchun Givoga bordilar.

¹⁵O‘sha kuni Givo shahridan bo‘lgan yetti yuzta saralangan jangchidan tashqari Benyamin qabilasining boshqa shaharlaridan kelgan qurollangan sipohlarning soni yigirma olti ming edi.

¹⁶Bularning orasida yetti yuz nafar chapaqay askar bor edi. Ularning hammasi mohir mergan edi. Ularga bir tola sochni nishon qilib qo‘ygan taqdirda ham palaxmondan tosh otib, mo‘ljalga bexato tekkizishardi.

¹⁷Isroil xalqi esa Benyamin qabilasidan ajralgan holda 400.000 qurollangan mohir jangchini to‘pladi.

¹⁸Isroil lashkarlari Baytil shahridagi sajdagohga [5] chiqib: “Oramizdan kim birinchi bo‘lib Benyamin qabilasiga hujum qilishi kerak?” — deya Xudoga iltijo qilishdi. “Yahudo qabilasi hujum qilsin”, — deb javob berdi Egamiz.

¹⁹Keyingi kuni ertalab Isroil lashkarlari borib, Givo shahrining yaqinida qarorgoh qurishdi.

²⁰So‘ng Benyamin jangchilariga hujum qilish uchun Givo shahrining ro‘parasida saf tortishdi.

²¹Benyamin jangchilari Givodan chiqib, Isroil lashkarlari bilan jang qilishdi. O‘sha kuni yigirma ikki ming Isroil sipohi halok bo‘ldi.

²²[22-23] Isroil lashkarlari Egamizning huzuriga borib, kechgacha faryod qilishdi. Ular Egamizdan: “Benyamin qarindoshimizga qarshi yana jang qilaylikmi?” — deb so‘rashdi. “Ularga hujum qilinglar”, — deb javob berdi Egamiz. Isroil lashkarlari ko‘tarinki ruhda ilgarigiday avvalgi joyda saf tortishdi.

²³

²⁴Ular ikkinchi kuni ham Benyamin jangchilariga qarshi jang qilishdi.

²⁵O‘sha kuni Benyamin jangchilari Givodan chiqib, yana o‘n sakkiz ming mohir Isroil sipohini o‘ldirishdi.

²⁶Shunda Isroil lashkarlari Baytilga [6] qaytib, yig‘i–sig‘i qilishdi. Ular o‘sha kuni kechgacha Egamizning huzurida o‘tirib ro‘za tutishdi. Egamiz huzurida kuydiriladigan qurbonliklar va tinchlik qurbonliklarini keltirishdi.

²⁷[27-28] Xudoning Ahd sandig‘i o‘sha yerda — Baytilda turgan edi, Elazar o‘g‘li Finxaz esa Ahd sandig‘i yonida o‘z xizmatini ado etardi. Finxaz Horunning nabirasi edi. Isroil lashkarlari Egamizdan: “Qarindoshimiz Benyamin qabilasiga qarshi jang qilaylikmi, yo‘qmi?” — deb so‘rashdi. “Jang qilinglar, — deb javob berdi ularga Egamiz. — Ertaga Men ularni sizlarning qo‘lingizga beraman.”

²⁸

²⁹Isroil lashkarlari Givoning tevarak–atrofidagi pistirmalarga odamlarni o‘tirg‘izib qo‘yishdi.

³⁰Keyin esa uchinchi marta Benyamin jangchilariga qarshi jang qilish uchun Givo ro‘parasida oldingiday saf tortishdi.

³¹Benyamin jangchilari urushga chiqishdi. Isroil lashkarlari ilgarigidek chekina boshlashdi. Benyamin jangchilari Isroil lashkarlarini ta’qib qilib, shahardan uzoqlashib qolishdi. Ular Baytil va Givoga ketadigan katta yo‘llarda va ochiq maydonlarda o‘ttiztacha Isroil sipohini o‘ldirishdi.

³²Benyamin jangchilari: “Bular oldingiday tumtaraqay bo‘lishyapti”, deb o‘ylashgan edi. Aslida esa Isroil lashkarlari ularni shahardan uzoqlashtirish niyatida shunday qilishayotgan edi.

³³Isroil lashkarining asosiy qismi jang maydonini orqaga — Baal–Tamar shahri tomon tortdi. Shunda birdaniga G‘ibo tekisligidagi [7] pistirmada yotgan sipohlar chiqishdi.

³⁴Isroil lashkarining o‘n ming saralangan jangchisi Givoga hujum qildi va u yerda qattiq jang boshlandi. Benyamin jangchilari bunday falokat yuz berishini kutishmagan edi.

³⁵Egamiz ularni Isroil lashkarlari oldida mag‘lub qildi. O‘sha kuni Isroil lashkarlari qurollangan 25.100 Benyamin jangchisini o‘ldirishdi.

³⁶Shunda Benyamin jangchilari mag‘lubiyatga uchraganlarini tushunishdi. Isroil lashkarining asosiy qismi Benyamin jangchilari oldida chekingan edi. Shu orqali ular Givo atrofidagi pistirmalarda o‘tirgan Isroil sipohlariga shaharga hujum qilish uchun qulay vaziyat yaratib bergan edilar.

³⁷Pistirmadagi sipohlar Givo tomon otildilar. Ular shahardagi bor odamni qirib tashladilar.

³⁸Isroil lashkarining asosiy qismi bilan pistirmadagi sipohlar o‘zaro shunday kelishib olgandilar: shahardan quyuq tutun chiqishi bilanoq,

³⁹Isroil lashkarining asosiy qismi orqaga qaytib jang qilishi kerak edi. Shu orada Benyamin jangchilari o‘ttiztacha Isroil sipohini o‘ldirgan edilar. Shu sababdan ular: “Isroil lashkari ilgarigiday chekinishi aniq”, deb o‘ylagan edilar.

⁴⁰Biroq ortga qaraganlarida shahardan quyuq tutun bulut bo‘lib ko‘tarilganini va butun shahar yong‘in ostida qolganini ko‘rdilar.

⁴¹Shunda Isroil lashkarining asosiy qismi ortiga qaytdi. Benyamin jangchilari esa mag‘lubiyatga uchraganlarini anglab, sarosimaga tushdilar.

⁴²Ular Isroil lashkaridan qochmoqchi bo‘lib, sahro tomon yugurdilar, ammo qirg‘indan qochib qutula olmadilar. Chunki shahardan chiqib kelayotgan sipohlar bilan Isroil lashkarining asosiy qismi ularni ikki tomondan siqib kelayotgan edi.

⁴³Isroil lashkari Benyamin jangchilarini qurshovga olib, Givoning sharq tomonigacha to‘xtamay ta’qib qilib, o‘ldirdi.

⁴⁴Benyamin qabilasining o‘n sakkiz ming bahodir jangchisi halok bo‘ldi.

⁴⁵Boshqalari esa sahrodagi Rimmon qoyasiga qarab qochishdi. Isroil lashkarlari ulardan besh mingtasini katta yo‘llarda qirib tashladilar, qolganlarini esa Gido‘mgacha ta’qib qilib, yana ikki mingtasini o‘ldirdilar.

⁴⁶O‘sha kuni Benyamin qabilasidan jami yigirma besh ming qurollangan dovyurak jangchi halok bo‘ldi.

⁴⁷Ammo olti yuzta sipoh sahrodagi Rimmon qoyasiga qochishga muvaffaq bo‘ldi. Ular to‘rt oy mobaynida u yerda yashab yurdilar.

⁴⁸Isroil lashkarlari Benyamin shaharlariga qaytib, u yerda qolgan–qutgan odamlarni, mollarni, barcha jonzotni qirib tashladilar, atrofdagi shaharlarga o‘t qo‘ydilar.