Read O‘zbek tilidagi Muqaddas Kitob, 2013 Hakamlar 21 Bible Online

Hakamlar 21 - O‘zbek tilidagi Muqaddas Kitob, 2013 bible

Hakamlar 21

¹Isroil xalqi Mispaxdagi [1] yig‘inda: “Birontamiz ham Benyamin qabilasiga qiz uzatmaymiz”, — deb ont ichgan edi.

²Benyamin qabilasi bilan bo‘lgan urushdan keyin Isroil xalqi Baytilga [2] borib, Egamiz huzurida kechgacha o‘tirdi. Ular faryod ko‘tarib:

³“Ey, Isroil xalqining Xudosi — Egamiz, nega bunday ko‘rgilik boshimizga tushdi?! Nega Isroilning bir qabilasi yo‘q bo‘lib ketdi?!” — deya achchiq–achchiq yig‘ladilar.

⁴Ertasi kuni odamlar barvaqt turib, u yerda qurbongoh qurdilar. Ular kuydiriladigan qurbonliklar va tinchlik qurbonliklarini keltirdilar.

⁵Keyin bir–birlaridan: “Isroil qabilalaridan Egamiz huzurida o‘tkazilgan yig‘inga kelmaganlar bormi?” — deb so‘radilar. Chunki ular, Mispaxda — Egamiz huzurida o‘tkazilgan yig‘inda ishtirok etmagan har bir kishining jazosi o‘limdir, deb qat’iy bir qasam ichgan edilar.

⁶Isroil xalqi o‘z jigari bo‘lgan Benyamin qabilasiga achinib: “Evoh, bugun Isroilning bir qabilasi yo‘q bo‘ldi”, — deya ko‘p o‘kindi.

⁷“O‘sha qabiladan faqatgina bir nechta yigit omon qoldi, xolos. Endi ular uchun qayerdan qiz topamiz? Birontamiz ularga qiz uzatmaymiz, deb Egamizning nomi bilan qasam ichgan edik–ku!”

⁸Isroil xalqi: “Mispaxdagi yig‘inda qatnashmaganlar bormi?” — deya surishtira boshladi. Shunda Giladdagi Yobosh shahrining aholisi yig‘inda qatnashmaganligi ma’lum bo‘ldi.

⁹Chunki yo‘qlama qilinganda o‘sha shahardan hech kim yo‘q edi.

¹⁰Butun jamoa o‘n ikki ming jangchini tanlab, ularga: “Boringlar, Giladdagi Yobosh shahrining butun aholisini qirib tashlanglar, xotinu bola–chaqalarini ham ayamanglar!” — dedi.

¹¹“Har bir erkak va er ko‘rgan har bir ayol o‘ldirilsin [3].”

¹²Jangchilar Yobosh [4] aholisining orasidan to‘rt yuzta er ko‘rmagan, yosh bokira qizni topib, ularni Kan’on yeridagi Shilo‘ qarorgohiga olib keldilar.

¹³Keyin butun jamoa Rimmon qoyasidagi Benyamin odamlariga xabar yuborib, tinchlik e’lon qildi.

¹⁴Benyamin odamlari o‘z uylariga qaytib borishdi. Isroil xalqi Giladdagi Yobosh aholisining omon qolgan qizlarini ularga turmushga berdi. Ammo qizlarning soni Benyamin odamlariga qaraganda kamroq edi.

¹⁵Isroil xalqi Benyamin qabilasiga nihoyatda achinar edi, chunki Egamiz ularni deyarli yo‘q qilib yuborgan edi.

¹⁶Shunda jamoa oqsoqollari shunday dedilar: — Obbo, endi qolgan Benyamin o‘g‘illariga qayerdan qiz topib beramiz? Ularning qabilasidan bironta qiz ham tirik qolmadi–ku!

¹⁷Benyamin qabilasi Isroildan batamom yo‘q bo‘lib ketmasligi uchun omon qolganlari nasl qoldirishlari kerak.

¹⁸Lekin shunisi ham borki, biz: “Benyamin qabilasiga qiz uzatgan la’nati bo‘lgay!” deb qasam ichib qo‘ydik, endi ularga qiz uzata olmaymiz.

¹⁹Shunda odamlardan bittasi: — Ha, aytgancha, Egamizga bag‘ishlab Shilo‘da har yili o‘tkaziladigan bayram haqida nima deysizlar? — dedi. — Lavo‘n va Baytil shaharlarining o‘rtasida joylashgan bu shahar, Baytildan Shakamga ketadigan yo‘lning shundoq yonginasida–ku.

²⁰Oqsoqollar Benyamin qabilasidan bo‘lgan bo‘ydoq yigitlarga shunday uqdirdilar: — Boringlar, uzumzorlarda yashirinib,

²¹poylab turinglar. Shilo‘ qizlari o‘yinga chiqqanda, uzumzordan chiqib, har biringiz o‘zlaringiz uchun qiz olib qochinglar.

²²Qizlarning otalari yoki aka–ukalari oldimizga shikoyat qilib keladigan bo‘lishsa, biz ularga shunday deymiz: “Qizlaringizni olib qolishimizga ijozat beringlar. Tushuninglar axir, biz Giladdagi Yoboshga hujum qilganimizda Benyamin yigitlari uchun yetarlicha qiz olib kela olmadik. Garchi Benyamin yigitlari qizlaringizni olib qochgan bo‘lsa–da, sizlar qasamni buzgan hisoblanmaysizlar.”

²³Benyamin odamlari Shilo‘ga borib, uzumzorlarda yashirinib oldilar. Qizlar raqsga tushganlarida ular o‘zlari uchun bittadan qiz olib qochdilar. So‘ng olib qochgan qizlari bilan uylariga qaytib ketdilar, shaharlarini tiklab, o‘sha joyda yashadilar.

²⁴Butun Isroil jamoasi ham uy–uylariga, qabilalari va oilalariga qaytib bordi.

²⁵O‘sha davrlarda Isroilda shoh yo‘q edi. Har bir odam bilganini qilar edi.