Read O‘zbek tilidagi Muqaddas Kitob, 2013 Hakamlar 3 Bible Online

Hakamlar 3 - O‘zbek tilidagi Muqaddas Kitob, 2013 bible

Hakamlar 3

¹[1-2] Egamiz, Kan’on yurtida bo‘lib o‘tgan bironta urushda qatnashmagan Isroil xalqini sinay, hech qachon urush ko‘rmagan bu yangi avlodga jangni o‘rgatay, deb quyidagi xalqlarni qoldirgan edi:

³beshta Filist bekini [1], barcha Kan’on xalqlarini, Sidonliklar va Baal–Xermon tog‘idan to Levo–Xomatgacha [2]Lubnon qirlarida yashagan Xiv xalqini.

⁴Ular yordamida Egamiz O‘z xalqi Isroilni sinab, Muso orqali ota–bobolariga bergan amrlarga itoat qilish–qilmasligini ko‘rmoqchi edi.

⁵Shunday qilib, Isroil xalqi Kan’on, Amor, Pariz, Xiv, Xet va Yobus xalqlarining orasida yashadi.

⁶Ular o‘sha xalqlar bilan apoq–chapoq bo‘lib, qiz olib, qiz berishardi, hatto xudolariga ham sig‘inishardi.

⁷Isroil xalqi Egamizning oldida qabih ishlar qilar edi. Ular o‘z Egasi Xudoni eslaridan chiqarib, Baal va Asheraning tasvirlariga sig‘inishar edi.

⁸Bundan g‘azablangan Egamiz ularni Oram–Naxrayim [3] shohi Kushonrishtamga tobe qilib qo‘ydi. Ular sakkiz yil davomida Kushonrishtamning xizmatida bo‘lishdi.

⁹Ammo Isroil xalqi Egamizga iltijo qilgach, Egamiz ularga qutqaruvchi qilib O‘tniyolni yubordi. O‘tniyol Xolibning jiyani, aniqrog‘i, kenja ukasi Xanazning o‘g‘li edi.

¹⁰Egamizning Ruhi O‘tniyolni qamrab oldi. O‘tniyol Isroil xalqiga hakam [4] bo‘ldi. O‘tniyol Mesopotamiya shohi Kushonrishtamga qarshi jang qilib, uni yengdi, chunki Egamiz shohni uning qo‘liga bergan edi.

¹¹Shundan keyin yurtda qirq yil tinchlik, osoyishtalik bo‘ldi. So‘ng Xanaz o‘g‘li O‘tniyol olamdan o‘tdi.

¹²Isroil xalqi Egamizning oldida yana qabihliklar qilgani uchun, Egamiz Mo‘ab yurtining [5] shohi Eglonni ularga qarshi qo‘zg‘atdi.

¹³Shoh Eglon Ommon va Omolek xalqlari bilan birgalikda Isroil xalqini yengib, palma shahri — Erixoni [6] qo‘lga kiritdi.

¹⁴Shunday qilib, Isroil xalqi o‘n sakkiz yil davomida Mo‘ab yurtining shohi Eglonga qaram bo‘lib yashadi.

¹⁵Ammo Isroil xalqi Egamizga iltijo qilishi bilanoq, Egamiz ularga Ehud ismli bir qutqaruvchini yubordi. Gera o‘g‘li Ehud Benyamin qabilasidan bo‘lib, chapaqay edi. Isroil xalqi Ehud orqali Mo‘ab shohi Eglonga o‘lpon jo‘natdi.

¹⁶Ehud o‘ziga uzunligi bir tirsak [7] bo‘lgan xanjar yasab, uni o‘ng tomoniga, kiyimining ichidan taqib olgandi.

¹⁷U o‘lponni shoh Eglon huzuriga olib kirdi. Shoh Eglon haddan tashqari semiz bir odam edi.

¹⁸Ehud o‘lponni taqdim qilib bo‘lgach, hadyalarni ko‘tarib kelgan odamlar bilan birga uyga yo‘l oldi.

¹⁹Biroq ular Gilgaldagi [8] tosh haykallar [9] o‘rnatilgan joyga yetganlarida, Ehud iziga qaytdi. U Eglonning oldiga kelib: “Ey, hazrati oliylari, sizga aytadigan bir sirim bor”, — dedi. Shoh: “Bizni holi qo‘yinglar!” — deyishi bilanoq, uning huzuridagi xizmatkorlar chiqib ketishdi.

²⁰Shoh salqin boloxonasida yolg‘iz o‘zi qoldi. Ehud unga yaqinlashib: “Men sizga Xudoning xabarini yetkazmog‘im lozim”, — dedi. Eglon o‘rnidan turdi.

²¹Shunda Ehud o‘ng tarafida osilgan xanjarni chap qo‘li bilan sug‘urib olib, Eglonning qorniga sanchdi.

²²Xanjar sopi bilan Eglonning qorniga kirib ketdi, teshigini esa yog‘ qopladi. Ehud xanjarni sug‘urib olmadi, xanjar tig‘i shohning qornini yorib butidan chiqdi [10].

²³Ehud ayvonga chiqdi, boloxona eshiklarini yopib, qulfladi.

²⁴U ketishi bilanoq, Eglonning xizmatkorlari kelishdi. Eshik qulf ekanligini ko‘rishgach: “Shohimiz salqingina xonada hojatini chiqarayotgan bo‘lsalar kerak”, degan xayolga borishdi.

²⁵Ammo boloxonaning eshiklari hadeganda ochilavermagandan so‘ng, xizmatkorlar bezovtalanishdi. Ular tashqarida ancha kutib qolishganidan keyin, kalit olib, eshikni ochishdi. Qarashsa, shoh hazratlari jonsiz yotgan ekan.

²⁶Ehud esa paytdan foydalanib, qochib qolgan edi. U tosh haykallar oldidan o‘tib, Saviro shahriga bordi.

²⁷Efrayim qirlariga yetib kelganda burg‘u chalib, Isroil xalqini jangga da’vat qildi. Ehud hammani boshlab qirlardan pastga tushar ekan,

²⁸Isroil xalqiga: “Orqamdan yuringlar! — dedi. — Dushmanimiz Mo‘ab xalqini Egamiz sizlarning qo‘lingizga berdi–ku!” Isroil xalqi Ehudga ergashdi. Ular Iordan daryosining kechuv joylarini qo‘lga olib, bironta odamni ham u yerdan o‘tkazishmadi.

²⁹O‘sha kuni ular o‘n mingtacha baquvvat va jasur Mo‘ab sipohlarini o‘ldirishdi. Birontasi ham Isroil xalqining qo‘lidan qochib qutulmadi.

³⁰O‘sha kuni Isroil xalqi Mo‘ab lashkarini mag‘lub qildi. Yurtda sakson yil tinchlik, osoyishtalik bo‘ldi.

³¹Ehuddan keyin Onot o‘g‘li Shamgar hakam bo‘ldi. U ham Isroil xalqini qutqarib, govron bilan olti yuz nafar Filist sipohini o‘ldirgandi.