Read O‘zbek tilidagi Muqaddas Kitob, 2013 Hakamlar 5 Bible Online

Hakamlar 5 - O‘zbek tilidagi Muqaddas Kitob, 2013 bible

Hakamlar 5

¹Abunavam o‘g‘li Baraq bilan Dobira o‘sha kuni shunday qo‘shiq kuylashdi:

²“Isroil yo‘lboshchilari yo‘l boshlaganda, Xalq fidoyilik ko‘rsatganda, Egamizga hamdu sanolar ayting!

³Eshiting, sizlar, ey, shohlar! Quloq soling, ey, yo‘lboshchilar! Egamizga men qo‘shiq ayturman, Isroil xalqining Xudosi — Egamizni kuylab soz chalurman.

⁴Sen, ey, Egam, Seirdan yo‘lga chiqqaningda, Edom bo‘ylab yurish qilganingda, Yer silkindi, osmon yomg‘irin quydi, Ha, bulutlar sharros yomg‘irin to‘kdi.

⁵Tog‘lar titradi Sinaydagi Egamiz oldida, Isroil xalqining Xudosi — Egamizning oldida.

⁶Onot o‘g‘li Shamgar davrida, Yovel zamonida yurmay qo‘ygandi karvon. Yo‘lovchilar so‘qmoqdan yurishga bo‘ldi majbur.

⁷Isroil qishloqlari huvullab qoldi butkul. Men, Dobira, kelgunimga qadar, Isroilning volidasi singari, Bo‘m–bo‘sh edi Isroil qishloqlari!

⁸Yangi xudolarni Isroil xalqi tanlaganda, Jang qizidi shahar darvozalarida. Na qalqoni, na nayzasi bor edi Isroilning qirq mingta sipohida.

⁹Qalbim moyil Isroil yo‘lboshchilariga, Xalqning orasidagi fidoyilarga. Egamizga hamdu sanolar bo‘lsin!

¹⁰Eshiting [1], ey, oq xachir minganlar, Qimmatbaho egarlarda o‘tirganlar! Ey, yo‘lda yayov yurganlar!

¹¹Quduq oldida to‘plangan Qishloq cho‘ponlarining [2] ovozlarin eshiting. Madh qilayotir ular Egamizning zafarlarini, Isroildagi qishloqlarning g‘alabalarini. Shahar darvozalariga hamla qildi Egamiz xalqi:

¹²“Olg‘a bos, Dobira, olg‘a bos ildam! Olg‘a bos, kuylagin jangovar qo‘shiq! Abunavam o‘g‘li Baraq! Qani, bo‘l sen ham! Asirlaringni o‘zing boshlagin!”

¹³Xalqning qolgani bo‘ysundirdi bahodirlarni, Egamiz xalqi mag‘lub qildi pahlavonlarni,

¹⁴Omoleklarni yenggan Efrayimdan [3] chiqqandi. Benyamin ham senga ergashdi, Moxir naslidan kelishdi lashkarboshilar, Zabulun qavmidan — hokimlik tayog‘in tutganlar.

¹⁵Dobiraga qo‘shildi Issaxor yo‘lboshchilari, Baraqni qo‘lladi Issaxor o‘g‘lonlari. Vodiyga shoshildi ular Baraq ortidan. Ammo beqarorlik qildi Rubenning nasli.

¹⁶Nega sizlar qo‘ralarda qoldingiz, ey, Ruben? Cho‘ponlarning qurey–qureylarin eshitganimi?! Beqarorlik qildi–ku Rubenning nasli.

¹⁷Gilad Iordan ortida qoldi. Dan kemalari yonida qoldi. Osher dengiz sohilida o‘rnashib oldi, O‘z ko‘rfazlarida joylashib qoldi.

¹⁸O‘limdan qo‘rqmadi Zabulun lashkari, Jonin ayamadi Naftali ham jang maydonida.

¹⁹Tanaxda, Maxido‘ suvlari yonida Kan’on shohlari urush ochishdi. Biroq xazinani ular o‘lja qila olmadi.

²⁰Jang qildi yulduzlar samoda turib [4], Sisaroga urush qildi o‘z yo‘llarida yurib.

²¹Supurib tashladi dushmanni Xishon daryosi, O‘sha ko‘hna daryo — Xishon daryosi. Ey, jonim! Kuch–la olg‘a bos!

²²Arg‘umoqlar keldi dupur–dupur qilib, Sisaro otlarining tuyoqlari yerni tamg‘alab.

²³“Miroz shahrini la’natla, — deydi Egamizning farishtasi, — Aholisini ham qattiq qarg‘agin, Ular kelmadi Egamizga madad bergani, Pahlavonlarga qarshi Egamizga madad bergani.”

²⁴Xayin urug‘idan bo‘lgan Xaberning xotini — Yovel ayollar orasida baraka topsin! Chodirlarda yashaydigan ayollarning baxtlisi bo‘lsin.

²⁵Sisaro suv so‘raganda Yovel keltirdi sut, Shohkosada qatiq olib keldi u.

²⁶Chodir qozig‘ini qo‘liga oldi, O‘ng qo‘lida bolg‘ani tutdi. Zarba bilan Sisaroning boshini yordi, Chakkasiga bir urib, teshib yubordi.

²⁷Sisaro sulayib yiqilib tushdi, Yovelning oyog‘i ostida churq etmay qoldi. Yovelning oyog‘i ostida sulayib qoldi, Yiqilgan joyida jon taslim qildi.

²⁸Sisaroning onasi derazadan ko‘chaga qarar, Panjara ortidan u zorlanib aytar: “Aravalar qolib ketdi namuncha? Tuyoqlar ovozi eshitilmas hanuzgacha?”

²⁹Javob berar uning dono ayollari, Javob berar takror–takror o‘ziga o‘zi:

³⁰“Bo‘lishayotgandir ular o‘ljani, Har qaysi sipohga bir–ikki juvonni, Sisaroga rang–barang liboslarni. G‘oliblarga olib kelar ikki hissa qilib Nafis naqshli liboslarni.”

³¹Ey, Egamiz! Dushmanlaring barchasi Sisaroga o‘xshab qirilib ketsin! Do‘stlaring–chi, chiqayotgan quyoshday Charaqlab tursin!” Yurtda qirq yil tinchlik barqaror bo‘ldi.