Read O‘zbek tilidagi Muqaddas Kitob, 2013 Hakamlar 8 Bible Online

Hakamlar 8 - O‘zbek tilidagi Muqaddas Kitob, 2013 bible

Hakamlar 8

¹Efrayim qabilasi Gido‘nga: — Nega bunday qilding? Midiyonlarga qarshi jang qilgani chiqqaningda nega bizni chaqirmading? — deya u bilan qattiq janjallashdilar.

²Gido‘n esa ularga dedi: — Men qilgan ishim bilan sizlarga teng kelarmidim?! Efrayimdagi uzum qoldiqlari kichkinagina bir qavmimning jami hosilidan a’lo–ku!

³Sizlar Xudoning qudrati bilan Midiyon lashkarboshilari Oriv va Zayovni qo‘lga olgan bo‘lsangiz, o‘z ishlarim bilan sizlarga teng kelarmidim?! U bu gaplarni aytganidan keyin, ular jahldan tushdilar.

⁴Gido‘n uch yuzta odami bilan Iordan daryosiga kelib narigi qirg‘og‘iga o‘tib oldi [1]. Ular holdan toygan bo‘lsalar–da, dushmanning ketidan quvib ketayotgan edilar.

⁵Gido‘n Suxo‘t shahri aholisiga murojaat qilib: — Ey, xaloyiq, marhamat qilib odamlarimga ozgina non beringlar, ular holdan toyganlar. Biz Midiyon shohlari Zevax va Zalmunoning ketidan quvib ketyapmiz, — dedi.

⁶Ammo Suxo‘t boshliqlari shunday javob berishdi: — Zevax va Zalmunoni qo‘lga olgan bo‘lsang ekan, lashkarlaringga non bersak.

⁷— Juda soz! — dedi Gido‘n. — Zevax va Zalmunoni Egamiz mening qo‘limga bergandan so‘ng, sizlarni cho‘ldagi yantoq va chaqir tikanaklar bilan savalab, teringizni shilib olaman.

⁸Gido‘n u yerdan Paniyol shahriga [2] yo‘l oldi. U yerdagilarga ham xuddi shunday iltimos bilan murojaat qildi. Suxo‘t aholisi qanday javob bergan bo‘lsa, Paniyol aholisi ham xuddi shunday javob berdi.

⁹Gido‘n Paniyol aholisiga dedi: — G‘olib bo‘lib qaytib kelganimdan so‘ng bu minorani [3] yer bilan yakson qilaman.

¹⁰O‘sha paytda Zevax va Zalmuno o‘z lashkarlari bilan Karxorda turgan edilar. Sharqdagi ko‘chmanchilarning 120.000 ta sipohi halok bo‘lib, 15.000 tachasi qolgandi.

¹¹Gido‘n Navah va Yohboxoning sharq tomonidagi karvon yo‘li bo‘ylab borib, dushmanni g‘aflatda qoldirib hujum qildi.

¹²Zevax va Zalmuno qochishdi, Gido‘n esa ularning ketidan quvib ketdi. Ikki Midiyon shohini qo‘lga olib, butun dushman lashkarini sarosimaga soldi.

¹³Yo‘sh o‘g‘li Gido‘n jangdan qaytib, Xares dovoni tomon ketayotganda,

¹⁴Suxo‘tlik bir yigitchani ushlab olib, so‘roqqa tutdi. Yigitcha Suxo‘t shahrining yetmish yettita boshliq va oqsoqolini nomma–nom aytib berdi.

¹⁵So‘ng Gido‘n Suxo‘t aholisining oldiga borib dedi: — Eslaringdami meni masxara qilib, Zevax va Zalmunoni qo‘lga olganmidingki, biz holdan toygan lashkaringga non bersak, deb aytganlaring? Mana o‘sha Zevax va Zalmuno.

¹⁶Gido‘n yantoq va chaqir tikanaklarni olib, Suxo‘t boshliqlarining ta’zirini berdi.

¹⁷Paniyoldagi minorani ham vayron qilib, shaharning barcha erkaklarini qirib tashladi.

¹⁸So‘ng Zevax va Zalmunoga yuzlanib: — Sizlar Tovur shahrida o‘ldirgan odamlar qanday edi? — deb so‘radi. — Ular senga o‘xshagan, ko‘rinishlari shoh o‘g‘illariday savlatli edi, — deya javob berishdi ular.

¹⁹— Ular mening jigarlarim edi–ku! — deya xitob qildi Gido‘n. — Biz bir qorindan talashib tushgan edik. Xudo shohid! Ularni o‘ldirmaganlaringda, men ham jonlaringni saqlab qolgan bo‘lardim.

²⁰So‘ng to‘ng‘ich o‘g‘li Eterga: — Bor, ularni o‘ldir! — dedi. Ammo bola qo‘rqqanidan qilichini ham chiqarmadi, chunki u hali yosh edi.

²¹Shunda Zevax va Zalmuno: — Erkak bo‘lsang, o‘zing kelib bizni o‘ldir, — dedilar. Gido‘n Zevax va Zalmunoni o‘ldirib, tuyalarining bo‘ynidagi shohona bezaklarini oldi.

²²Bo‘lib o‘tgan voqealardan so‘ng Isroil xalqi Gido‘nning oldiga kelib: — Sen bizni Midiyonlarning qo‘lidan qutqarding, endi o‘zing, o‘g‘illaring va nabiralaring bizga hukmdor bo‘linglar, — deyishdi.

²³— Men sizlarga hukmdor bo‘lmayman, — dedi Gido‘n, — o‘g‘lim ham hukmdoringiz bo‘lmaydi. Egamning O‘zi sizlarga hukmdorlik qilsin.

²⁴Keyin davom etib: — Sizlardan bir narsa so‘ramoqchiman, — dedi. — O‘ljalaringdan bittadan tilla zirak bersangizlar. Midiyonlar ham Ismoil avlodi singari [4] tilla ziraklar taqib yurishardi.

²⁵— Jonimiz bilan, — deb javob berdi Isroil xalqi. So‘ng bir kiyim yoyib, har biri o‘lja qilib olgan tilla zirakdan o‘sha kiyim ustiga tashladi.

²⁶Tilla ziraklarning o‘lchovi bir puddan ortiq [5] oltin chiqdi. Midiyon shohlari kiygan safsar liboslaru taqqan yarim oy va shokilali bezaklar hamda tuyalarining bo‘ynidagi tilla zanjirlar hisobga kiritilmagandi.

²⁷Gido‘n o‘sha oltindan bir haykal [6] yasab, uni o‘z shahri O‘fraga o‘rnatib qo‘ydi. Butun Isroil xalqi Xudoga bevafolik qilib, o‘sha yerdagi haykalga sig‘ina boshladi. Bu haykal Gido‘n va uning oilasi uchun tuzoq bo‘lib qoldi.

²⁸Shunday qilib, Midiyonlar mag‘lub bo‘ldilar. Ular Isroil xalqiga qarshi bosh ko‘tarishga qayta jur’at etmadilar. Gido‘n paytida yurtda qirq yil tinchlik barqaror bo‘ldi.

²⁹Yo‘sh o‘g‘li Gido‘n [7] uyiga qaytib ketdi.

³⁰Uning yetmishta o‘g‘li bor edi, chunki xotinlari nihoyatda ko‘p edi.

³¹Shakam shahridagi cho‘risi [8] ham Gido‘nga bir o‘g‘il tug‘ib berdi. Gido‘n unga Abumalek, deb ism qo‘ydi.

³²Gido‘n ulug‘ yoshga kirib olamdan o‘tdi va O‘fra shahridagi otasi Yo‘shning xilxonasiga dafn etildi. Bu shahar Abuazar urug‘iga qarashli edi.

³³Gido‘n olamdan ko‘z yumishi bilanoq, Isroil xalqi yana Xudoga bevafolik qilib, Baalning tasvirlariga sig‘ina boshladi, ular Baal–Beritni [9] o‘zlariga xudo qildilar.

³⁴Ularni atrofdagi dushmanlardan xalos qilgan Egasi Xudoni eslaridan chiqardilar.

³⁵Yerubbaal, ya’ni Gido‘n, Isroil xalqi uchun qilgan shuncha yaxshiliklariga qaramay, Isroil xalqi uning xonadoniga sodiq qolmadi.