Read O‘zbek tilidagi Muqaddas Kitob, 2013 Yuhannoning 3chi 1 Bible Online

Yuhannoning 3chi 1 - O‘zbek tilidagi Muqaddas Kitob, 2013 bible

Yuhannoning 3chi 1

¹Chin ko‘ngildan yaxshi ko‘radigan aziz birodarim Gayga men — oqsoqoldan salom!

²Aziz do‘stim, hamma ishlaringga Xudodan rivoj tilayman. Tanang ruhing singari sog‘–salomat bo‘lsin.

³Har safar birodarlarimiz kelib, sening haqiqatga sodiq qolganingni va haqiqat bo‘yicha yashayotganingni aytishganda, men g‘oyat xursand bo‘laman.

⁴Men uchun farzandlarimning haqiqat bo‘yicha yashayotganlarini eshitishdan kattaroq xursandchilik yo‘q.

⁵Aziz do‘stim, sen birodarlarimizga, hatto o‘zing tanimaganlarga ham, doim sadoqat bilan yordam berib kelyapsan.

⁶Ular sening mehribonliging to‘g‘risida imonlilar jamoatiga aytib yurishibdi. Bu ishingni davom ettiraver, Xudoga munosib tarzda safardagi birodarlarga yordam ber.

⁷Axir, ular Masih nomi uchun yo‘lga chiqqanlar. Imonsizlardan hech qanday yordam olmaslikka qaror qilganlar.

⁸Biz bunday odamlarni qo‘llab–quvvatlashimiz kerak, shunda haqiqatni e’lon qilishda ularga hamkor bo‘lamiz.

⁹Men imonlilar jamoatiga bir maktub yozgan edim. Ammo ularning oralarida o‘zini katta tutayotgan Diotref gaplarimizga e’tibor bermayapti.

¹⁰Agar borsam, uning qilmishlarini fosh etaman. U biz haqimizda yomon gaplar tarqatib, tuhmat qilib yuribdi. Bu bilan ham kifoyalanmay, birodarlarni qabul qilmayapti, qabul qilmoqchi bo‘lganlarga to‘sqinlik qilib, ularni hatto jamoatdan quvib chiqaryapti.

¹¹Aziz birodarim, sen yomonlikka emas, yaxshilikka taqlid qil. Yaxshilik qiluvchi odam Xudodandir. Yomonlik qiluvchi esa Xudoni ko‘rmagan.

¹²Dimitriy haqida esa hamma yaxshi gapirmoqda, uning hayotida va ta’limotida aks etgan haqiqat ham u tomondadir. Biz ham u haqda yaxshi fikrdamiz, gapimiz to‘g‘ri ekanligini o‘zing bilasan.

¹³Senga aytadigan gapim ko‘p, ammo ularni siyoh bilan qog‘ozga yozishni istamadim.

¹⁴Undan ko‘ra, yaqin orada o‘zing bilan yuzma–yuz ko‘rishib gaplashaman, deb umid qilaman.

¹⁵Tinch–omon bo‘lgin. Do‘stlarimiz senga salom yo‘llayaptilar. U yerdagi do‘stlarimga ham nomma–nom salom aytib qo‘y.