Read O‘zbek tilidagi Muqaddas Kitob, 2013 1 Shohlar 2 Bible Online

1 Shohlar 2 - O‘zbek tilidagi Muqaddas Kitob, 2013 bible

1 Shohlar 2

¹Xanna shunday ibodat qildi: “Egam tufayli ko‘nglim tog‘day ko‘tarildi, Quvvatimni oshirgan O‘shadir. Dushmanlarim oldida maqtanurman, Najot berganing–chun sevinurman.

²Egam — tanho va haqiqiy Xudo, Ha, Sendan boshqasi yo‘q, ey, Egam. Xudoyimizday qoya yo‘qdir.

³Ortiq manmanlikka berilmang og‘iz ko‘pirtirib, Og‘zingizdan kibrli so‘zlar chiqmasin. U hammasini biladigan Xudodir, U odamlarning xatti–harakatini hukm qiladi.

⁴Kuchlilarning yoylari sinib ketadi, Ojizlar quvvat kamarini bog‘laydi.

⁵To‘q bo‘lganlar luqma non uchun mardikordirlar, Och bo‘lganlar esa endi to‘qdirlar. Befarzand ayol yetti bola tug‘ar, Serfarzand ayol esa kimsasiz qolar.

⁶Jonni oladigan ham Egamizdir, Jonni ato qiladigan ham Egamizdir O‘liklar diyoriga [1] U tushirar va Yana qayta olib ham chiqar.

⁷U kimnidir yo‘qsil, kimnidir boy qilar, Kimnidir yerga urar, kimnidir yuksaltirar.

⁸Bechorahollarni U tuproqdan ko‘tarar, Faqirlarni axlatdan olib chiqib yuksaltirar. Ularga shahzodalar yonidan joy berar, Shuhrat taxtini meros qilib berar. Chunki Egamnikidir zaminning ustunlari [2] Ustunlarning ustiga qo‘ygandir U olamni.

⁹U O‘ziga sodiq bo‘lganlarni himoya qilar Fosiqlar esa zulmatda so‘nib qolar. Zeroki kuch ila zafarga yetishmas inson.

¹⁰Egamizga qarshi turganlar parcha–parcha bo‘lajak, Xudoyi Taolo ularga qarshi osmonni gumburlatajak. Butun olamni U hukm qilajak, O‘zi moy surtib tanlagan shohiga kuch ato etib, Uning quvvatini oshirajak.”

¹¹Shundan keyin Elqana oilasi bilan Ramaga — uyiga jo‘nadi. Kichkina Shomuil esa ruhoniy Elaxning huzurida qoldi va Egamizga xizmat qila boshladi.

¹²Elaxning o‘g‘illari yaramas yigitlar edilar. Ular Egamizni hurmat qilmas,

¹³xalq oldidagi o‘z ruhoniylik burchlarini mensimasdilar. Birortasi kelib qurbonlik so‘yib, go‘shtini qaynatayotganda, Elax o‘g‘illarining xizmatkori uch tishli sanchqi bilan kelardi.

¹⁴Xizmatkor sanchqini qozon–tovoqqa yoki tovaga yo bo‘lmasa qozonga tiqardi. Sanchqiga ilinganini ularga olib borardi. Ular Shilo‘ga kelgan Isroil xalqining hammasiga shunday munosabatda bo‘lishardi.

¹⁵Hatto qurbonlikning yog‘ini kuydirmasdan oldin [3], ruhoniyning xizmatkori kelib, qurbonlik qilayotgan odamga shunday derdi: — Ruhoniyga qovurish uchun go‘sht ber! U sendan qaynatilganidan emas, xomidan qabul qiladi.

¹⁶Qurbonlik qilayotgan odam: — Oldin Egamizga atab qurbonlikning yog‘ini kuydirib olay, keyin xohlaganingcha olaver, — deydigan bo‘lsa, xizmatkor: — Yo‘q, hozir berasan, yo‘qsa zo‘rlik bilan tortib olaman, — deb javob berardi.

¹⁷Elax o‘g‘illarining bu gunohi Egamiz oldida juda og‘ir edi, chunki ular Egamizga atalgan nazr–niyozlarga shunday hurmatsizlik qilishardi.

¹⁸Yosh Shomuil esa shu paytda ruhoniylarning muqaddas libosini [4] kiyib, Egamiz huzurida xizmat qilib yurardi.

¹⁹Har yilgi qurbonlikni ado etish uchun onasi bilan otasi bu yerga kelishar, onasi o‘zi tikkan kiyimni [5] o‘g‘liga olib kelardi.

²⁰Ruhoniy Elax esa Elqana bilan uning xotinini duo qilib, Elqanaga: “Egamizdan tilab olib, Unga bag‘ishlagan farzandingning o‘rniga Xudoyim senga shu xotindan yana farzandlar bersin”, deb aytardi. Shundan keyin ular uylariga ketishardi.

²¹Egamiz Xannaga g‘amxo‘rlik qildi. U homilador bo‘lib, yana uch o‘g‘il, ikki qiz tug‘di. Yosh Shomuil esa Egamizning huzurida o‘sib–ulg‘aydi.

²²Elax juda keksayib qolgan edi. U o‘g‘illarining jamiki Isroil xalqiga yomon munosabatda bo‘lishayotganini, Uchrashuv chodiriga [6] kiraverishda xizmat qiladigan ayollar [7] bilan zino qilishayotganini eshitib turardi.

²³Elax o‘g‘illariga derdi: — Nimaga bunday qilyapsizlar? Qilayotgan qabih ishlaringiz hammaning og‘zida.

²⁴Bunday qilmanglar, o‘g‘illarim! Egamizning xalqi orasida yoyilgan gap–so‘zlar yaxshi emas.

²⁵Odam odamga qarshi gunoh qilsa, Xudo vositachilik qiladi. Ammo odam Egamizga qarshi gunoh qilsa, o‘rtada kim vositachilik qila oladi?! Biroq o‘g‘illari otalarining gapini quloqlariga olmasdilar. Shuning uchun Egamiz ularni o‘ldirishga qaror qilib qo‘ygan edi.

²⁶Yosh Shomuil esa ulg‘ayib, Egamizning va xalqning olqishiga sazovor bo‘layotgan edi.

²⁷Bir kuni bir payg‘ambar Elaxning oldiga kelib, shunday dedi: — Egamiz senga aytmoqda: “Isroil xalqi Misr yurtida Fir’avnga qul bo‘lib yurganda, O‘zimni ota–bobolaringga zohir qildim–ku!

²⁸Bobong Horun Mening qurbongohimga chiqsin, qurbonlik kuydirib, oldimda efodni kiyib yursin, deb jamiki Isroil qabilalari orasidan Men uni O‘zimga ruhoniy qilib tanlab olgan edim. Buning ustiga, Horun avlodining ulushi bo‘lsin, deb hamma kuydiriladigan qurbonliklardan ham berdim.

²⁹Shunday bo‘lgach, Men buyurgan qurbonlik va nazrlarni nimaga pisand qilmayapsizlar?! Nimaga xalqim Isroil bergan hamma nazrlardan eng yaxshi ulushlarni olib o‘zingiz yeb semiryapsizlar?! Nimaga o‘g‘illaringni Mendan ortiq ko‘ryapsan?!

³⁰Shuning uchun Men, Isroil xalqining Xudosi — Egangiz, shunday deb aytmoqdaman: avloding va otangning avlodi Menga abadiy xizmat qiladilar, deb aytgan bo‘lsam ham, endi bunday bo‘lmaydi! Meni izzat qilganni Men ham izzat qilaman, Meni xor qilgan esa sharmanda bo‘lur.

³¹Shunday kunlar yaqinlashmoqda: Men sening va otangning xonadonini yo‘qotaman. Natijada xonadoningdagi hamma kimsa ajalidan besh kun burun o‘ladi.

³²Men Isroil xalqi ustiga yog‘diradigan rohat–farog‘atni sen ko‘rib, kulfat ichra ularga hasad qilasan. Sening xonadoningdan hech kim uzoq umr ko‘rmaydi.

³³Xonadoningdan faqat bittasini yo‘q qilmasdan asrab qolaman. Lekin uning ko‘zlari yoshga, yuragi g‘am–g‘ussaga to‘ladi. Butun xonadoning ahli juvonmarg ketadi.

³⁴Ikkala o‘g‘ling — Xo‘fnax bilan Finxazning boshiga tushadigan ko‘rgilik senga bir alomat bo‘lsin: ikkovi ham bir kunda nobud bo‘ladi.

³⁵Mening xohish–irodamni amalga oshiradigan sadoqatli bir ruhoniyni O‘zim uchun tayin etaman, u ko‘nglimdagiday xizmat qiladi. Uning avlodini boqiy qilaman, u Men moy surtib tanlagan shoh oldida umr bo‘yi xizmat qiladi.

³⁶Xonadoningda tirik qolgan har bir odam qora chaqaga va bir burda nonga zor bo‘lib uning oldiga keladi, o‘tinaman, menga biror ruhoniylik vazifasini ber, tirikchiligimni o‘tkazib turay, deb yolvorib ta’zim qiladi.”