Read O‘zbek tilidagi Muqaddas Kitob, 2013 1 Shohlar 26 Bible Online

1 Shohlar 26 - O‘zbek tilidagi Muqaddas Kitob, 2013 bible

1 Shohlar 26

¹Zifliklar Givoga Shoulning huzuriga kelib: “Dovud Yishmon [1] chetidagi Xaxilo tepaligida yashirinib yuribdi”, deb xabar yetkazishdi.

²Shoul uch mingta saralangan Isroil sipohi bilan Dovudni qidirib Zif dasht–biyoboniga bordi.

³U Xaxilo tepaligidagi yo‘l bo‘yida qarorgoh qurdi, bu tepalik Yishmon sahrosining chetida edi. Dovud hali ham sahroda yashirinib yurardi. O‘z orqasidan Shoulning tushganini bilib, Dovud

⁴ayg‘oqchilar jo‘natdi. Shu tariqa Shoulning shu yerga kelganini aniq bilib oldi.

⁵Dovud Shoulning qarorgohi tomon yaqin borib, Shoul bilan lashkarboshi Abnurning uxlayotgan joyini ko‘rdi. Shoul qarorgohning o‘rtasida, sipohlar esa uning atrofida yotgan edilar.

⁶Shu payt Dovud Oximalek bilan Abushaydan: — Kim men bilan qarorgohga — Shoulning yoniga kiradi? — deb so‘radi. Oximalek — Xet xalqidan edi. Abushay — Zeruyaning [2] o‘g‘li bo‘lib, Yo‘abning akasi edi. — Men siz bilan boraman, — dedi Abushay.

⁷Dovud bilan Abushay o‘sha kun kechasi qarorgohga kirishdi. Shoul nayzasini bosh tomoniga yerga sanchib qo‘yib, qarorgohning o‘rtasida uxlab yotardi. Abnur bilan sipohlar uning atrofida uxlashardi.

⁸— Bugun Xudo g‘animingizni sizning qo‘lingizga berdi, — dedi Abushay Dovudga. — Endi ijozat bering, uni nayza bilan bir urib yerga mixlab qo‘yayin. Ikkinchi marta urishimga hojat qolmaydi.

⁹— Yo‘q, uni o‘ldirmaysan, — dedi Dovud, — Egamiz moy surtib tanlagan shohga qo‘l ko‘targanni sira oqlab bo‘lmaydi.

¹⁰Xudo shohid! Shoulni yo Xudo uradi, yo uning kuni bitib olamdan o‘tadi, yoki jangda halok bo‘ladi.

¹¹Ammo Egamiz moy surtib tanlagan shohga qo‘l ko‘tarishdan meni Xudoning O‘zi saqlasin. Mayli, Shoulning bosh tomonidagi nayza bilan suvdonini olib ketamiz.

¹²Dovud Shoulning bosh tomonidagi nayzasi va suvdonini oldi. Keyin u yerdan qaytishdi. Ularni hech kim ko‘rmadi, biror kimsa bo‘lib o‘tgan voqeani bilmay qoldi, hech kim uyg‘onmadi ham. Hamma uxlab yotardi, zotan, Egamiz ularni qattiq uxlatib qo‘ygan edi.

¹³Dovud narigi tomonga o‘tib, uzoqroqdagi tepalikning ustiga chiqdi, Shoulning sipohlari bilan uning orasida anchagina masofa bor edi.

¹⁴O‘sha yerdan Abnurni va odamlarini chaqirib: — Ey, Abnur, menga javob ber–chi! — dedi. — Sen kimsan, nega baqirib shohimizni bezovta qilyapsan? — so‘radi Abnur.

¹⁵— Sen katta odamsan, Abnur, to‘g‘rimi gapim? — dedi Dovud. — Butun Isroilda senga teng keladigani yo‘q. Shoh hazratlarini bittasi o‘ldirmoqchi bo‘lib, qarorgohga kiradi–yu nega muhofaza etmading?

¹⁶Bu qilgan ishing yomon. Xudo haqi, o‘zing ham, odamlaring ham o‘limga loyiqsizlar, chunki janobi oliylarini — Egamiz moy surtib tanlagan shohni muhofaza etmadingizlar. Qarab ko‘r–chi, shohning bosh tomonidagi nayzasi bilan suvdoni qayerda ekan?

¹⁷Shoul Dovudning ovozini tanidi: — Bu sening ovozingmi, Dovud o‘g‘lim? — deb so‘radi. — Ha, shoh hazratlari, menman, — javob berdi Dovud.

¹⁸— Janobi oliylari! Men, qulingizni nega ta’qib qilaverasiz? Men nima qildim? Gunohim nima?

¹⁹Shoh hazratlari! Marhamat qilib men, qulingizning so‘zlariga quloq soling. Agar sizni menga qarshi qo‘zg‘atgan Egamiz bo‘lsa, nazr atang, U tinchlansin. Agar bu ishni insonlar qilgan bo‘lsa, Egamiz oldida la’nati bo‘lsinlar. Chunki ular Egamizning yeridan meni haydab: “Bor, begona xudolarga xizmat qil” [3], deyayotganday bo‘lyapti.

²⁰Ishqilib, qonim Egamizning huzuridan uzoq yerlarga to‘kilmasin. Shohim, siz tog‘da kaklik ovlaydigan ovchidaysiz–u, itlaru odamlaringiz bilan bitta burgani ovlashga chiqibsiz–da!

²¹— Gunoh qildim, Dovud o‘g‘lim, beri kel, — dedi Shoul. — Bugun mening hayotim sen uchun qimmatli ekanini bildim. Endi senga sira yomonlik qilmayman. Haqiqatan ham, nodonlik qildim, qattiq yanglishdim.

²²— Mana shohimizning nayzasi, yigitlaringizdan biri kelib olsin, — dedi Dovud,

²³— Egamiz har bir odamning to‘g‘riligiga va sadoqatiga yarasha mukofot beradi. Bugun Egamiz sizni qo‘limga bergan bo‘lsa–da, men Egamizning moy surtib tanlaganiga qo‘l ko‘tarishni istamadim.

²⁴Bugun sizning hayotingizni saqlaganimday, Egamiz mening hayotimni ham shunday saqlasin. U meni har qanday balolardan asrasin.

²⁵— Dovud o‘g‘lim, Egamiz seni yorlaqasin, sen albatta buyuk ishlar qilasan, ulug‘ zafarlarga erishasan, — dedi Shoul. Shundan keyin Dovud o‘z yo‘liga ketdi, Shoul esa uyiga qaytdi.