Read O‘zbek tilidagi Muqaddas Kitob, 2013 1 Shohlar 27 Bible Online

1 Shohlar 27 - O‘zbek tilidagi Muqaddas Kitob, 2013 bible

1 Shohlar 27

¹Dovud: “Bir kun Shoulning qo‘lida nobud bo‘lsam kerak”, deb o‘ylardi. “Yaxshisi, Filistlar yerlariga qochib qolay. O‘shanda Shoul Isroilning har burchagidan meni qidirib yurishdan voz kechadi, men ham uning qo‘lidan qutulib qolaman.”

²Shunday qilib, Dovud va uning yonidagi olti yuz kishi oilalari bilan yo‘lga otlanib, Gat [1] shohi Oxish tomoniga o‘tib ketishdi. Shoh Oxish Moyux deganning o‘g‘li edi.

³Hammalari oilalari bilan birga Gatda Oxishning yonida joylashishdi. Dovud ham ikkala xotini — Yizrillik Oxinavam va Karmillik Navolning bevasi Obigayl bilan joylashdi.

⁴Shoul Dovudning Gatga qochib ketganini eshitgach, endi uni axtarmay qo‘ydi.

⁵Dovud Oxishga: — Agar men, qulingiz, sizning iltifotingizga sazovor bo‘lsam, yon–atrofdagi shaharlarning biridan menga joy bersangiz, men o‘sha yerda istiqomat qilayin, — dedi. — Qulingizning siz bilan birga shoh shahrida yashashiga hojat yo‘q.

⁶Oxish o‘sha kuni Dovudga Zixlax shahrini berdi. O‘shandan buyon Zixlax Yahudo shohlariga qarashli shahardir.

⁷Dovud Filistlar yurtida bir yilu to‘rt oy istiqomat qildi.

⁸Dovud odamlari bilan Geshir, Gezer va Omolek xalqlarining yeriga bostirib borardi. Bu elatlar uzoq zamonlardan beri Shurga va Misr chegarasigacha cho‘zilgan yerlarda yashab kelishardi.

⁹Dovud biror yurtni bosib olsa, erkak, ayol demas, tirik jonni sog‘ qo‘ymasdi. Faqat qo‘y, mol, eshak, tuya va kiyim–kechaklarni o‘lja olib, shoh Oxishning huzuriga qaytib kelardi.

¹⁰Oxish: “Bugun biron yerga bostirib bordingizlarmi?” deb so‘rasa, Dovud: “Yahudoning Nagav cho‘lidagi hududlarini bosib oldik”, yoki “Nagav cho‘lidagi Yaraxmal urug‘i yerlarini bosib oldik”, yoki “Nagav cho‘lidagi Xayin xalqi yerlarini [2] qo‘lga oldik”, deb javob berardi.

¹¹Dovud biror kimsani Gatga olib kelmas, “Dovud unday qildi, bunday qildi, deb aytmasin”, deya erkagu ayolni tirik qoldirmasdi. Dovud Filistlar yurtida yashagan paytda shunday qilardi.

¹²Oxish Dovudga ishonardi. “Dovud o‘z xalqi — Isroil xalqiga o‘zini dushman qilib qo‘ydi, bundan keyin to abad mening xizmatimda qoladi”, deb o‘ylardi.