Read O‘zbek tilidagi Muqaddas Kitob, 2013 1 Shohlar 29 Bible Online

1 Shohlar 29 - O‘zbek tilidagi Muqaddas Kitob, 2013 bible

1 Shohlar 29

¹Filistlar hamma sipohlarini Ofoqqa [1] yig‘di. Isroil lashkari esa Yizrildagi buloq yonida qarorgoh qurib, joylashib olgan edilar.

²Filist beklari yuz ming kishidan iborat to‘dalari bilan borishardi. Dovud va uning odamlari esa shoh Oxish bilan birga orqada kelayotgan edilar.

³Filist lashkarboshilari: — Anavi ibroniylar bu yerda nima qilib yuribdi? — deb so‘ragan edilar, Oxish shunday javob berdi: — Bu odam Isroil shohi Shoulning xizmatkori Dovud bo‘ladi. Necha oyu yillardan beri yonimda yuribdi. Men tomonga o‘tgandan buyon undan biror yomonlik ko‘rmadim.

⁴Lekin Filist lashkarboshilari Oxishga: — Bu odamni orqasiga qaytarib yuboring! — deyishdi jahl bilan. — Siz unga ajratib bergan joyga boraversin. Biz bilan urushga borishiga yo‘l qo‘ymang! Jang vaqtida bizga qarshi chiqishi mumkin. U oldingi xo‘jayiniga o‘zini qanday qilib yaxshi ko‘rsatishini bilasizmi? Odamlarimizning boshini unga tutib berishdan boshqa yaxshi yo‘l topa olarmidi?!

⁵Haligi: “Shoul minglarchasini o‘ldirdi, Dovud esa o‘n minglarchasini”, deb kuylab o‘ynab qo‘shiq aytgan edilar–ku. Bu o‘sha Dovudning o‘zginasi–ku.

⁶Oxish Dovudni yoniga chaqirib dedi: — Xudo haqi, sen yaxshi odamsan. Huzurimga kelganingdan beri biron noma’qul ish qilganingni ko‘rmadim. Men bilan birga urushga borishingni istardimu, ammo beklarimiz urushga borishingni ma’qul ko‘rishmayapti.

⁷Mayli, bu safar orqangga qayt, tinchgina ket, tag‘in Filist beklarining ko‘zi oldida birorta noma’qul ish qilib qo‘ymagin.

⁸— Axir, men nima qildim?! — dedi Dovud. — Huzuringizga kelganimdan beri mendan biror ayb topmadingiz–ku! Endi shoh hazratlarining g‘animlariga qarshi urushga nima uchun bormasligim kerak ekan?!

⁹— Bilaman, — dedi Oxish, — sen mening nazarimda Xudoning farishtasiday poksan. Lekin Filist lashkarboshilari, biz bilan urushga bormasin, deyishyapti.

¹⁰Endi sen va o‘zing bilan kelgan shohing Shoulning odamlari ertalab turinglar–da, tong otar–otmas jo‘nanglar.

¹¹Shunday qilib, Dovud odamlari bilan erta tongda turib, Filistlar hududiga qarab yo‘lga tushdi. Filistlar esa Yizrilga [2] jo‘nashdi.