Read O‘zbek tilidagi Muqaddas Kitob, 2013 1 Shohlar 30 Bible Online

1 Shohlar 30 - O‘zbek tilidagi Muqaddas Kitob, 2013 bible

1 Shohlar 30

¹Dovud odamlari bilan yo‘l yurib, uchinchi kuni o‘z shahri Zixlaxga yetib keldi. Bu orada Omolek xalqi Nagav cho‘liga [1], xususan, Zixlax shahriga ham bostirib kirgan, Zixlaxga o‘t qo‘yib, shaharni talon–taroj qilishgan ekan.

²Ular biror kimsani o‘ldirmay, u yerdagi ayollaru yosh–qarini asir olishib, oldilariga solib haydagancha, yo‘llariga qaytib ketishgan edi.

³Dovud odamlari bilan u yerga yetib borgach, shaharning alanga ichida qolganini, xotinlari, o‘g‘il–qizlarini asir olib ketishganini bildi.

⁴Ular holdan toyguncha dod–voy solib yig‘lashdi.

⁵Dovudning ikkala xotini — Yizrillik Oxinavam va Karmillik Navolning bevasi Obigayl ham asir olingan edi.

⁶Dovud yomon ahvolda qoldi, chunki har bir odam o‘g‘illari, qizlari uchun qayg‘urar, “Dovudni toshbo‘ron qilamiz”, deyishardi. Lekin Dovud o‘z Egasi Xudodan madad oldi.

⁷U Oximalekning o‘g‘li ruhoniy Abuatarga [2]: — Menga efodni keltir, Egamizning xohish–irodasini bilaylik, — dedi. Abuatar efodni olib keldi.

⁸Dovud Egamizdan: — Bu qaroqchilarning orqasidan quvib boraymi? Quvsam, yetib olamanmi? — deb so‘radi [3]. — Orqalaridan quv, ularga albatta yetib olib, asirlarni ozod qilasan, — dedi Egamiz.

⁹Shunday qilib, Dovud yonidagi olti yuzta odami bilan yo‘lga chiqib, Basor soyligiga yurish qildi.

¹⁰Ular soylikdan hali o‘tib bo‘lmagan ediki, ikki yuz kishi toliqib yiqilib, o‘sha yerda qoldi. Dovud qolgan to‘rt yuz kishisi bilan qaroqchilarni quvlab ketdi.

¹¹Cho‘lda bir Misrlikni topib, Dovudning oldiga keltirishdi. “Yeb, ichib ol”, deb unga non–pon berishdi.

¹²Bir hovuch anjir qoqi bilan ikki hovuch mayiz [4] ham berishdi. Haligi odam tamaddi qilib olgach, biroz jonlandi. U uch kechayu uch kunduz na tuz totgan, na suv ichgan edi.

¹³Dovud undan: — Sen kimning odamisan? Qayerdan kelyapsan? — deb so‘radi. — Misrlikman, Omolek urug‘idan bo‘lgan bir odamning quliman, — dedi yigit. — Uch kun oldin kasal bo‘lib qolgan edim, xo‘jayinim meni cho‘lda qoldirib ketdi.

¹⁴Nagav cho‘lidagi Xaret xalqi hududiga, Yahudo hududiga, Nagav cho‘lidagi Xolib urug‘i yerlariga bostirib borib, Zixlax shahriga o‘t qo‘ydik.

¹⁵— Meni o‘sha bosqinchilarning yoniga olib bora olasanmi? — deb so‘radi Dovud. — Seni o‘ldirmayman, xo‘jayiningning qo‘liga topshirmayman, deb Xudo nomi bilan ont ichsangiz, sizni o‘sha bosqinchilar oldiga olib boraman, — dedi yigit.

¹⁶Shunday qilib, Misrlik odam Dovudga yo‘l ko‘rsatib ketdi. Bosqinchilar dala bo‘ylab tarqalib, Filist va Yahudo yerlaridan talon–taroj qilib kelgan mo‘l–ko‘l o‘ljalarini yeb–ichib, xursandchilik qilishayotgan edi.

¹⁷Dovud ertasi kun kechqurungacha ularni qirdi. Tuyalarga minib qochgan to‘rt yuz yigitdan tashqari, ulardan birortasi ham qutulib keta olmadi.

¹⁸Shunday qilib, Dovud Omolek xalqi tortib olgan hamma narsalarini, jumladan, ikkala xotinini ham qaytarib oldi.

¹⁹Katta–kichikdan, o‘g‘il–qizlardan, o‘lja olingan mollardan, xullas, Omolek xalqi olib ketgan narsalardan birortasi qolib ketmadi. Dovud hammasini qaytarib oldi.

²⁰Dovud Omolek xalqining hamma mol–qo‘ylarini o‘lja qilib oldi. Dovudning odamlari o‘lja olingan mol–qo‘ylarni o‘zlarining mollari oldidan haydab ketar ekan: “Bular — Dovudning o‘ljalari”, deyishardi.

²¹Shundan keyin Dovud Basor soyligida toliqib orqada qolib ketgan ikki yuz kishi oldiga qaytdi. Ular ham Dovud bilan uning odamlarini kutib olgani chiqishdi. Dovud ularga yaqin kelgach, omonlik tiladi.

²²Lekin Dovud bilan borgan ba’zi yomon, yaramas odamlar: — Bular biz bilan birga bormadilarmi, endi o‘lja olingan narsalardan hech qanday ulush bermaymiz, har qaysisi faqat xotini bilan bolalarini olib ketsin, — deyishdi.

²³— Yo‘q, birodarlarim, — dedi Dovud, — bu narsalarni bizga Egamiz berdi, endi unday qilmanglar. Egamizning O‘zi bizni saqladi, ustimizga bostirib kelgan bosqinchilarni qo‘limizga berdi.

²⁴Sizlarning bu gapingizga kim rozi bo‘ladi? Urushga borganlar bilan anjomlar yonida qolganlarning ulushi birdir, har bir narsa teng bo‘linadi.

²⁵O‘sha kundan boshlab Dovud bu usulni Isroilda qonun–qoida holiga keltirdi, ushbu qonun bugungacha [5] davom etib kelyapti.

²⁶Nihoyat, Dovud Zixlaxga qaytdi. U o‘zining o‘rtoqlari — Yahudo oqsoqollariga tortib olingan o‘ljalardan jo‘natib: “Mana Egamizning g‘animlaridan tortib olingan o‘ljalardan sizlarga in’omlar”, deb aytib yubordi.

²⁷In’omlar quyidagi shaharlarning oqsoqollariga jo‘natildi: Baytil, Nagav cho‘lidagi Ramo‘t shahri, Yatir,

²⁸Aror, Sifmo‘t, Eshtamo‘va,

²⁹Raxol, Yaraxmal urug‘i va Xayin xalqining shaharlari,

³⁰shuningdek, Xo‘rmax, Bo‘r–Oshon, Otax

³¹va Xevron shaharlari. Dovud odamlari bilan kezgan yerlarning hammasiga o‘ljalardan jo‘natdi.