Read O‘zbek tilidagi Muqaddas Kitob, 2013 1 Shohlar 31 Bible Online

1 Shohlar 31 - O‘zbek tilidagi Muqaddas Kitob, 2013 bible

1 Shohlar 31

¹Filistlar esa shu paytda Isroil lashkari bilan jang qilishayotgan edi. Isroil lashkari Filistlarning oldiga tushib qochib, ko‘plari Gilbova tog‘ida [1] halok bo‘ldi.

²Endi Filistlar Shoul bilan uning o‘g‘illari ortidan tushdilar. Natijada Shoulning o‘g‘illari Yo‘natan, Abunadov va Malkishuva o‘ldirildi.

³Shoulning atrofida jang tobora avjiga chiqdi. Shu payt Filist kamonchilari Shoulga qarata o‘q otdilar. Shoul og‘ir yaralandi.

⁴U qurolbardoriga: — Qilichingni sug‘urgin–da, menga sanch, toki anavi sunnatsizlar kelib, menga qilich solib, xo‘rlamasinlar, — dedi. Lekin qurolbardori qo‘rqdi, Shoulning aytganini qilmadi. Shunda Shoul qilichini qinidan sug‘urib, o‘zini qilich ustiga tashladi.

⁵Qurolbardori ham Shoulning halok bo‘lganini ko‘rib, o‘zini qilichi ustiga tashlab, Shoul bilan birga o‘ldi.

⁶Shunday qilib, Shoul, uning uchala o‘g‘li, qurolbardori va hamma sipohlari bir kundayoq halok bo‘lishdi.

⁷Yizril vodiysining [2] naryog‘ida va Iordan daryosining sharq tomonida yashaydigan Isroil xalqi o‘z sipohlarining qochganini, Shoul bilan o‘g‘illari o‘lganini ko‘rishdiyu, shaharlarini tashlab qochishdi. Filistlar bu shaharlarga kelib o‘rnashib olishdi.

⁸Ertasi kuni Filistlar halok bo‘lganlarni talon–taroj qilgani jang maydoniga kelishdi. Birdan ular Gilbova tog‘ida Shoul bilan uchala o‘g‘lining jasadi yotganini ko‘rib qolishdi.

⁹Ular Shoulning boshini kesib, qurollarini olishdi. Filistlar bosib olgan yerlariga xabarchilar yo‘llab, bu xushxabarni butxonalariga, xalqqa eshittirishdi.

¹⁰Shoulning qurol–aslahasini Ashtaret [3] uyiga qo‘yishdi, jasadini esa Bayt–Shan shahrining devoriga qoqib qo‘yishdi.

¹¹Giladdagi Yobosh [4] aholisi Filistlarning Shoulni qanday ahvolga solganini eshitib qolishdi.

¹²Shunda hamma jasur yigitlar tun bo‘yi yurib, Bayt–Shanga borishdi. Shoul bilan o‘g‘illarining jasadlarini Bayt–Shan devoridan olib, Yoboshga olib borishdi va u yerda kuydirishdi.

¹³Suyaklarini yig‘ishtirib, Yoboshdagi tamarisk daraxti [5] tagiga dafn qilgach, yetti kun ro‘za tutishdi [6].