Read O‘zbek tilidagi Muqaddas Kitob, 2013 1 Shohlar 7 Bible Online

1 Shohlar 7 - O‘zbek tilidagi Muqaddas Kitob, 2013 bible

1 Shohlar 7

¹Shundan keyin Xirat–Yorim aholisi borib, Egamizning sandig‘ini oldi. Uni Abunadovning tepalikdagi uyiga olib kelishdi. Egamizning sandig‘ini avaylab saqlasin, deb Abunadovning o‘g‘li Elazarni shu vazifaga tayinlab, poklashdi.

²Sandiq uzoq vaqt — yigirma yilcha Xirat–Yorimda qolib ketdi. Bu orada butun Isroil xalqi Egamizga talpindi.

³Shomuil jamiki Isroil xalqiga dedi: — Agar chin dildan Egamizga qaytmoqchi bo‘lsangiz, hamma begona xudolarni va Ashtaret tasvirlarini orangizdan yo‘qoting. Ko‘nglingizni Egamizga berib, yolg‘iz Unga xizmat qiling. Ana shunda Egamiz sizlarni Filistlarning qo‘lidan qutqaradi.

⁴Isroil xalqi Baal va Ashtaret tasvirlarini yo‘q qilib, faqat Egamizga xizmat qila boshlashdi.

⁵O‘shanda Shomuil: — Butun Isroil xalqi Mispaxda [1] to‘plansin, men u yerda Isroil xalqi uchun Egamizga iltijo qilaman, — dedi.

⁶Mispaxda to‘plangan Isroil xalqi quduqdan suv tortib, Egamizga nazr qilib to‘kishdi. “Egamiz oldida gunoh qildik”, deb o‘sha kuni ro‘za tutishdi. Shomuil Mispaxda Isroil xalqiga hakamlik qila boshladi.

⁷Filistlar Isroil xalqining Mispaxda to‘planganini eshitib qolishdi. Filist beklari, Isroil xalqi bilan urishamiz, deb otlanishdi. Isroil xalqi buni eshitib, Filistlardan qo‘rqib ketishdi.

⁸Ular Shomuilga: — Biz uchun Egamiz Xudoga tinimsiz iltijo qiling, toki U bizni Filistlarning qo‘lidan qutqarsin, — deyishdi.

⁹Shu boisdan Shomuil bir emadigan qo‘zichoq olib, Egamizga kuydiriladigan qurbonlik qildi. So‘ng Isroil xalqi uchun Egamizga nolayu faryod bilan iltijo qildi. Egamiz uning iltijosini eshitdi.

¹⁰Shomuil kuydiriladigan qurbonlikni ado etayotgan edi, Filistlar Isroil lashkariga hujum qilmoqchi bo‘lib yaqin keldilar. Ammo o‘sha zahoti Egamiz vahimali ovoz chiqarib, Filistlarni shunday sarosimaga soldiki, Isroil lashkari ularni mag‘lub qildi.

¹¹Isroil lashkari Mispaxdan chiqib, Filistlarni Bayt–Kor degan yerning etagigacha quvib borib o‘ldirdilar.

¹²Shomuil bir toshni olib, Mispax bilan Yashono orasiga o‘rnatdi. “Egamiz bizga butun yo‘l bo‘yi yordam berdi”, deya toshga Evanzor [2] deb nom berdi.

¹³Mag‘lub bo‘lgan Filistlar Isroil hududiga qaytib hujum qilishmadi. Shomuil hayotligida Isroil xalqi Filistlarga hujum qilganda, Egamiz madad berib turdi.

¹⁴Exrondan Gatga qadar Filistlar qo‘lga kiritgan shaharlarning hammasini Isroil xalqi yana qaytarib oldi. Shunday qilib, Isroil xalqining hamma yerlari Filistlardan ozod bo‘ldi. Isroil xalqi bilan Amor xalqlari [3] orasida sulh tuzildi.

¹⁵Shomuil umr bo‘yi Isroilga hakamlik qildi.

¹⁶U har yili Baytil, Gilgal, Mispaxni aylanar, bu shaharlarda turib, Isroilni boshqarardi.

¹⁷Keyin Rama shahridagi uyiga qaytar va o‘sha yerda turib Isroilga hakamlik qilardi. Shomuil Ramada Egamizga atab bir qurbongoh qurdirdi.