Read O‘zbek tilidagi Muqaddas Kitob, 2013 1 Shohlar 9 Bible Online

1 Shohlar 9 - O‘zbek tilidagi Muqaddas Kitob, 2013 bible

1 Shohlar 9

¹Benyamin qabilasida Kish degan bir odam bor edi. Kish — Abilning o‘g‘li, Abil — Zarorning o‘g‘li edi. Zaror — Baxuratning, Baxurat — Ofiyoxning o‘g‘li edi. Benyamin qabilasidan bo‘lgan Kish ancha obro‘li odam edi.

²Uning Shoul degan yosh, chiroyli bir o‘g‘li bor edi. Isroil xalqi orasida Shouldan chiroyli odam yo‘q edi. Har qanday odamning bo‘yi uning yelkasidan kelardi.

³Bir kuni Kishning eshaklari yo‘qolib qoldi. Kish o‘g‘li Shoulga: — Xizmatkorlardan birini yoningga olgin–da, borib, eshaklarni topib kel, — dedi.

⁴Shoul Efrayim qirlarini, so‘ng Sholisho yerlarini aylanib chiqdi. Ammo eshaklarni topa olmadi. Keyin Shalim yerlariga o‘tdi, eshaklar u yerda ham yo‘q ekan. So‘ngra Benyamin hududini kezib chiqdi, eshaklarni u yerdan ham topa olmadi.

⁵Zuf degan joyga borishgach, Shoul yonidagi xizmatkoriga: — Bo‘ldi endi, orqaga qaytamiz, bo‘lmasa, eshaklar qolib, otam bizdan xavotirlanadi, — dedi.

⁶— Endi bunday qilsak, — dedi xizmatkori, — shu shaharda bir payg‘ambar bor, u obro‘li odam. Hamma aytganlari vojib bo‘ladi. O‘sha odamnikiga borsak, balki boradigan yo‘limizni u bizga ko‘rsatar.

⁷— Agar borsak, unga nima olib boramiz? — deb so‘radi Shoul. — To‘rvalarimizdagi non tugadi. Payg‘ambarga olib boradigan biror hadyamiz yo‘q. Nimamiz qoldi?

⁸— Mana, menda bir kumush tanga [1] bor, — dedi xizmatkor. — Buni payg‘ambarga beraman, boradigan yo‘limizni u bizga ko‘rsatadi.

⁹(Qadimda Isroilda kimdir Xudoning xohish–irodasini bilmoqchi bo‘lsa, “Qani, valiyga boramiz”, derdi. Bugungi payg‘ambar o‘sha vaqtda valiy deyilardi.)

¹⁰Shoul xizmatkoriga: — Ma’qul, qani, ketdik, — dedi. Shunday qilib, ular payg‘ambar yashaydigan shaharga jo‘nadilar.

¹¹Shahar tepalikda joylashgan edi. Ular shaharga boradigan qiya yo‘ldan ketayotganlarida, quduqdan suv olishga kelgan qizlarga duch kelishdi. Ular qizlardan: — Valiy shu yerdami? — deb so‘rashdi.

¹²Qizlar javob berishdi: — Ha, ana oldingizda! Faqat tezroq boringlar, shahrimizga bugun keldilar. Bugun tepalikdagi sajdagohda xalq qurbonlik keltiradi.

¹³Shaharga kirishingiz bilanoq, uni topasizlar. U sajdagohga taom yeyishga kelmoqda. Valiy kelib, qurbonlikni tabarruk qilmaguncha, xalq taom yemaydi. Taklif qilinganlar u kelgandan keyingina taom yeydi. Hozir borsalaringiz, uni darrov topasizlar.

¹⁴Shoul bilan xizmatkori shaharga kelishdi. Shaharga kirganlarida, sajdagohga chiqishga taraddud ko‘rayotgan Shomuil ular tomonga kelayotgan ekan.

¹⁵Shoul kelmasdan bir kun oldin, Egamiz Shomuilga shuni ayon qilgan edi:

¹⁶“Ertaga shu vaqtda sening oldingga Benyamin yurtidan bittasini yuboraman. Uning boshiga moy surtib tanla. U xalqim Isroilning hukmdori bo‘lsin. Xalqimni Filistlar qo‘lidan u qutqaradi. Xalqimning ahvoliga nazar soldim, ularning ohu fig‘oni Menga yetib keldi.”

¹⁷Shomuil Shoulni ko‘rgach, Egamiz unga: “Ana Men senga aytgan odam, Mening xalqimga u rahnamolik qiladi”, — dedi.

¹⁸Shoul shahar darvozasi oldida Shomuilga yaqinlashib so‘radi: — Marhamat qilib ayting–chi, valiyning uyi qayerda?

¹⁹— Valiy menman, — dedi Shomuil. — Mendan oldin sajdagohga chiq. Bugun men bilan birga taom yeysizlar. Ertaga ertalab dilingdagi hamma narsani senga aytib, keyin o‘zim kuzatib qo‘yaman.

²⁰Isroil xalqining umidi sendan va sening xonadoningdan ekanini o‘zing bilishing zarur. Uch kun oldin yo‘qolgan eshaklaring uchun qayg‘urma. Ular topildi.

²¹— Men Isroil qabilasining eng kichigi bo‘lgan Benyamin qabilasidanman–ku! Men mansub bo‘lgan urug‘ Benyamin qabilasining hamma urug‘idan eng kichigi bo‘lsa, menga nima uchun bunday gaplarni aytyapsiz? — dedi Shoul.

²²Shomuil Shoul bilan xizmatkorini o‘sha yerdagi xonaga olib bordi. Chaqirilganlar taxminan o‘ttiztacha edi. Eng to‘riga Shoul bilan xizmatkorini o‘tqazdi.

²³Keyin oshpazga: — Men senga, bir chetga olib qo‘y, deb ulush bergan edim–ku, o‘sha ulushni keltir, — dedi.

²⁴Oshpaz o‘ng son go‘shtini olib kelib, Shoulning oldiga qo‘ydi. — Mana, sen uchun ajratib qo‘yilgan ulush, marhamat, ye! — dedi Shomuil. — Bu ulushni belgilangan kunda o‘zim chaqirgan xalqim bilan birga yeysan, deb senga saqlab qo‘ygan edim. O‘sha kuni Shoul Shomuil bilan taom yedi.

²⁵So‘ngra ular sajdagohdan shaharga tushishdi. Shomuil uyining tomida Shoul bilan suhbatlashdi [2].

²⁶Sahar payti Shomuil tom ustida yotgan [3] Shoulni chaqirib: — Bo‘la qol! Seni kuzatib qo‘yaman, — dedi. Shoul o‘rnidan turib, Shomuil bilan birga tashqariga chiqdi.

²⁷Shahar chekkasiga yaqinlashganlarida, Shomuil Shoulga dedi: — Xizmatkoringga ayt, u bizdan oldinroq yursin. Sen orqaroqda qol, senga Xudoning kalomini aytaman.