Read Ozolotepec Zapotec Mateo 10 Bible Online

Mateo 10 - Ozolotepec Zapotec bible

Mateo 10

¹Tsa mrez Jesús re tsiibchop nee kuu ngeteed lo Jesús ne mndaa Jesús yalnabee lo nee, par koo nee re mbi fyer kuu nzo leettsoo re men, ne tegwe nee relota yiz ne relota yalne.

²Tenzhee le re tsiibchop nee kuu mteed lo Jesús kuu noga le apóstl:Simún (kuu noga le Pey),Ndres (wets Pey),Santiag,Juan (wets Santiag, rop zha ree nak xgann Zebedeo),Lip,Bartolomé,Mach,Mateo (kuu nak na, kuu mthop temi kuu nzhax lo zha Roma),Santiag (xgann Alfeo),Lebeo (kuu noga ni zha lo Tadeo),Simún (kuu ngoo xid partid zha Canaán) neJudas Iscariote (kuu mndaa Jesús lo re zha par mbeth zha Jesús). Jesús mtaal re tsiibchop zha tsa ya zha loo zha lo re men (Mr. 6:7‑13; Lc. 9:1‑6)

⁵Tsa mtaal Jesús re tsiibchop nee ne tenzhee ne Jesús lo re nee: ―Yat goo laz re zha kuu nagt tawlazaa, neeka re yez chaan re zha Samaria.

⁶Gwa goo lo re tawlazaa zha Israel, zha kuu mndab xnet Diox, zha kuu nak taxal re mbak zhiil kuu mndab lo bzhaan.

⁷Gwa goo ne gab goo, lee wiz kuu nabee Diox mzin gaxa.

⁸Btegwe goo re mbyiz, teroban goo re zha nguth, btegwe goo re zha kuu ndeye kwerp, ne bloo goo mbi fyer leettsoo re men kuu nzo mbi fyer leettsoo. Por yalwen chaan Diox mkayaa goo yalnabee ree; kona ndoblot tsow goo kobral por tsow goo re koree.

⁹’Gwet goo temi.

¹⁰Neeka gwet goo bols kuu yo re chaan goo, neeka tedib net lar kuu gok goo, neeka tedib net labyid kuu ke nii goo, neeka aga gwet goo, tak lee zha kuu nke tsiin ndoblo zha gax lo zha.

¹¹’Leettsa tsin goo thib yez o thib ranch, kwaan goo liz thib zha kuu ndoblo zha kwet goo liz zha, ne tya kwet goo asta or kuu roo goo yeza.

¹²Or kuu tsin goo thib yuu bni goo “diox” lo zha ne guz goo lo zha, lee Diox tsow wen kwin goo liz goo ne bzhen goo yaa re zha kuu nzo yuuʼa.

¹³Ne os lee re zha kuu nzo yuuʼa, ndoblo zha lee Diox tsow wen kwin zha liz zha, tsa lee kuu gab goo lo zha, take lo zha; per os lee zha ndoblot zha tsow Diox wen kwin zha liz zha, gagte lo zha.

¹⁴Ne os lee zha kayaat zha goo ne tyalt zha gon zha kuu gab goo, broo goo yuuʼa o yeza ne btsib goo yuyaaz kuu mke nii goo.

¹⁵Wlipaa na nin lo goo, leettsa naab Diox kwent lo re men, lee yalti kuu rid re zha yeza, gak masraa nati nake yalti kuu rid re men rop yez kuu ngoo ndala kuu le Sodoma ne Gomorra, rop yez kuu mluux Diox kon ki. Yalti kuu rid goo kwent chaan da

¹⁶’¡Wii goo! Na taal goo yataa goo kwent chaan Diiz Chul, taxal mbak zhiil xid re mbeez kuu nayii, kona list gok goo taxal mbeel ne nadoo gok goo taxal palom.

¹⁷Bkenap goo goo lo re men, tak teno zha goo lo re zha kuu nataak lo re Israel, ne kin zha goo ta nkaltaa reʼaa nteedaa xkiiz Diox.

¹⁸Ne teno zha goo lo re zha kuu nak gobyern ne lo re rey kwent chaan da, tata tak taa goo kwent chaan da lo re zha gobyern ne lo re zha kuu nagt zha Israel.

¹⁹Per leettsa taa zha goo lo re zha nak tsiin, tsowt goo xgab naa kwan kab goo lo zha ne xomod gab gooy, tak ora lee Mbi Nayon taa diiz kuu kab goo lo zha,

²⁰tak nagt goo kuu ni ora, sinke lee Mbi Nayon chaan Xutaa kuu nzo leettsoo goo ni ora.

²¹’Ne leeka wets zha kuu nyelaazt Diox, taa zha lo re zha nak tsiin tsa kuth zha zha, ne tataka tsow xut zha kon xgann zha. Lee re zhiinn zha yii ne xut ne xnaa, ne taa zhiinn zha zha lo re zha kuu nlaaz kuth zha.

²²Reta men yii ne goo tak nak goo zha da. Per lee zha kuu xek rid re koree asta bluz, zhaʼa tsow gan yalnaban kuu thitanax.

²³Per leettsa reke zha dits goo thib yez, bzhonn goo ne tyaa goo tedib yez ne noga tya taa goo kwent chaan da. Tak wlipaa na nin, tsowt goo gan yataa goo kwent chaan da, reta yez kuu nak chaan reʼaa zha Israel, leettsa lee na Kuu Mzin Ngok Men bretab.

²⁴’Neeka thib zha kuu ngeteed nataagt zha masraa nake maestr zha, ne tataka neeka thib zha kuu nke tsiin, nataagt zha masraa nake patron zha.

²⁵Kona lee zha kuu ngeteed, ndoblo wen yo leettsoo zha, tsow re men lo zha taxal ntsow re men lo maestr zha, ne leeka tata lee mos, ndoblo wen yo leettsoo mos, tsow re men lo mos taxal ntsow re men lo patron mos. Ne os lo na kuu nak taxal mndan thib yuu ni zha lo Beelzebú kuu nabee lo re mbi fyer. ¡Kwanpaa gabt zha lo re goo kuu nak goo taxal zhiinn mndan yuu! Cho lo ndoblo tseb men (Lc. 12:2‑9)

²⁶’Ne tsebt goo ne goo re men kuu ndreke dits goo, tak ndaa goo kwent xkizʼn. “Tak neeka thib kuu ntsow zha xlaanta gagt loote, ne tataka neeka thib kuu ntsow zha xgaatsta gagt loote”.

²⁷Kona loka kuu mnin lo goo xgaatsta, taxal re kuu ndediz xlaan zha ta nakow, tse guz gooy lo reta men; ne lee re kuu mnin lo thita goo, kendab goo yek yuu ne nex guz gooy lo reta men.

²⁸Tsebt goo ne goo re zha kuu nzhuth kwerp, tak gagt kuth zha xbi goo. Btseb goo ne goo Diox, tak Diox tak kib yalnaban goo ne ko xbi goo ne kwerp goo kuu kub gabil.

²⁹’Wii goo, ¿chu nthot zha chop min bzhizh por thap rehal? Per leen ni lo goo, neeka thib min lat lo yezlyu ree os lee Xutaa Diox kuu ndob yibaa taat diize.

³⁰Diox nlebee reta goo, asta re yitsek goo nak kwent lo Diox.

³¹Kona tsebt goo ne goo re zha kuu mbez kuth goo, tak masraa nataak goo nake naroob min bzhizh.

³²’Os lee thib zha gab zha lo re men lee zha nak zha da, noga na gapʼn lo Xutʼn kuu ndob yibaa lee zha nak zha da.

³³Per lee zha kuu gabt lo re men lee zha nak zha da, noga na gapʼn lo Xutʼn kuu ndob yibaa lee zha nagt zha zha da. Myaadt Jesús tsa wen kwin re men (Lc. 12:51‑53; 14:26‑27; Mr. 9:41)

³⁴’Tsowt goo xgab leen ndyal, tsa wen kwin re men lo yezlyu ree. Ndyaltʼn tsa wen kwin re men lo yezlyu ree; sinke chakʼn ndyal kona lee re zha kuu nyelaazt na kuth re zha kuu nyelaaz na.

³⁵Tak por kuu nloon tsow yo re zha kuu nyelaazt na, kon re zha liz zha kuu nyelaaz na, lee re mbyi yo kon xut, ne tataka lee re nzaa yo kon xnaa, ne lee zhizh zha yo kon xnaatsaap zha.

³⁶Leeka re zha liz zha yii ne zha.

³⁷’Ne loka zha kuu mas nke leettsoo xut ne xnaa nake na, ndoblot zhaʼa gak zha zha da, ne loka zha kuu mas nke leettsoo xgann o rtsaap nake na, ndoblot zhaʼa gak zha zha da,

³⁸ne loka zha kuu kot leettsoo thib gath, tak ndeke zha ditsʼn, ndoblot zha gak zha zha da.

³⁹Zha kuu nzeb gath tak nyelaaz zha na lo yezlyu ree, tath zha ne tsowt zha gan yalnaban kuu thitanax, per lee zha kuu nzebt gath lo yezlyu ree, tak nyelaaz zha na, zhaʼa tsow gan yalnaban kuu thitanax.

⁴⁰’Zha kuu nkayaa goo noga na nkayaa zha. Ne lee zha kuu nkayaa na, noga nkayaa zha, zha kuu mtaalʼn.

⁴¹Loka zha kuu nkayaa thib profet, tak ne zha nak zha zha Diox, zhaʼa kayaa lo Diox leeka kuu kayaa profet lo Diox; ne loka zha kuu kayaa thib zha kuu nali nak, tak ne zha nali nak zha, zhaʼa kayaa lo Diox leeka kuu kayaa zha kuu nali naka lo Diox.

⁴²Ne loka cho zha kuu taa thib kuu ndeche goo, tegal beeta thib bas nit kuu gu goo, tak nak goo zha da, wlipaa na nin, noga lo zhaʼa tataa Diox kuu tsow zha gan.