Read Ozolotepec Zapotec Mateo 12 Bible Online

Mateo 12 - Ozolotepec Zapotec bible

Mateo 12

¹Ne re wiza thib wiz sabd, nda Jesús kon re zha kuu ngeteed lo Jesús, mriid re zha thib ta ndab xtil. Tsa lee re zha kuu ngeteed lo Jesús mlann, ne mndelo re zha mthop zha ton nzobxtil, mtembi zhay ne ndow zhay.

²Ne lee re fariseo mwii kona, tsa nzhab zha lo Jesús: ―Wii lee re zha kuu ngeteed loʼa, ngetsow thib kuu ndoblotaa tsowaa wiz kuu ndroxkwanaa.

³Tsa lee Jesús mkab ne nzhab: ―¿Chu ter lab goo xkeets Diox naa kwan mtsow rey David, leettsa mlann David kon re zha kuu nda kon David?

⁴Mndaab David leen gwodoo chaan Diox, ne ndow David re pan nayon kuu ndoblot David wu David, ne noga mndaa Davide ndow re zha kuu nda kon David, pan kuu beeta re ngwleyy ndoblo wu.

⁵Ne, ¿chu ter lab goo ley chaan Moisés ta nzhab, lee re ngwleyy mbint ngwleyy diiz kuu nabee ley, tak mke ngwleyy tsiin leen gwodoo chaan Diox wiz sabd, ne mndaat ngwleyy falt?

⁶Per lee na ni lo goo, nzhee ndo thib zha kuu mas nataak nake gwodoo chaan Diox.

⁷Nyent goo kuu nzhab lo xkeets Diox ta nzhab: “Kuu nlazʼn nak, lat leettsoo goo ne goo taben goo, ne nlaztʼn kuth goo beeta maa par taa goo gon lon”. [Os. 6:6] Ne os gayen gooy, gakekit goo zha kuu ntsow kuu wen.

⁸Ngenin re koree lo goo, tak na nak xgann mbyi, Kuu Mzin Ngok Men, ne napʼn yalnabee nabeen lo wiz sabd. Jesús mtegwe thib mbyi kuu mbiz yaa (Mr. 3:1‑6; Lc. 6:6‑11)

⁹Tsa mroo Jesús tya, ne ngwa Jesús ta nkaltaa re zha Israel nteed xkiiz Diox.

¹⁰Ne tya ndo thib mbyi kuu mbiz yaa. Ne kom nkwaan re zha mod keki zha Jesús, tsa nzhab zha lo Jesús: ―¿Chu ndoblo tegwe men thib zha wiz kuu ndroxkwanaa?

¹¹Ne lee Jesús nzhab: ―Os lee thib goo nap thib mbak zhiil ne la maa leen pos wiz sabd, ¿chu koot goo maa?

¹²Per lee na ni lo goo mas nataak thib men nake thib mbak zhiil. Kona wen tsow men kuu wen lo thib men wiz sabd.

¹³Tsa nzhab Jesús lo mbyi kuu mbiz yaa: ―Bteli yaaʼa. Tsa mteli mbyi yaa mbyi, ne mgwe yaa mbyi taxal tedibe.

¹⁴Tsa oraaka mroo re fariseo ne myaan re zha diiz kuth zha Jesús, tak myet roo zha lo Jesús. Jesús mtegwe naroob men

¹⁵Per lee Jesús myeen naa kwan mtsow re zha xgab tsow zha. Tsa mroo Jesús tya ne naroob men mndeke dits Jesús, ne mtegwe Jesús reta mbyiz kuu nzo xid re mena.

¹⁶Ne nzhab Jesús lo re zhaʼa, tsa yent cho lo gab zha naa cho nak Jesús.

¹⁷Koree ngok, tsa mrolo kuu nzhab profet Isaí, leettsa nzhab profet kuu nzhab Diox kwent chaan Crist:

¹⁸Zha ree nak mos da, kuu mlin,kwathoz nke leettsoon zha, ne kwathoz wen nzo leettsoo nen zha.Taalʼn Mbi Nayon chaan da lo zha,ne taa zha kwent re kuu nali ne kuu wen lo re zha kuu nagt zha Israel.

¹⁹Neeka kab root zha, neeka kwez gutht zha,ne yent cho gon kuu ni zha re net.

²⁰Ne neeka gat zha nith kuu ngots,ne neeka tuyyt zha doo zer kuu penta mke,asta yelo tsow zha, tsow kuu wen gan lo kuu went.

²¹Ne reta zha kuu nagt zha Israel ngebet yelaaz zha,zha kuu telaa zha. [Is. 42:1-4] Nkeki zha Jesús lee Jesús nap yalnabee chaan Maxuuy (Mr. 3:20‑30; Lc. 11:14‑23; 12:10)

²²Tsa ngwano zha thib mbyi kuu nzo mbi fyer leettsoo lo Jesús, syeg zha ne mud zha. Ne mtegwe Jesús zha, tsa mwii zha ne mndediz zha.

²³Reta men mzegey leettsoo, ne nzhab: ―¿Chu nagt zha ree, zha raz chaan rey David?

²⁴Per leettsa mbin re fariseo kona, tsa nzhab re zha: ―Beelzebú kuu nak Maxuuy kuu nabee lo re mbi fyer, mndaa yalnabee lo zha, tsa nabee zha lo re mbi fyer.

²⁵Per lee Jesús neʼa naa kwan ntsow re zha xgab, tsa nzhab Jesús: ―Reta yez naro ne re yez bzhizh, ne asta thib yuu kuu nzhak rol zha, gaxta ndo luzhe.

²⁶Ne tataka, os leeka Maxuuy koo Maxuuy, tsa leeka Maxuuy yo kon leeka Maxuuy, xegt yalnabee chaan Maxuuy naroob, os tatay.

²⁷Re goo ni lee na ngo mbi fyer kon yalnabee chaan Beelzebú, os leey tata nake, noga re zha kuu ngeteed lo goo ngoo mbi fyer kon yalnabee chaan Beelzebú. Kona leeka re zhaʼa nloo ngobeet goo kuu ni goo.

²⁸Per os leen ngon mbi fyer por yalnabee chaan Mbi Nayon chaan Diox, koree nloo lee wiz kuu nabee Diox lo goo mzin gaxa.

²⁹’Gagt tab thib zha liz tedib zha kuu kwathoz ney par kib zha chaan zhaʼa, os ter liib zha zha. Tak os lee zha tsowt zhay gagt kib zha chaan zhaʼa.

³⁰Re zha kuu nyelaazt lee na ngo mbi fyer kon yalnabee chaan Mbi Nayon, nzot zhaʼa fabor da ne zhaʼa nayii nen; ne re zha kuu nket tsiin kon na re zhaʼa nluux rtsin na.

³¹’Tak nyelaazt goo lee Mbi Nayon chaan Diox ntsow ngon re mbi fyer, kona nin lo goo tetuyy Diox reta falt kuu ntsow men, leettsa ngode men re zha, per tuyyt Diox falt kuu ngode men lo Mbi Nayon.

³²Ne tetuyy Diox re falt kuu ngode men na, Kuu Mzin Ngok Men, per lee men kuu ngode lo Mbi Nayon, tuyyt Diox falt zhaʼa, neeka lo yezlyu ree ne neeka lo tedib yezlyu kuu yo. Lee ya nabee ya por xle kuu ndaa ya (Lc. 6:43‑45)

³³’Ne ndoblo ne goo, lee ya wen ndaa xle wen, ne lee ya went ndaa xle went, tak reta ya nabee ya por xle kuu ndaa ya.

³⁴¡Goo nak zha raz mbeel! Went nak goo, kona gagt ni goo kuu wen; tak kuu nzo leettsoo men ndroo roo men.

³⁵Tak lee zha wen kuu wen ni zha, tak kuu wen nzo leettsoo zha, per lee zha kuu went kuu went ni zha, tak kuu went nzo leettsoo zha.

³⁶Kona nin lo goo, leettsa tsin wiz kuu naab Diox kwent lo reta men, asta re diiz kuu legaʼa ni goo, taa goo kwent lo Diox ora.

³⁷Tak por re diiz kuu ni goo naab Diox kwent lo goo, tsa ne Diox naa chu ndab goo falt o ndabt gooy. Lee re men mnaab thib seny thoz lo Jesús (Mr. 8:12; Lc. 11:29‑32)

³⁸Tsa lee chop tson fariseo ne chop tson maestr kuu nloo xkiiz Diox, nzhab lo Jesús: ―Nlaaz nee wii nee tsowa thib seny thoz kuu gagt tsow re men yezlyu ree.

³⁹Jesús mkab ne nzhab: ―Lee re men tyemp ree kuu thitanax went nak ne mlaa Diox, nlaaz zha thib seny thoz, per neeka thib seny loot lo re zha, beeta seny chaan profet Jonás zha ndala loo lo re zha.

⁴⁰Tak leeka taxal ngoo Jonás leettsoo thib mbel, kuu kwathoz naro, tson wiz ne tson yaal, tataka lee na Kuu Mzin Ngok Men, yoon tson wiz ne tson yaal leen yezlyu.

⁴¹Leettsa naab Diox kwent lo re men wiz bluz, tsya teti Diox re goo, tak mlaat goo re kuu went kuu ntsow goo, ne telaa Diox re zha kuu ngoo yez Nínive, tak mbin re zhaʼa diiz xkiiz Jonás ne mlaa zha re kuu went kuu mtsow zha. Ne ndoblo ne goo, nzhee ndon ne na nak thib zha kuu mas nataak nake Jonás.

⁴²Ne lee wiz kuu naab Diox kwent lo re men, tsya teti Diox re goo, tak mlaat goo re kuu went kuu ntsow goo, ne telaa Diox ngot kuu mnabee re yez kuu nzi lad Sur, tak kwathoz tith mroo zha ne ngwa zha lo Salomón, tak nlaaz zha gon zha yalnzhaak chaan Salomón. Ne noga ndoblo ne goo nzhee ndon ne na nak thib zha kuu masraa nataak nake Salomón. Mbi fyer kuu ndretab (Lc. 11:24‑26)

⁴³’Leettsa lee thib mbi fyer ndroo leettsoo thib zha, tsa nda mbi ndiy mbi thib ta yubiz, nkwaan mbi thib ta roxkwan mbi, ne mzalt ta roxkwan mbi, tsa ntsow mbi xgab:

⁴⁴“Bretabʼn leeka ta mroon”. Ne leettsa mzin mbi ta mroo mbi, ne mzal mbi mbyiʼa, taxal thib yuu kuu nalath kuu wen nalob ne nambi na.

⁴⁵Tsa nda mbiʼa ndaxii tedib gaz mbi kuu masraa went nake mbiʼa, ne ndretab mbi ta ngoo mbi ner. Tsa lee zhaʼa masraa nakap nzhak nake taxal ngok zha ner. Leeka tata gak kon re zha tyemp ree, zha kuu kwathoz nakap nak. Xnaa Jesús ne re wets Jesús (Mr. 3:31‑35; Lc. 8:19‑21)

⁴⁶Leettsa bee ngenika Jesús lo re men, lee xnaa Jesús ne re wets Jesús mzin tya, tak nlaaz re zha tediz zha kon Jesús. Ne mlet re zha lee.

⁴⁷Tsa lee thib zha nzhab lo Jesús: ―Lee xnaaʼa kon re wetsa nzi lee, ne nlaaz zha tediz zha loʼa.

⁴⁸Per lee Jesús nzhab lo zhaʼa: ―¿Cho nak xnaan ne re wetsʼn?

⁴⁹Tsa mwii Jesús lo re zha kuu ngeteed lo Jesús, ne nzhab Jesús: ―Re zha ree nak taxal xnaan ne re wetsʼn ne re btan na.

⁵⁰Tak re zha kuu ntsow kuu nlaaz Xutʼn kuu ndob yibaa, zhaʼa nak taxal wetsʼn btan na ne xnaan.