Read Ozolotepec Zapotec Mateo 14 Bible Online

Mateo 14 - Ozolotepec Zapotec bible

Mateo 14

¹Re wiza lee Herodes kuu mnabee dita yezlyu Galilea, mbin re kuu mtsow Jesús.

²Tsa nzhab rey Herodes lo re zha kuu nke tsiin lo rey: ―Juan kuu mtsowleyy re men nak zhaʼa; mroban zha xid re zha nguth; kona nap zha yalnabee ntsow zha re kuu thoz.

³Tata nzhab Herodes, tak lee Herodes mnabee mzhen zha Juan ne mloo zha Juan tsib, kwent chaan Herodías tsaal Lip kuu nak wets Herodes.

⁴Tak lee Juan nzhab lo rey Herodes: ―Went kenoʼa tsaal wetsa.

⁵Ne ngwalaaz Herodes aguth Juan, per nzeb rey ne re men yez, tak reta men nyelaaz lee Juan nak profet.

⁶Ne leettsa mzaal rey liin, tsa mtsow rey thib ani, ne lee rtsaap Herodías mkani lo re zha kuu nzi tya, ne kwathoz myow leettsoo rey xa mkani nzaa,

⁷tsa mtselo rey kruz lo nzaa ne nzhab rey: ―Naab loka kuu nlaaza lon, na taay.

⁸Tsa mnaabdiz nzaa lo xnaa nzaa, tsa naa kwan ndoblo naab nzaa, tsaraa nzhab nzaa lo rey: ―Taa yek Juan kuu ntsowleyy lon, leen thib yann.

⁹Tsa kwathoz nabil ngoo leettsoo rey; per tak kwathoz men nzi or mtselo rey kruz, ne reta zhaʼa mbin kuu nzhab rey, kona nzhab rey lo thib soldad, tsa taa zha yek Juan lo nzaa.

¹⁰Tsa mtaal rey soldad mchuug yek Juan leen tsib.

¹¹Ne mbe soldad yek Juan leen thib yann, ne mndaa soldade lo nzaa, ne lee nzaa mndaay lo xnaa nzaa.

¹²Tsa mzin re zha kuu ngeteed lo Juan, ne mbe zha kwerp Juan mkaats zha. Bluz tsaraa nzhab zhay lo Jesús. Jesús mndaa kuu ndow gaay mil men (Mr. 6:30‑44; Lc. 9:10‑17; <a href='B:500 06:1'>Jn.6 :1‑<a href='B:500 14:1'>14)

¹³Leettsa mbin Jesús lee Juan nguth, tsa ngoo Jesús leen thib kano ne mroo Jesús tya, nda Jesús thib ta yubiz. Ne mbin re men lee Jesús nda, tsa mroo re men yez ne nda nii re men, mndeke re men dits Jesús.

¹⁴Ne leettsa mla Jesús leen kano, mwii Jesús kwathoz men ndeke dits Jesús. Tsa mlat leettsoo Jesús mne re men, ne mtegwe Jesús re mbyiz kuu ndyaadno re men.

¹⁵Ne leettsa mziʼa yezlyu, tsa lee re zha kuu ngeteed lo Jesús mzin lo Jesús, mbig zha ne nzhab zha lo Jesús: ―Mziʼa yezlyu, ne yent men gax nzhee. Bchaats re men tsa ya zha re ranch kuu nzi gaxta nzhee, tsa tii zha lut kuu wu zha.

¹⁶Tsa mkab Jesús lo re zha: ―Ndoblot bi re zha. Taa goo kuu wu zha.

¹⁷Per lee re zha nzhab lo Jesús: ―Napt nee kuu taa nee wu re zha, beeta gaay pan ne chopka mbel nap nee.

¹⁸Tsa nzhab Jesús lo re zha: ―Deno gooy nzhee.

¹⁹Tsa mnabee Jesús tob re men lo yizhwan. Ne mzhen Jesús re gaay pan ne rop mbel, tsa mwii Jesús lobee ne mndaa Jesús texkix lo Diox, ne mtsow rol Jesús re pan ne rop mbel ne mndaa Jesúse lo re zha kuu ngeteed lo Jesús, tsa kiid zhay lo re men.

²⁰Reta men ndow asta plotha mze leettsoo re men. Ne tsiibchop chekwit pan byu myaan or ngwalo ndow reta men.

²¹Ne thib gaay mil mbyi nak kuu ndow, ne mtsowt zha kwent re ngot ne re ndyeen bzhizh. Jesús mnde lo nitdoo (Mr. 6:45‑52; <a href='B:500 06:1'>Jn.6 :<a href='B:500 16:1'>16‑<a href='B:500 21:1'>21)

²²Bluz leettsa ngwalo mriid koree, tsa mtaal Jesús re zha kuu ngeteed lo Jesús, tsa kendab zha leen kano, par rid zha tedib lad nitdoo. Per lee Jesús myaanka chaats re men.

²³Or ngwalo mchaats Jesús re men, tsa mkendab thita Jesús yek yii par tediz Jesús lo Diox. Ne or mkow yezlyu thita Jesús ndo tya.

²⁴Ne lee kano kuu nzo re zha kuu ngeteed lo Jesús ndaʼa tith lo nitdoo. Ne lee nitdoo kwathoz nkwin kano, tak par ta nda re zha ndyaad mbi.

²⁵Tsa lee Jesús zhaaraa ndyaad lo nitdoo mbig lo re zha.

²⁶Per or mwii re zha lee Jesús ndyaad lo nitdoo, tsa dib gan mrez re zha, tak kwathoz mzeb re zha, ne nzhab zha: ―¡Kuu fyera!

²⁷Per lee Jesús nzhab lo re zha: ―Tsebt goo, bloney goo leettsoo goo nay.

²⁸Tsa lee Pey nzhab lo Jesús: ―Zha Nabee, os luy, btsow tsa no na te lo nitdoo, tsa tsin na ta ndoʼa.

²⁹Tsa nzhab Jesús lo Pey: ―De nzhee. Tsa lee Pey mla leen kano ne mnde lo nitdoo nda lo Jesús.

³⁰Per or myeen Pey kwathoz nax mbi, tsa mzeb Pey, ne lee Pey ndalowgwa leen nit, tsa mretsyath Pey, ne nzhab Pey: ―Zha Nabee, laata lowʼn.

³¹Oraaka mzhen Jesús yaa Pey, ne nzhab Jesús lo Pey: ―¿Chebee lutta nyelaaza na? ¿Chebee ngok chop xgaba?

³²Leeka or kuu mke rop zha leen kano, lee mbi mlet.

³³Tsa lee re zha kuu nzo leen kano mtobxub lo Jesús, ne mbil zha lo Jesús nzhab zha: ―Wlipaa lee lu nak Xgann Diox. Jesús mtegwe re mbyiz zha yez Genesaret (Mr. 6:53‑56)

³⁴Tsa mriid re zha tedib lad roo nitdoo, ne mzin zha thib yez kuu le Genesaret.

³⁵Or mlebee re men yeza Jesús, dita lo yezlyuʼa mchaats zha diize, tsa myaadno re zha re mbyiz ta ndo Jesús.

³⁶Ne mnaab re zha lo Jesús tsa taa Jesús diiz diinn re mbyiz xab Jesús; ne reta zha kuu ndiinn xab Jesús ngwe zha.