Read Ozolotepec Zapotec Mateo 15 Bible Online

Mateo 15 - Ozolotepec Zapotec bible

Mateo 15

¹Tsa mbig chop tsonta fariseo ne chop tsonta maestr kuu nloo xkiiz Diox, re zhaʼa nak zha Jerusalén, tsa mnaabdiz zha lo Jesús, nzhab zha:

²―¿Chebee lee re zha kuu ngeteed loʼa ntsowt zha kuu mloo re teyaa zha ndala? ¿Chebee nat zha or nzhow zha, taxal nzhab re teyaa?

³Tsa mnaabdiz Jesús lo re zha, nzhab Jesús: ―¿Chebee noga goo nzhont goo diiz kuu nabee Diox lo goo tsow goo, leel re kuu mloo teyaa zha ndala ntsow goo?

⁴Tak lee Diox nzhab: “Bke leettsooʼa xuta ne xnaaʼa”. [Ex. 20:12] “Ne loka zha kuu ngode xut ne xnaa, ndoblo gath zha”. [Lv. 20:9]

⁵Per lee goo mbez tak gab zha lo xut zha ne lo xnaa zha: “Gagt raa tsowʼn ayud goo, tak reta kuu gatan lo goo mndaʼa nay gon lo Diox”.

⁶Ne ni goo loka cho kuu tenzhee gab, ndoblot raa tsow zha ayud xut zha ne xnaa zha. Tbaa nak goo, mlaa goo re diiz nataak kuu nabee Diox tsow goo, leel re kuu mloo re teyaa zha ndala nyelaaz goo.

⁷¡Zha nkedi nak goo, zhaa kuu mbez ne zhaa kuu ntsow goo! Wen wen mndaa profet Isaí kwent chaan goo, leettsa nzhab profet:

⁸Re men yez ree beeta kon roo zha nzhool zha lon,per lee leettsoo zha tith ndo lon.

⁹Nataagt nzhool re zha ree lon,tak purta leyy kuu nloo re men nloo zha. [Is. 29:13]

¹⁰Tsa mrez Jesús re men, ne nzhab Jesús: ―Bkenza goo koree, tsa yen gooy.

¹¹Nagt kuu nzhow zha ntsow nambit zha lo Diox, tak re kuu went kuu ndroo roo zha kuu ntsin leettsoo zha, kona ntsow nzhak nambit zha lo Diox.

¹²Tsa mbig re zha kuu ngeteed lo Jesús, ne nzhab zha lo Jesús: ―¿Chu myeenta mkezhyan re fariseo mbin kuu nzhaba?

¹³Tsa mkab Jesús, ne nzhab Jesús: ―Reta zha kuu nloo re leyy kuu nagt leyy chaan Xutʼn kuu ndob yibaa, teluux Xutʼn re zhaʼa, koree nak taxal zha kuu nkib dib lozh thib ya kuu mtot zha.

¹⁴Laa goo zha baa, tak syeg zha. Ne os lee thib syeg teno tedib syeg, leen thibka yeeryu la ropta zha.

¹⁵Per lee Pey nzhab lo Jesús: ―Taa kwent lo nee naa xomod nak diiz nanzee ree.

¹⁶Tsa mkab Jesús ne nzhab Jesús: ―¿Chu no goo nyente?

¹⁷¿Chu nyent goo, reta kuu nzhow zha ndya leettsoo zha, ne tsaraa ndrooy?

¹⁸Per lee kuu ndroo roo zha, leen leettsoo zha ntsin kona, ne ntsowe nzhak nambit zha lo Diox.

¹⁹Tak leen leettsoo zha:ntsin re xgab kuu went,kuth zha taben zha,gak rop zha kon thib zha kuu nagt tsaal zha,gak rop zha kon ndota zha,lowann zha,nkeki zha re zha kuu nkedi zha,ne re kuu nge zha taben zha.

²⁰Re koree ntsow nzhak nambit zha lo Diox; per lee kuu wu men ne nat men, ntsowt kona par gak nambit men lo Diox. Thib ngot tith ngwalaaz Jesús (Mr. 7:24‑30)

²¹Tsa mroo Jesús tya ne nda Jesús yezlyu Tiro ne yezlyu Sidón.

²²Tya lee thib ngot zha Canaán, kuu nzo tya mbig lo Jesús, ne dib gan zha mrez zha ne nzhab zha lo Jesús: ―¡Zha Nabee, xgann rey David, blat leettsooʼa neʼa na! Tak kwathoz ndakti rtsaapʼn, tak nzo thib mbi fyer leettsoo nzaa.

²³Per neeka thib lan diiz mkabt Jesús lo ngot. Tsa lee re zha kuu ngeteed lo Jesús mbig, ne nzhab lo Jesús: ―Btaal ngot baa liz ngot, tak kwathoz nkee ngot bi ndeke ngot ditsaa.

²⁴Tsa lee Jesús nzhab: ―Beeta lo re tawlazaa kuu nak taxal mbak zhiil kuu mndab, mtaal Dioxʼn.

²⁵Per lee ngota mbig lo Jesús mtobxub ne nzhab: ―Zha Nabee, btsow ayudʼn.

²⁶Tsa mkab Jesús, ne nzhab Jesús: ―Went kib zha pan lo ndyeen bzhizh ne taa zhay lo re mbak.

²⁷Tsa nzhab ngot lo Jesús: ―Tata nake, Zha Nabee. Per noga mbak nzhow mbak re kuu byu kuu nzhab xann mes bzhaan mbak, leettsa nzhow zha.

²⁸Tsa nzhab Jesús lo ngot: ―¡Ngot, tak kwathoz nyelaaza Diox! Kona gak kuu nlaaza. Ne leeka ora mgwe rtsaap ngot. Jesús mtegwe kwathoz men

²⁹Tsa mroo Jesús tya ne nda Jesús mzin Jesús roo nitdoo chaan Galilea, ne mkendab Jesús yek yii tya ne mndob Jesús.

³⁰Tsa kwathoz men mkaltaa lo Jesús ta ndob Jesús. Ne myaadno re men re zha renk, re zha syeg, re zha tunk, ne re zha mud ne tedib net re mbyiz. Tsa mtegwe Jesús re zha.

³¹Ne lee re zha kuu nzi tya kwathoz mzegey leettsoo zha, or mwii zha, lee re zha mud nzhaak ndediz, lee re zha tunk ngwe, ne lee re zha renk ngwe ne lee re zha syeg nyeni lo. Tsa mndelo re zha mbil zha lo Diox chaanaa, zha Israel. Jesús mndaa kuu ndow thap mil men (Mr. 8:1‑10)

³²Tsa mrez Jesús re zha kuu ngeteed lo Jesús, ne nzhab Jesús lo re zha: ―Nlat leettsoon nen re men ree, tak ndaʼa tson wiz nzi zha kon reʼaa nzhee, ne yent kwan nap zha wu zha. Nlaztʼn taalʼn re zha liz zha ne wut zha, tak cha layaal zha net.

³³Tsa lee re zha kuu ngeteed lo Jesús nzhab: ―¿Per pa yaxiiʼaa kuu wu thib labaa raa men, thib ta yent men?

³⁴Jesús mnaabdiz, ne nzhab: ―¿Plal pan nap goo? Tsa nzhab re zha: ―Gaz pan ne chop tsonta mbel.

³⁵Tsa mnabee Jesús lo re men tob re men lo yu.

³⁶Ne mzhen Jesús re gaz pan ne re mbel ne mndaa Jesús texkix lo Diox. Tsa mtsow rol Jesús pan ne mndaa Jesús pan lo re zha kuu ngeteed lo Jesús. Ne lee re zha mdide lo re men kuu nzi tya.

³⁷Reta men ndow asta plotha mze leettsoo men. Ne mtse zha gaz chekwit ngoo re kuu byu kuu mrozhoob.

³⁸Thap mil mbyi ndow tya, ne ngoot kwent re ngot kon re ndyeen bzhizh.

³⁹Bluz tsaraa mchaats Jesús re men ndya, ne lee Jesús mke leen thib kano ne nda Jesús par yezlyu Magadán.