Read Ozolotepec Zapotec Mateo 16 Bible Online

Mateo 16 - Ozolotepec Zapotec bible

Mateo 16

¹Tsa lee re fariseo ne re saduceo ngwa lo Jesús; ne mnaab zha thib seny yibaa lo Jesús, tsa tak keki zha Jesús ne ten zha Jesús.

²Per lee Jesús mkab lo re zha ne nzhab: ―Leettsa nane na xkow lobee or ndetsi yezlyu; tsa mbez goo: “Wen la bee”.

³Ne leettsa nane na xkow lobee ne nakal na nzhal til, tsa mbez goo: “Naltseree tela yi ne tax mbi thoz”. ¡Zha nkedi nak goo, zhaa kuu mbez goo ne zhaa kuu ntsow goo! Nlebee goo re seny kuu nyoo lobee, ¡per nlebeet goo re seny nal tyemp ree!

⁴Goo kuu ngwii re milagr thoz kuu ntsowʼn, went nak goo ne thitanax mlaa goo Diox. Naab goo thib seny thoz, per neeka thib seny loot lo goo, sinke beeta seny chaan profet Jonás zha ndala loo lo goo. Ngwalo nzhab Jesús kona, tsa mlaa Jesús re zhaʼa ne nda Jesús. Kuu nloo re fariseo ne re saduceo nak taxal lebadur (Mr. 8:14‑21)

⁵Leettsa ngwalo mriid Jesús kon re zha kuu ngeteed lo Jesús tedib lad roo nitdoo, tsa mtelaaz re zha kuu ngeteed lo Jesús mbet zha pan.

⁶Tsa nzhab Jesús lo re zha: ―List gok goo, kayaat goo lebadur chaan re fariseo ne lebadur chaan re saduceo.

⁷Tsa nzhab re zha lo altaa zha: ―Ndyaadnotaa; pan kona tabaa ne zha.

⁸Per myeen Jesús kona, tsa nzhab Jesús lo re zha: ―¿Chebee ni goo nkenot goo pan? ¡Men kuu lutta nyelaaz Diox!

⁹¿Chebee terka yen goo lee na, tak ntsowʼn re kuu thoz? ¿Chu ntelaazt goo re gaay pan kuu mndan ndow gaay mil mbyi? Ne, ¿plal chekwit kuu byu mrozhoob?

¹⁰¿Chu neeka gaz pan kuu mndan ndow thap mil mbyi, ntelaazt goo plal chekwite mrozhoob?

¹¹¿Chebee nyeent goo ngenitʼn kwent lebadur chaan pan? Sinke leen ni lo goo list gok goo, kayaat goo lebadur chaan re fariseo ne chaan re zha saduceo.

¹²Tsaraa myeen re zha, lee Jesús ngetaat kwent chaan lebadur kuu nyoo pan, sinke list ndoblo gak zha lo re kuu nloo re fariseo ne re saduceo, kuu nak taxal lebadur. Pey nzhab lee Jesús nak Crist Kuu Mtaal Diox Nabee (Mr. 8:27‑30; Lc. 9:18‑21)

¹³Leettsa mzin Jesús yezlyu ta nak Cesarea-Filipo, tsa mnaabdiz Jesús lo re zha kuu ngeteed lo Jesús, ne nzhab Jesús: ―¿Cho nak na Kuu Mzin Ngok Men, ni re men?

¹⁴Tsa lee re zha nzhab: ―Thib net zha mbez leeʼa nak Juan kuu mtsowleyy, lee tedib net zha mbez leeʼa nak profet Lí, lee tedib net zha mbez leeʼa nak profet Jeremí, ne lee tedib net zha mbez leeʼa nak tedib re profet.

¹⁵Tsa nzhab Jesús lo re zha: ―Ne lee re goo, ¿cho nakʼn ndak goo?

¹⁶Tsa lee Simún Pey mkab, ne nzhab: ―Lu nak Xgann Diox kuu naban, Kuu Mtaal Diox Nabee.

¹⁷Tsa lee Jesús mkab lo Pey, ne nzhab: ―Wen ndaʼa Simún xgann Jonás. Tak neeka thib men mloot koree loʼa, sinke Xutʼn kuu ndob yibaa mlooy loʼa.

¹⁸Ne na ni lee lu nak Pey, ne lee leʼa nak “ke”, ne dits ke ree tan gwodoo da, kuu nak re zha kuu nyelaazʼn. Ne lee yalney chaan yalguth tsowt gan loy.

¹⁹Ne loʼa tan yab chaan ta nabee Diox. Tsa reta kuu liiba lo yezlyu ree, naliibe yibaa, ne reta kuu xaka lo yezlyu ree, nazhake yibaa.

²⁰Tsa lee Jesús mnabee lo re zha kuu ngeteed lo Jesús, tsa yent cho lo gab re zha, lee Jesús nak Crist Kuu Mtaal Diox Nabee. Jesús nzhab naa xomod gath Jesús (Mr. 8:31–9:1; Lc. 9:22‑27)

²¹Desde tsya mndelo Jesús nzhab Jesús lo re zha kuu ngeteed lo Jesús, lee Jesús ndoblo ya Jerusalén, ne tya kwathoz rid Jesús yalti lo re zha gol, ne lo re ngwleyy kuu nabee lo re ngwleyy ne lo re maestr chaan ley. Ne kuth zha Jesús, per leettsa tsaal tson wiz lee Jesús roban.

²²Tsa lee Pey mloo Jesús thib lad, ne mndelo Jesús mkox Jesús lo Pey, ne nzhab Pey lo Jesús: ―Diox, Zha Nabee, lat leettsoo neʼa. ¡Ridta kona!

²³Per lee Jesús mtsere lo, ne nzhab lo Pey: ―¡Btow rooʼa Maxuuy! Lu ngetow lon. Tak ntsowta xgab kuu ntsow Diox xgab; sinke leeʼa ntsow xgab taxal ntsow re men xgab.

²⁴Tsa lee Jesús nzhab lo re zha kuu ngeteed lo Jesús: ―Os cho goo nlaaz teke ditsʼn, bnithlaaz goo reta kuu nap goo, ne reta kuu nzo yek goo tsow goo, ne thib bloo goo leettsoo goo gath goo, tak nyelaaz goo na.

²⁵Tak lee zha kuu kot thib leettsoo gath, tak nyelaaz zha na, tath zhaʼa ne tsowt zha gan yalnaban kuu thitanax; per lee zha kuu thib ko leettsoo gath tak nyelaaz na, tetsow zhaʼa gan yalnaban kuu thitanax.

²⁶¿Kwan tsow men gan keno zha reta kuu nzo yezlyu ree, ne kenot zha yalnaban kuu thitanax? Gagt taa men neeka thib kwaa lo Diox par taa Diox yalnaban kuu thitanax lo men.

²⁷Koree nin lo goo, tak lee na Kuu Mzin Ngok Men, yaalʼn kon xni thoz chaan Xutʼn ne kon re mandad Xutʼn, ne tsa taa na lo kadta thib thib zha kuu ndoblo zha.

²⁸Wlipaa na kuu ngenin lo goo, nzo chop tson goo kuu nzi nzhee, gatht goo, asta wii goo naa xa nabee Diox kon yalnabee chaan Diox.