Read Ozolotepec Zapotec Mateo 19 Bible Online

Mateo 19 - Ozolotepec Zapotec bible

Mateo 19

¹Leettsa ngwalo nzhab Jesús re diiz ree, tsa mroo Jesús yezlyu Galilea, ne nda Jesús par yezlyu Judea kuu nzi tedib lad roo yoo Jordán, kon re zha kuu ngeteed lo Jesús.

²Ne kwaro men mndeke dits Jesús, ne mtegwe Jesús re zha kuu ne ndak, kuu nzo xid re mena.

³Tsa lee chop tson zha fariseo mbig lo Jesús, ne mnaabdiz zha thib kuu nzhab lo ley, tsa naa chu takab Jesús thib kuu ndoblot, tak nlaaz zha kwaan zha naa xomod keki zha Jesús, tsa nzhab zha lo Jesús: ―¿Chu tak laa thib mbyi tsaal mbyi por ndota kwaa?

⁴Tsa lee Jesús mkab ne nzhab: ―¿Chu ter lab goo lo xkeets Diox, leettsa mdexkwaa Diox yezlyu, thibka mbyi ne thibka ngot mtsaal Diox?

⁵Ne noga nzhab Diox: “Kona lee mbyi ndoblo roo zhaa lo xut ne lo xnaa, tsa tseya mbyi kon ngot mbyi, ne lee rop zha gak taxal thibka zha”. [Gn. 2:24]

⁶Kona nagt raa zha chop zha, sinke taxal thibka zha nak zha rop zha. Kona ndoblot laa zha tsaal zha, tak Diox mtsaal rop zha.

⁷Tsa mnaabdiz re zha lo Jesús ne nzhab zha: ―¿Xomod lee Moisés nzhab tak laa mbyi tsaal mbyi, beeta ndoblo taa mbyi thib yeets kuu mroo yuulow kuu nzhab, lee mbyi mtso rop tsaal?

⁸Tsa lee Jesús nzhab: ―Tbaa mne Moisés lo goo, tak kwathoz nad leettsoo goo, per ner ngogte tata.

⁹Per lee na ni, loka cho mbyi kuu laa tsaal, ne nagte tak ngok rop ngot kon tedib mbyi, ne kaa mbyi tedib ngot, ndaa mbyi thib falt ro lo Diox, tak nzhak rop mbyi kon tedib ngot.

¹⁰Tsa lee re zha kuu ngeteed lo Jesús nzhab: ―Os tata nak kwent chaan mbyi kon tsaal mbyi, mas wen kat mbyi ngot.

¹¹Jesús mkab ne nzhab: ―Ret men nxek ntseyat, beeta re men kuu mndaa Diox diiz lo tak tsowe.

¹²Nzo zha nyowt leettsoo kaa ngot, tak tata nak zha ngol zha, ne nzo zha nkaat ngot, tak men mtsow nyoot yek zha kaa zha ngot, ne nzo zha nkaat ngot, tak nlaaz zha ke zha tsiin taa zha kwent chaan ta nabee Diox. Zha kuu tak tsow koree, wen ntsow zha. Jesús mkayaa re ndyeen bzhizh (Mr. 10:13‑16; Lc. 18:15‑17)

¹³Tsa ngwano zha chop tson ndyeen bzhizh lo Jesús, tsa xoob Jesús yaa Jesús yek re ndyeen, tsa naab Jesús lo Diox por re ndyeen. Per lee re zha kuu ngwano ndyeen mndelo mkox lo re zha kuu ngeteed lo Jesús.

¹⁴Per lee Jesús nzhab: ―Laa goo yaad re ndyeen bzhizh lon, ne towt goo lo re ndyeen, tak lee ta nabee Diox, nak chaan re zha kuu nadoo nak taxal re ndyeen bzhizh.

¹⁵Ne mxoob Jesús yaa Jesús yek re ndyeen, par tsow Diox kuu wen lo re ndyeen. Tsaraa mbi Jesús tya. Thib zha mndyeen kuu rik mndediz kon Jesús (Mr. 10:17‑31; Lc. 18:18‑30)

¹⁶Lee thib zha mndyeen ngwa mnaabdiz lo Jesús ne nzhab: ―Maestr wen, ¿kwan kuu wen tsowʼn tsa tsowʼn gan yalnaban kuu thitanax?

¹⁷Jesús mkab lo zha ne nzhab: ―¿Chebee zha wen niʼa lon? Tak neeka thib zha wen yent, beeta Diox wen nak. Per os leeʼa nlaaza kenoʼa yalnaban kuu thitanax, bin diiz re diiz kuu nataak kuu nabee Diox.

¹⁸Tsa lee zha mndyeen nzhab: ―¿Pa kuu tsa? Tsa lee Jesús nzhab:―Kuthta tabena,gagt ropa kon ngot kuu nagt tsaala,lowannta,kekita tabena kon thib kuu wlit,

¹⁹bke leettsooʼa xuta ne xnaaʼa,ne bke leettsooʼa tabena taxal nke leettsooʼa leeka lu.

²⁰Lee zha mdyeena nzhab: ―Reta koree nzhona na diiz. ¿Kwan raa ndoblon tsowʼn?

²¹Tsa nzhab Jesús lo zha: ―Os leeʼa nlaaza gaka thib zha nali, tyee ne btho reta kwaa napa ne btaay lo re zha prob, tsa kenoʼa naroob kwaa yibaa; tsaraa yaada ne tekeʼa ditsʼn.

²²Leettsa mbin zha mndyeen kona, kwathoz nabil ngoo leettsoo zha ndya zha, tak naroob kwaa nap zha.

²³Tsa lee Jesús mne lo re nee kuu ngeteed lo Jesús: ―Wlipaa na nin, kwathoz nagan laa thib zha rik nabee Diox leettsoo zha.

²⁴Tedib welt nin lo goo, mas nagant rid thib kamey yeer kuu le ngutlo abuj, nake tab thib zha rik yibaa ta nabee Diox.

²⁵Leettsa lee re zha kuu ngeteed lo Jesús mbin kona, tsa kwathoz mzegey leettsoo zha ne mbez zha lo altaa zha: ―¿Cho tak tsow gan yalnaban, os tata nake?

²⁶Tsa mwii Jesús lo re zha ne nzhab Jesús: ―Lo re men yezlyu ree gagte, per lee lo Diox reta kuu tak.

²⁷Tsa lee Pey nzhab lo Jesús: ―Wii lee re nee. Mlaa nee reta kuu nap nee ne mndeke nee ditsa. ¿Kwan tsow nee gan tsa?

²⁸Lee Jesús mkab ne nzhab: ―Wlipaa na nin lo goo, leettsa tsin wiz kuu lee reta kwaa gak kuu kub, tsa lee na Kuu Mzin Ngon Men, tobʼn lo asi chaan yalnabee, ta kwathoz nzhol na ne nabeen, noga re goo kuu ndeke ditsʼn, tob lo thib asi chaan yalnabee, tsa naab goo kwent lo re tsiibchop net raz kuu nak zha Israel.

²⁹Ne loka cho mlaa liz, wets, btan, xut, xnaa, tsaal, zhiinn, yu, par tsow rtsin na, kwaro kuu wen kayaa zha lo Diox ne kayaa zha yalnaban kuu thitanax.

³⁰Kwaro re zha kuu nataak nal, re zhaʼa gak zha kuu nataagt, ne lee re zha kuu nataagt nal, re zhaʼa gak zha nataak.