Read Ozolotepec Zapotec Mateo 21 Bible Online

Mateo 21 - Ozolotepec Zapotec bible

Mateo 21

¹Leettsa lee Jesús ndetsin gaxa yez Jerusalén, tsa mzin Jesús yez Betfagé kuu nzi gaxta yii Olib, tsa mtaal Jesús chop zha kuu ngeteed lo Jesús ya yeza,

²ne nzhab Jesús lo zha: ―Gwa goo yez kuu nzi baa. Tya yetsal goo thib burr kuu ndekedoo rop zhiinn. Xak goo maa ne yaadno goo maa.

³Ne os cho zha kwan ne lo goo, gab goo lo zha: “Zha Nabee ndeche maa, ne tsaraa yaadtaan zha rop maa”.

⁴Koree ngok, tsa mrolo re kuu nzhab profet kuu ngoo ndala, leettsa nzhab zha:

⁵Guz goo lo re zha yez Jerusalén:“Wii goo, lee rey goo ndyaad lo goo,zha kuu nadoo nak, ndob dits thib burr ndyaad,zhiinn thib maa kuu nzhee yoo”. [Zac. 9:9]

⁶Tsa lee rop zha kuu ngeteed lo Jesús, ngwa zha ne mtsow zha taxal nzhab Jesús lo zha.

⁷Ne mndeno zha rop zhiinn burr, tsa mxoob zha xab zha dits burr yeena, ne mndob Jesús dits maa.

⁸Ne kwathoz men nzi, cho zha ngix xabe net, ne cho zha nga baat ne ngix zhay net.

⁹Ne lee re zha kuu ndener ne re zha kuu ndeke, nex mbez zha: ―¡Golaa lo Zha kuu ndyaad Nabee lo raz chaan rey David! ¡Aka wen nak zha kuu ndyaad kon yalnabee chaan Zha Nabee! ¡Golaa lo Diox kuu ndob yibaa!

¹⁰Ne leettsa mndaab Jesús yez Jerusalén, reta zha yeza mgab ndata leettsoo zha, ne mnaabdiz zha lo altaa zha, ne mbez zha: ―¿Cho nak zha ree?

¹¹Ne reta men mbez: ―Zha ree nak Jesús, profet zha yez Nazaret kuu nzi yezlyu Galilea. Jesús mtezhonn re zha kuu ntho lee roo gwodoo (Mr. 11:15‑19; Lc. 19:45‑48; <a href='B:500 02:1'>Jn.2 :<a href='B:500 13:1'>13‑22)

¹²Ne leettsa mndaab Jesús lee roo gwodoo, tsa mloo Jesús re zha kuu nzi ntho ne re zha kuu ndi tya. Ne mlobi Jesús re mes chaan re zha kuu ntsiil temi, ne mlobi Jesús re mes chaan re zha kuu ntho palom.

¹³Ne nzhab Jesús: ―Lee lo xkeets Diox nzhab: “Lee lizʼn nak yuu ta ndediz re men lon”, [Is. 56:7; Jer. 7:11] ne noga tedib ta nzhab: Per lee re goo mtsowe taxal liz wann.

¹⁴Ne lee roo gwodoo mbig re zha syeg ne re zha renk lo Jesús, ne mtegwe Jesús re zha.

¹⁵Tsa lee re ngwleyy kuu nabee lo re ngwleyy ne re maestr kuu nloo xkiiz Diox, mwii zha re kuu thoz kuu mtsow Jesús, ne mbin zha lee re ndyeen bzhizh mbez: “¡Golaa lo Zha Kuu Mtaal Diox Yaad Nabee, zha kuu ndyaad lo raz chaan rey David!”, tsa kwathoz mnayii re zha.

¹⁶Ne nzhab zha lo Jesús: ―¿Chu nzhona kuu mbez re ndyeen baa? Tsa lee Jesús mkab ne nzhab: ―Ah, nzhon nay. ¿Per chu ter lab goo lo xkeets Diox ta nzhab koree: “Mtsowa lee re ndyeen bzhizh ne re mbetdoo gol loʼa”? [Sal. 8:2]

¹⁷Tsa mlaa Jesús re zha ne nda Jesús yez Betania, ne tya mlet Jesús yaala. Jesús mlode ya ig (Mr. 11:12‑14, 20‑26)

¹⁸Ne til tedib wiza leettsa mre Jesús yez Jerusalén tedib welt, tsa mlann Jesús.

¹⁹Tsa mwii Jesús lee thib ya ig ndob gax roo net, tsa mbig Jesús lo ya, tsa naa chu ndab xle lo ya, per mzalt Jesús ig lo ya beeta la ndab lo ya. Kona nzhab Jesús lo ya: ―Neeka mas taat raa lu xle. Ne oraaka lee ya mbiz.

²⁰Leettsa mwii re zha kuu ngeteed lo Jesús kona, kwathoz mzegey leettsoo zha ne nzhab zha: ―¡Xomod oraaka mbiz ya ig!

²¹Lee Jesús mkab ne nzhab: ―Wlipaa na nin lo goo, os lee thib goo nyelaaz Diox ne gagt chop xgab goo, tak tsow goo koree ne asta tak gab goo lo yii ree: “Beche nzhee ne bla leen nitdoo”, ne leey gak.

²²Reta kuu naab goo lo Diox, os nyelaaz goo lee goo kayaay, tekayaa gooy. Cho mndaa yalnabee lo Jesús (Mr. 11:27‑33; Lc. 20:1‑8)

²³Tsa lee Jesús mndaab lee roo gwodoo, ne mndelo Jesús mloo lo re men, tsa lee re ngwleyy kuu nabee lo re ngwleyy, ne re zha gol kuu nabee lo re zha Israel, mbig lo Jesús, ne mnaabdiz zha lo Jesús, ne nzhab zha: ―¿Cho mndaa diiz ntsowa koree? ¿Ne cho mndaa yalnabee ntsow luy?

²⁴Jesús mkab ne nzhab: ―Noga na naabdizʼn thib kwaa lo goo. Os lee re goo kab goo yalnaabdiz da, tsa nin lo goo naa cho mndaa diiz ntsowʼn ree koree.

²⁵¿Cho mtaal Juan kuu mtsowleyy re men? ¿Chu Diox mtaal zha o re men mtaal zha? ¡Kab goo lon nal! Tsa lee re zha mndelo mbyodiz kon re altaa zha, ne nzhab zha: ―Os leeʼaa gabaa: “Diox mtaal zha”, tsa ne zha loʼaa: “¿Chebee ngwalaazt goo kuu mni zha?”

²⁶Ne os leeʼaa gabaa: “Re men mtaal zha”, tsa yii re men ne re menaa, tak ne re men lee Juan nak thib profet chaan Diox.

²⁷Tsa mkab re zha lo Jesús ne nzhab zha: ―Net nee cho mtaal Juan. Tsa lee Jesús mkab ne nzhab: ―Neeka na nitʼn lo goo naa cho mndaa yalnabee lon ntsowʼn re koree. Kwent nanzee chaan chop xgann zha

²⁸Tsa lee Jesús nzhab lo re men: ―Nal leen ta thib kwent lo goo. Thib mbyi mkeno chop xgann, ne nzhab mbyi lo xgann mbyi kuu ner: “Gwa keʼa tsiin naltseree”.

²⁹Ne lee xgann mbyi mkab lo xute ne nzhab: “Yatʼn”. Per bluz mtsee zha xgab zha ne ngwa zha.

³⁰Tsa nzhab mbyi lo tedib xgann mbyi, leeka taxal nzhab mbyi lo xgann mbyi kuu nera. Ne lee zhaʼa nzhab: “Mbay, nal ndan”. Per ngwat zha.

³¹Lo rop zhaʼa, ¿cho mbin diiz lo xute? ―Zha nera ―nzhab re zha. Tsa lee Jesús nzhab: ―Wlipaa na nin lo goo, re zha kuu ntsow kobral temi chaan yezlyu kuu nzhax lo zha kuu nabee Roma, ne re ngot kuu ntho kwerp, ne tedib net re zha kuu ndaa falt, re zhaʼa tab ta nabee Diox.

³²Tak lee Juan myaad mloo lo goo, naa xomod ndoblo nali ban goo, ne lee goo ngwalaazt goo kuu mni Juan. Per lee re zha kuu ntsow kobral temi chaan yezlyu kuu nzhax lo zha kuu nabee Roma, ne re ngot kuu ntho kwerp, re zhaʼa ngwalaaz kuu nzhab Juan, ne lee re goo tegal mwii goo kuu nzhab Juan, per neeka mlaat goo mod went kuu nak goo, ne neeka ngwalaazt goo kuu mni Juan. Kwent nanzee chaan re zha nakap kuu mke tsiin lo luts ub (Mr. 12:1‑12; Lc. 20:9‑19)

³³’Kenza goo tedib kwent nanzee kuu nin lo goo: Thib welt lee thib mbyi mkeno thib fink, ne mto zha luts ub dita lo yu zha. Ne mtow zha dita fink kon btsin ke. Ne mdexkwaa zha thib ta tii zha ub, noga mdexkwaa zha thib yuu naro kuu ya ndab, ta loo dita lo yu zha lo zha. Ne mndaa zha yu zha kompani lo tedib net zha, ne mroo zha nda zha tith.

³⁴Leettsa ngozhoob wiz kuu dop ub, tsa mtaal zha chop tson mos zha, ya lo zha kuu nke tsiin lo yu zha, tsa tsow rol zha ub kuu ndoblo zha kaa zha.

³⁵Per lee re zha kuu nzhann lo yu zha, mzhen re mos zha, ne mdin re zha thib mos, lee tedib mos mbeth zha ne lee tedib mos mkee zha ke yeke.

³⁶Tsa lee zha kuu nak chaan fink, mtaal tedib net mos lo re zha kuu nke tsiin lo yu zha; per lee re zha kuu nzhann lo yu zha, leeka taxal mtsow re zha lo re mos kuu ner, tataka mtsow zha lo tedib net mos.

³⁷’Bluz mtaal zha xgann zha, tak mtsow zha xgab, nzhab zha: “Lo xgann na si ton re zha diz”.

³⁸Per leettsa mwii re zha kuu nzhann lo yu zha lee xgann zha ndyaad, tsa nzhab zha lo re altaa zha: “Zha ree kayaa reta chaan xute, leettsa lee xut zha gath. Nal kuthaa zha, tsa yaan re chaan zha loʼaa.”

³⁹Tsa mzhen re zha xgann zha ne mloo zha xgann zha thib lad, ta nzhannt zha ne mbeth zha zha.

⁴⁰’Lee nal leettsa yaad zha kuu nak chaan fink, ¿kwan ntsow goo xgab, kwan tsow zha kon re zha kuu nzhann lo yu zha?

⁴¹Lee re zha mkab ne nzhab: ―Kuth zha re zhaʼa, ne latta leettsoo zha ne zha re zha wenta, ne taa zha fink zha lo tedib net zha, tsa ke zha tsiina, ne tsa taa re zhaʼa kuu ndoblo zha kaa zha leettsa gak yalgonn.

⁴²Tsa lee Jesús nzhab lo re zha: ―¿Chu ter lab goo lo xkeets Diox ta tenzhee nzhab:Lee ke kuu mlobi re zha kuu nta yuu thib lad,leey nak thib ke kuu mas nataak kuu ndob skin yuu?Lee Diox kuu nak Zha Nabee loʼaa mtsow koree;ne mzegey leettsooʼaa neʼaa koree. [Sal. 118:22-23]

⁴³Kona nin lo goo: Leettsoo goo nak diiz nabee Diox, per lee nal yiibe lo goo ne kayaa tedib net re men tedib yeze, re mena si tetsow kuu nabee Diox.

⁴⁴Ne lee zha kuu ral ke ree nii tats zha; ne os lee ke ree la dits thib zha, dita tsowe zha.

⁴⁵Tsa lee re ngwleyy kuu nabee lo re ngwleyy ne re fariseo, myeen zha lee kwent nanzee ree nloo re kuu ntsow re zha.

⁴⁶Kona leeka ora ngwalaaz re zha gaten zha Jesús, per nzeb re zha ne zha re men, tak lee re men nyelaaz lee Jesús nak profet chaan Diox.