Read Ozolotepec Zapotec Mateo 22 Bible Online

Mateo 22 - Ozolotepec Zapotec bible

Mateo 22

¹Tsa mnika Jesús lo re men kon diiz nanzee, ne nzhab Jesús:

²―Nal tan tedib kwent. Leettsa nabee Diox leettsoo men, leey nak taxal thib rey kuu mtsow thib ani leettsa mtseya xgann rey.

³Tsa mtaal rey re mos ya yachez re zha kuu naka diiz ya lo ani, ne lee re zhaʼa mzhyalt gaya lo ani.

⁴Mbre rey mtaal tedib net mos, ne nzhab rey lo re mos: “Gwa goo ne guz lo re zha kuu naka diiz yaad lo ani, tsa yaad zha. Ne gab goo lo zha, mdexkwaaʼa na kuu wu re zha kuu yaad lo ani, mbetha na ngon da ne re maa da kuu mas natsi, ne reta kuu nziʼa.”

⁵Per lee re zha kuu naka diiz yaad lo ani mzhyalt gayaad lo ani. Thib zha ndatwii lo yu, lee tedib zha nda lo negos,

⁶ne lee tedib net zha mzhen re mos rey, tsa mteti zha mos, ne mbeth zha re mos.

⁷Ne or mbin rey kona, kwathoz mnayii rey ne mtaal rey re soldad rey ngwa mbeth re zha kuu nzhuth mena, ne mteyy rey laz re zhaʼa.

⁸Tsa nzhab rey lo re mos rey: “Reta kuu nziʼa par yo fandan, per lee re zha kuu naka diiz yaad, ndoblot zha yaad zha.

⁹Gwa goo re net to ne guz gooy lo reta zha kuu tsaal goo, tsa yaad zha lo fandan.”

¹⁰Tsa lee re mos mroo ngwa re neta, ne mrez mos reta zha kuu mwii mos, zha wen ne zha went; tsa lee yuu ta yo fandan mze nzo re men.

¹¹’Tsa lee rey mndaab leen yuu, ne mwii rey lo re zha kuu mrez rey yaad fandan, tsa mwii rey thib mbyi kuu ndob tya, kuu nogt lar kuu nzhok re zha kuu nya lo fandan.

¹²Tsa nzhab rey lo zhaʼa: “Amig, ¿xomod mndaaba nzhee ne nogta lar kuu nzhok re zha kuu nya fandan?” Ne lee zhaʼa mkabt neeka thib lan diiz.

¹³Tsa nzhab rey lo re mos rey: “Bliib goo nii zha ne yaa zha, ne bloo goo zha lee ta kwathoz nakow na, tya gonn zha ne tub zha keley zha”.

¹⁴Tak kwathoz zha mrez Diox per lut zha mli Diox. Yalnaabdiz chaan chu ndoblo kix zha temi chaan yezlyu lo César (Mr. 12:13‑17; Lc. 20:20‑26)

¹⁵Tsa ndya re fariseo, ne ngwa re zha mndediz zha ne myaan zha diiz, naa xomod tsow zha gab Jesús thib kuu went, par tak keki zha Jesús.

¹⁶Tsa mtaal zha chop tson re zha zha kuu ngeteed lo zha, ne chop tson zha Herodes, tsa lee re zhaʼa nzhab: ―Maestr, ne nee wli kuu niʼa, ne nali nlooʼa xnet Diox lo re men taxal ndobloy, yewal niʼa lo reta men ne ngwiita chu nataak zha o nataagt zha.

¹⁷Kona lu ne, kwan ndoblo nee tsow nee: ¿Chu ndoblo kix nee lo zha kuu ntsow kobral temi chaan yezlyu, kuu nzhax lo zha Roma, o ndoblot nee kix neey?

¹⁸Per lee Jesús neʼa went nak xgab re zha, kona nzhab Jesús lo re zha: ―¡Zha nkedi nak goo, zhaa kuu mbez ne zhaa kuu ntsow goo, nlaaz goo naabdiz goo kuu wli per went nak goo! ¿Chebee tabaa mod nkwaan goo ten goo na?

¹⁹Bloo goo thib temi kuu ngix goo lon. Tsa mloo zha thib temi lo Jesús.

²⁰Ne or mwii Jesús loy, tsa mnaabdiz Jesús lo re zha: ―¿Cho lo ne cho le nke loy?

²¹Lee re zha mkab ne nzhab: ―Chaan César kuu nabee Roma. Tsa nzhab Jesús lo re zha: ―Taa goo lo César kuu ndoblo César, ne taa goo lo Diox kuu ndoblo Diox.

²²Leettsa mbin re zha koree, kwathoz mzegey leettsoo re zha xa mkab Jesús, tsa mlaa re zha Jesús ne ndya zha. Yalnaabdiz chaan yalroban (Mr. 12:18‑27; Lc. 20:27‑40)

²³Leeka wiza lee chop tson zha saduceo, re zha kuu nyelaazt lee re zha nguth roban, mnaabdiz lo Jesús ne nzhab:

²⁴―Maestr, lee Moisés mkee lo xkeets Diox: “Os lee thib mbyi kuu mtseya gath, ne mkenot mbyi neeka thib zhiinn mbyi, tsa lee wets mbyi ndoblo tseya kon ngot mbyi, tsa keno wets mbyi thib zhiinn mbyi kuu ngutha, tsa gak zhiinn wets mbyi taxal raz chaan mbyi kuu ngutha”. [Dt. 25:5]

²⁵Thib welt ngoo gaz wets zha; lee zha ner mtseya ne nguth, ne mkenot zha neeka thib zhiinn zha, tsa lee tedib wets zha mtseya kon ngota.

²⁶Leeka tata mzhaak zhaʼa, ne tataka mzhaak zha myon; ne tataka mzhaak reta gazta wets zha.

²⁷Bluz leettsa ngwalo nguth re zha, noga ngot nguth.

²⁸Kona os lee re men roban, ¿cho gak tsaal ngota, tak re gazta wets zha mtseya kon ngota?

²⁹Jesús mkab lo re zha ne nzhab: ―¡Thitanax ngobeet goo! Nyent goo re kuu nke lo ley chaan Moisés, ne neeka nlebeet goo yalney chaan Diox.

³⁰Leettsa lee re zha nguth roban, neeka mbyi ne neeka ngot tseyat raa, sinke lee re zha gak taxal re mandad chaan Diox kuu nzo yibaa.

³¹Per leen ni lo goo, wlipaa lee re zha nguth teroban. ¿Chu ter lab goo lo xkeets Diox, ta leeka Diox nzhab kwent chaan re zha nguth:

³²“Na nak Diox chaan Abraham, Diox chaan Isaac ne Diox chaan Kob”? [Ex. 3:6] ¡Lee Diox nagt Diox chaan re zha nguth, lee Diox nak Diox chaan re zha naban!

³³Leettsa mbin re zha koree kwathoz mzegey leettsoo re zha xa mloo Jesús. Diiz kuu mas nataak (Mr. 12:28‑34)

³⁴Ne leettsa mbin re fariseo lee Jesús mtow roo re zha saduceo, tsa mkaltaa re fariseo.

³⁵Tsa lee thib zha kuu nak maestr kuu nloo ley chaan Moisés, mnaabdiz thib kwaa lo Jesús, tsa naa chu tab Jesús thib kuu ndoblot, ne nzhab zha:

³⁶―Maestr, ¿cho diiz kuu mas nataak lo ley chaan Moisés?

³⁷Tsa lee Jesús nzhab lo zha: ―“Ke leettsoo Diox kuu nabee loʼa kon dib ndroo leettsooʼa, kon dib yalnabana, ne kon dib xgaba”. [Dt. 6:5]

³⁸Koree nak kuu ner ne kuu mas nataak.

³⁹Ne lee tedibe mer lalka nak: “Ndoblo ke leettsooʼa tabena taxal nke leettsooʼa lu”. [Lv. 19:18]

⁴⁰Ne os leeʼa ntsowa ropta koree, ngetsowa reta kuu nzhab lo ley chaan Moisés ne reta kuu nzhab re profet. ¿Cho zhiinn nak Crist Kuu Mtaal Diox Nabee? (Mr. 12:35‑37; Lc. 20:41‑44)

⁴¹Ne or lee re fariseo bee nzika,

⁴²tsa mnaabdiz Jesús lo re zha, ne nzhab Jesús: ―¿Kwaan ntsow goo xgab kwent chaan Crist Kuu Mtaal Diox Nabee? ¿Cho lo raz ndyaad Crist Kuu Mtaal Diox Nabee? Ne lee re zha mkab ne nzhab: ―Lo raz David ndyaad zha.

⁴³Tsa lee Jesús nzhab: ―Os tata nake, xomod leettsa mban rey David ndala lee Mbi Nayon mtsow lee David, nzhab Zha Nabee lo Crist, tenzhee mkee David:

⁴⁴Lee Diox kuu nak Zha Nabee,nzhab lo Zha Nabee lon:“Btob lad ban lon,asta tsowʼn leeʼa gak nabee lo reta zha kuu nayii neʼa,ne tobxub zha loʼa”. [Sal. 110:1]

⁴⁵¿Xomod tak gak Crist xgann David, os Zha Nabee nzhab David lo Crist?

⁴⁶Ne neeka thib zha ngogt gakab thib lan diiz lo Jesús. Ne desde tyatha, yent raa cho mye leettsoo ganaabdiz raa lo Jesús.