Read Ozolotepec Zapotec Mateo 27 Bible Online

Mateo 27 - Ozolotepec Zapotec bible

Mateo 27

¹Leettsa ngwani yezlyu, lee re ngwleyy kuu nabee lo re ngwleyy ne re zha gol kuu nabee lo re zha Israel, myaan zha diiz tsa naa xomod tsow zha kuth zha Jesús.

²Tsa mliib zha Jesús ne ndano zha Jesús lo Pilat, zha kuu nabee dita yezlyuʼa.

³Tsa lee Judas kuu mndaa Jesús lo re zha kuu kuth Jesús, leettsa myeen Judas lee re zha kuth Jesús, kwathoz ndowe leettsoo Judas, ne ngwa Judas mtsere re galbtsii temi plat, lo re ngwleyy kuu nabee lo re ngwleyy ne lo re zha gol kuu nabee lo re zha Israel.

⁴Ne nzhab Judas lo re zha: ―Mndan thib falt thoz, tak mndan thib zha kuu mtsowt neeka thib kuu went gath. Per lee re zha mkab lo Judas ne nzhab: ―¿Yent cho mport nee kona? ¡Kwenta kona!

⁵Tsa lee Judas mlobi re temiʼa leen gwodoo, ne ndya Judas ne leeka lee Judas mloo doo yene.

⁶Tsa lee re ngwleyy kuu nabee lo re ngwleyy mthop temiʼa, ne nzhab: ―Gagt koʼaa temi ree leen ta nyoo gon, tak nambit temi ree, tak leey mndaa reʼaa par gath thib zha.

⁷Tsaraa ngoo re zha thib junt, tsa naa kwan tsow zha kon temiʼa, ne kon temiʼa mzhii re zha thib le yu, ta ngoo re men yu ndexkwaa men yet, tsa tya gaats re zha tith.

⁸Ta mod lee yuʼa le Yu Ren asta nal.

⁹Tbaa mrolo kuu nzhab profet Jeremí lo re men ndala, leettsa nzhab profet: “Mzhen zha re galbtsii temi plat, lala nataak zha nzhab re zha Israel.

¹⁰Ne kon temiʼa mzhii zha thib le yu, ta ngoo re men yu ndexkwaa men yet, taxal mnabee Zha Nabee.” [Jer. 32:6; Zac. 11:12-13] Jesús ngwato lo Pilat (Mr. 15:2‑20; Lc. 23:3‑5, 13‑25; <a href='B:500 18:1'>Jn.18 :33–<a href='B:500 19:16'>19:16)

¹¹Tsa ndano zha Jesús lo Pilat zha kuu nabee tsya. Ne mnaabdiz Pilat lo Jesús ne nzhab Pilat: ―¿Chu lu nak rey chaan re zha Israel? Jesús nzhab: ―Lu ney.

¹²Tsa lee re ngwleyy kuu nabee lo re ngwleyy ne re zha gol, mkeki zha Jesús kon kuu wlit, per lee Jesús neeka thib lan diiz mkabt.

¹³Tsa lee Pilat nzhab lo Jesús: ―¿Chu nzhonta re kuu nkeki zha lu?

¹⁴Per neeka thib lan diiz mkabt Jesús lo Pilat, tsa lee Pilat mzegey leettsoo ne net Pilat naa kwan tsow Pilat xgab.

¹⁵Ne gandata liin lo ani Paskw, lee Pilat ntelaa thib zha kuu nzo tsib, loka zha kuu naab re men yez lo Pilat.

¹⁶Lee thib zha kuu le Barrabás kuu kwathoz nzib xkiiz nzo tsib tsya, ne nlebee reta men zha.

¹⁷Or lee reta zha mkaltaa, tsa mnaabdiz Pilat lo re zha kuu nzi tya, ne nzhab Pilat: ―¿Cho nlaaz goo telaan? ¿Chu nlaaz goo telaan Barrabás, o Jesús kuu ni re zha, Crist Kuu Mtaal Diox Nabee?

¹⁸Tak myeen Pilat lee re ngwleyy kuu nabee lo re ngwleyy kon re zha gol, mndaa zha Jesús lo Pilat, tak nayii zha ne zha Jesús.

¹⁹Ne lee Pilat bee ndobka ta naab Pilat kwent, lee tsaal Pilat mtaal thib zha, nzhab lo Pilat: ―Tsowta neeka thib kuu went lo mbyi baa, tak zha wen nak zha. Ne naabtsiʼa kwathoz went mtsaa leettsoon por mbyi baa.

²⁰Per lee re ngwleyy kuu nabee lo re ngwleyy ne re zha gol, mtekiil zha re men kuu nzi tya, tsa naab re zha telaa Pilat Barrabás ne lee Jesús kuth zha.

²¹Tsa lee Pilat mre mnaabdiz, ne nzhab: ―¿Cho lo rop zha ree nlaaz goo telaan? Tsa lee re men mkab ne nzhab: ―Barrabás btelaa.

²²Tsa lee Pilat mre mnaabdiz lo re men, ne nzhab: ―Ne, ¿kwan tsowʼn kon Jesús kuu ni re zha, Crist Kuu Mtaal Diox Nabee? Reta men mkab ne nzhab: ―¡Bkee zha lo kruz!

²³Lee Pilat nzhab: ―Per, ¿kwan kuu went mtsow zha? Lee re men masraa nex mrez, ne nzhab: ―¡Bkee goo zha lo kruz!

²⁴Leettsa mne Pilat yet roo Pilat lo re men, tak masraa nakap nzhak re men, ora mtaal Pilat zha ngwaxii nit, ne mteech Pilat yaa Pilat lo re men, tsa loo Pilat napt Pilat falt, ne nzhab Pilat: ―Kwibt ren chaan mbyi wen ree ditsʼn, goo bene.

²⁵Tsa lee re men mkab ne nzhab: ―¡Dits nee, ne dits raz nee kwib ren chaan mbyi baa!

²⁶Tsa lee Pilat mtelaa Barrabás, ne mnabee Pilat mdinke zha Jesús, ne mndaa Pilat Jesús lo re soldad tsa kee zha Jesús lo kruz.

²⁷Tsa lee re soldad chaan Pilat ndano Jesús leen thib yuu naro lee liz Pilat, ne mkaltaa re soldad Pilat dita lo Jesús.

²⁸Ne mloo zha xabits Jesús ne mtegok zha Jesús thib lar kuu nanexa na.

²⁹Ne mtob zha thib koron kuu natexkwaa kon yits yek Jesús, ne mloo zha thib aga yaa ban Jesús. Ne mtobxub re zha lo Jesús ne mzhizno zha Jesús, ne mbez zha: ―¡Wii goo lo rey chaan re zha Israel!

³⁰Noga mtsuk re zha lo Jesús, ne leeka aga kuu nzo yaa Jesús mkee zha yek Jesús.

³¹Ne leettsa ngwalo mzhizno zha Jesús, tsa mloo zha lar kuu naneʼa yen Jesús, ne mtegok zha Jesús xabka Jesús. Tsa ndano zha Jesús ta kee zha Jesús lo kruz. Mkee zha Jesús lo kruz (Mr. 15:21‑32; Lc. 23:26‑43; <a href='B:500 19:1'>Jn.19 :<a href='B:500 17:1'>17‑27)

³²Ne leettsa mroo re soldad tya, ndano zha Jesús ta kee zha Jesús lo kruz, tsa mzaal zha thib mbyi zha yez Cirene kuu le Simún. Tsa mnabee re soldad lo zha gwe zha kruz Jesús.

³³Ne leettsa mzin zha thib ta le Gólgota. (Diiz ree nak: “Tsidth yek zha”.)

³⁴Ne mndaa zha xit ub kuu nabexnit kon zhewla gu Jesús; ne ngwalo mtsow Jesús prebe, ngwiit Jesús nita.

³⁵Mkee zha Jesús lo kruz, tsa lee re soldad mloo swert tsa naa cho tsow gan xab Jesús.

³⁶Ne tya mndob re soldad tsa kenap soldad Jesús.

³⁷Ne yek kruz Jesús mkee zha thib letr kuu nzhab naa chebee mkee zha Jesús lo kruz. Lee Letr nzhab: “ZHA REE NAK JESÚS KUU NAK REY CHAAN RE ZHA ISRAEL”.

³⁸Noga chop wann mke lo kruz kon Jesús, thib zha mke lad ban Jesús, lee tedib zha mke lad beg lo Jesús.

³⁹Ne reta zha kuu ndriid lo Jesús, ndota kuu mbez zha lo Jesús, ne nkwin zha yek zha lo Jesús.

⁴⁰Ne nzhizno zha Jesús ne mbez zha lo Jesús: ―Lu mbez luuzha gwodoo, ne tsonka wiz taaʼa tedibe. ¡Os leeʼa wli Xgann Diox naka, leeka lu blaʼa lo kruz!

⁴¹Ne tataka ndota kuu mbez re ngwleyy, kuu nabee lo re ngwleyy lo Jesús ne re maestr kuu nloo xkiiz Diox lo re men ne re zha gol kuu nabee lo re zha Israel,

⁴²mbez re zha: ―Mlaat zha gagath tedib net zha, ¿ne chebee gagt la zha leeka lee zha zha lo kruz? Ne os lee zha nak zha, Zha Kuu Mtaal Diox Nabee lo re zha Israel, ndoblo leeka lee zha la zha zha lo kruz, tsa yelaazaa zha.

⁴³Ne tak kwathoz nyelaaz zha Diox, nez Diox telaa zha nal, os wli nke leettsoo Diox zha; tak leeka zha ne Xgann Diox nak zha.

⁴⁴Noga rop wann kuu nke lo kruz cho Jesús, ndota kuu mbez lo Jesús. Xomod nguth Jesús (Mr. 15:33‑41; Lc. 23:44‑49; <a href='B:500 19:1'>Jn.19 :28‑30)

⁴⁵Ndrolta wiz dita yezlyu mla yaal, koree mxek asta las tres.

⁴⁶Ne oraaka lee Jesús dib gan mrez ne nzhab: ―Elí Elí ¿lama sabactani? (Diiz ree nak: “Diox da, Diox da, ¿chebee mlaaʼa na?”) [Sal. 22:1]

⁴⁷Ne lee chop tson zha kuu nzi tya, mbin kuu nzhab Jesús, tsa nzhab zha: ―Lee zha ngebez profet Lí zha ndala.

⁴⁸Oraaka lee thib zha mrozhonn ngwaxii thib le zhiil, ne mtenit zhay leen xit ub kuu myal kuu nala ne ni, ne mtob zhay yek thib mnix, ne mtob zhay roo Jesús, tsa gu Jesús kona.

⁴⁹Per lee techop tson zha nzhab: ―Laa goo, tsa neʼaa naa chu tyaad Lí telaa zha.

⁵⁰Ne lee Jesús dib gan mrez tedib welt ne nguth.

⁵¹Ne lee lar kuu ntow, Ta Kwathoz Nayon leen gwodoo, mrat asta yeke ne asta xanne. Ne lee yezlyu mwin zho, ne lee re ke nabii ngok rol.

⁵²Ne lee re roo baa mzhaal; ne kwaro re zha nguth kuu nali ngok lo Diox mre mban.

⁵³Tsa mroo re zha leen baa, leettsa ngulo mroban Jesús, mndaab re zha leen yez Jerusalén, ne tya kwathoz men mwii lo re zha.

⁵⁴Tsa lee soldad kuu nabee lo thib gayoo soldad ne re soldad kuu nkenap Jesús, mne zha mwin zho thoz ne mne zha reta kuu ngok, tsa kwathoz mzeb re zha ne nzhab zha: ―Wlipaa, lee mbyi ree nak Xgann Diox.

⁵⁵Kwaro ngot nzi tith ndiy ngwii, re ngota mndeke dits Jesús desde yezlyu Galilea ne mtsow re ngota ayud Jesús.

⁵⁶Ne xid re ngota nzo Mari Magdalen, ne Mari xnaa Santiag ne xnaa Che, ne noga xnaa ropta xgann Zebedeo. Mkaats zha Jesús (Mr. 15:42‑47; Lc. 23:50‑56; <a href='B:500 19:1'>Jn.19 :38‑42)

⁵⁷Leettsa ndekowa yezlyu, tsa mzin thib mbyi rik kuu le Che, zhaʼa nak zha yez Arimatea ne no zha mndeke dits Jesús.

⁵⁸Tsa ngwa zha lo Pilat ne mnaab zha kwerp Jesús. Tsa mnabee Pilat taa zha kwerp Jesús lo zha.

⁵⁹Tsa mkayaa zha kwerp Jesús, ne mchiix zha kwerp Jesús kon thib le lar nambi.

⁶⁰Ne mloo zha kwerp Jesús leen thib baa zha, kuu kub kuu mdaan zha leen ke. Ne mtow zha roo baa kon thib ke naro ne ndya zha.

⁶¹Ne tya ndo Mari Magdalen ne tedib Mari, rop ngot ndob gax roo baa. Re zha kuu mkenap roo baa Jesús

⁶²Ne leettsa ngwalo mriid wiz kuu ndexkwaa zha kuu nzhow zha wiz sabd, tsa lee re ngwleyy kuu nabee lo re ngwleyy ne re fariseo ngwa lo Pilat,

⁶³ne nzhab zha: ―Zha nabee, mtelaaz nee lee mbyi kuu kwathoz mkediʼa, leettsa bee naban zha ne zha lo nee: “Bluz leettsa tsaal tson wiz lee na roban”.

⁶⁴Kona bnabee tsa wen kenap zha roo baa, asta tsaal tson wiz. Tak cha ya re zha kuu mteed lo zha yalowann kwerp zha yaal, ne gab re zha lo re men: “Lee zha mrobana”. Tsa lee yalkedi ree gak kuu masraa went nake kuu mtsow zha ner.

⁶⁵Tsa lee Pilat nzhab: ―Baa nzi re soldad, gwa goo ne bkenap goo roo baa taxal nlaaz goo.

⁶⁶Tsa ngwa re zha ne mkenap zha roo baa, ne key mtow zha roo baa, ne mtob zha sey cho ke kuu now roo baa, ne mtaan zha re soldad kenap roo baa.