Read Ozolotepec Zapotec Mateo 28 Bible Online

Mateo 28 - Ozolotepec Zapotec bible

Mateo 28

¹Ngulo mriid wiz sabd, ne ndeyeni yezlyu wiz domin, lee Mari Magdalen ne lee tedib Mari ngwatwii roo baa ta mloo zha Jesús.

²Ne oraaka lee thib zho thoz mwin lo yezlyu. Lee thib mandad chaan Diox mroo yibaa mla lo yu, mbig roo baa ne mkib ke kuu now roo baa ne mndob mandad dits ke.

³Ne taxal bel bti na mandad, ne lee xab mandad naguz na taxal na yig.

⁴Or mwii re soldad kona, kwathoz mzeb re zha ne mzhiit zha, ne thitanax mkow zha, taxal zha nguth.

⁵Tsa lee mandad nzhab lo rop ngot: ―Tsebt goo. Na ne lee goo nkwaan Jesús, zha kuu mkee zha lo kruz.

⁶Yenta zha nzhee, mrobana zha, taxal ne zha lo re goo. De goo tsa wii goo ta mloo zha zha.

⁷Lijer tyee goo ne guz gooy lo re zha kuu mteed lo zha, lee zha mrobana. Ne ner Jesús ya yezlyu Galilea lo re goo. Tya wii goo Jesús. Koree nak kuu nin lo goo.

⁸Ne lee rop ngota oraaka ndya, tak kwathoz mzeb rop zha ne kwathoz laz zha. Ne lijer ndya zha nzhab zhay lo re zha kuu mteed lo Jesús.

⁹Ne leeka ora lee Jesús cha mzin lo rop ngot, ne mni “diox” lo rop ngot. Tsa lee rop ngot mbig lo Jesús, ne mdeez zha nii Jesús, ne mtobxub zha lo Jesús ne mbil zha lo Jesús.

¹⁰Tsa nzhab Jesús lo rop zha: ―Tsebt goo. Gwa goo gwane goo lo re wetsʼn tsa ya zha Galilea, ne tya wii zha na. Yalkedi kuu nzhab re soldad

¹¹Leettsa lee rop ngot ndya, tsa lee chop tson re soldad ngwa lo re ngwleyy kuu nabee lo re ngwleyy ngwane reta kuu ngok.

¹²Tsa lee re ngwleyy kuu nabee lo re ngwleyy mrez re zha gol kuu nabee lo re zha Israel, par yaan re zha diiz. Ne myaan re zha mndaa zha naroob temi lo re soldad,

¹³ne nzhab re zha lo re soldad: ―Lee re goo ndoblo gab: “Yaal, leettsa lee nee mzhen mkaal, lee re zha kuu mteed lo Jesús myaad mlowann kwerp Jesús”.

¹⁴Ne os lee Pilat gon xomod nak koree, lee re nee kab lo Pilat por goo, tsa tetit Pilat goo.

¹⁵Tsa lee re soldad mkayaa temi, ne mtsow re soldad taxal nzhab re zhaʼa lo re soldad. Kuu nzhab re soldad konaka nak kuu ni re zha Israel asta wiz naltseree. Tsiin kuu mtaan Jesús tsow re zha kuu mteed lo Jesús (Mr. 16:14‑18; Lc. 24:36‑49; <a href='B:500 20:1'>Jn.20 :<a href='B:500 19:1'>19‑23)

¹⁶Tsa lee re tsiibthib zha kuu mteed lo Jesús, ndya yezlyu Galilea, yek yii ta nzhaba Jesús lo re zha.

¹⁷Ne leettsa mwii re zha Jesús mbil zha lo Jesús, tegal nzo chop tson zha nyelaazte.

¹⁸Tsa lee Jesús mbig lo re zha ne nzhab: ―Lee Diox mndaa reta yalnabee lon leen yibaa ne lo yezlyu.

¹⁹Gwa goo lo reta men dib naxta lo yezlyu, ne btsow goo gak zha, zha kuu teed lon, ne btsowleyy goo zha, kon yalnabee chaan Xutʼn, kon yalnabee chaan da, ne kon yalnabee chaan Mbi Nayon chaan Diox.

²⁰Ne bloo goo lo re zha gon zha diiz reta kuu mnabeen lo re goo. Ne btelaaz goo le na ndo kon reta goo reta wiz, asta leettsa lux yezlyu.