Read Ozolotepec Zapotec Mateo 4 Bible Online

Mateo 4 - Ozolotepec Zapotec bible

Mateo 4

¹Tsa lee Mbi Nayon ndano Jesús thib ta yubiz, ne leettsa mndo Jesús tya, lee Maxuuy ngwalaaz gatsow Jesús kuu went.

²Ne chop gal wiz ne chop gal yaal mndo Jesús tya, ne yent kwaan ndow Jesús, tsaraa mlann Jesús.

³Tsa lee Maxuuy mbig lo Jesús, tsa naa chu tetsow Jesús kuu gab Maxuuy, tsa nzhab Maxuuy lo Jesús: ―Os leeʼa wlipaa Xgann Diox naka, bloo leeʼa nak Xgann Diox, guz tsa lee re ke ree reyal pan.

⁴Per lee Jesús mkab, ne nzhab: ―Lo xkeets Diox nzhab: “Nabant men kon beeta pan, sinke lee men naban por re diiz kuu ndroo roo Diox”. [Dt. 8:3]

⁵Tsa mndeno Maxuuy Jesús yez Jerusalén, yez nayon, ne mndeno Maxuuy Jesús yek gwodoo ta mas ya ndab,

⁶ne nzhab Maxuuy lo Jesús: ―Os leeʼa wlipaa Xgann Diox naka, bloo leeʼa nak Xgann Diox, brethin par yath, yent kwan taka, tak lee lo libr chaan Salm nzhab: “Lee Diox taal mandad chaan Diox, tsa ten mandad lu kon yaa mandad, tsa gabta lo ke”. [Sal. 91:11-12]

⁷Tsa lee Jesús nzhab: ―Noga nzhab lo xkeets Diox: “Kithnota Diox kuu nak Zha Nabee loʼa”. [Dt. 6:16]

⁸Ne bluz mndeno Maxuuy Jesús yek thib yii kuu kwathoz naro, tsa mloo Maxuuy reta yez kuu nzi lo yezlyu lo Jesús, re yalnabee chaan re yeza, naa xomod chul na re yeza.

⁹Tsa nzhab Maxuuy lo Jesús: ―Reta koree tan loʼa, os leeʼa tobxuba lon ne gola lon.

¹⁰Tsa nzhab Jesús lo Maxuuy: ―Beche lon goltʼn loʼa, tak lo xkeets Diox nzhab: “Bil lo Diox kuu nak Zha Nabee loʼa, ne beeta lo Diox ndoblo gona diz”. [Dt. 6:13]

¹¹Tsaraa mlaa Maxuuy Jesús, tsa lee chop tson mandad chaan Diox mlortsin lo Jesús. Jesús mndelo rtsin Jesús yezlyu Galilea (Mr. 1:14‑15; Lc. 4:14‑15)

¹²Leettsa mbin Jesús lee Juan nzo tsib, tsa ngwa Jesús yezlyu Galilea, ne leettsa ndo Jesús yezlyu Galilea, tsa ngwa Jesús yez Nazaret.

¹³Per myaant Jesús yez Nazaret, sinke lee Jesús ndya ngoo yez Capernaúm, yez kuu nzi gax roo nitdoo, yezlyu kuu ngok chaan Zabulón rop Neftalí, tsa loo Jesús lo re men tya.

¹⁴Koree ngok tsa mrolo kuu mkee profet Isaí, or kuu nzhab profet:

¹⁵Yezlyu chaan Zabulón rop Neftalí,kuu nzi roo nitdoo tedib lad roo yoo Jordán,yezlyu Galilea ta nzo re zha kuu nagt zha Israel.

¹⁶Lee re zha yeza mndaa falt, kona nabil nzo leettsoo zha,nak zha taxal thib yez kuu nzi lo yalkow,ne mndelo re zha yeza myen xkiiz Diox, kona nak taxal mwii zha thib xni thoz,ne lee re zha kuu nzi thib ta nathoz ta nzo ryez gath zha,mndelo zha myen zha xkiiz Diox, ne nake taxal mla thib xni lo re zha. [Is. 9:1-2]

¹⁷Desde tsya mndelo Jesús mndaa kwent xkiiz Diox, ne nzhab Jesús: ―Btsee goo mod went kuu nak goo, tak lee wiz kuu lee Diox nabee lo goo mzin gaxa. Jesús mrez thap zha kuu niit mbel (Mr. 1:16‑20; Lc. 5:1‑11)

¹⁸Ne leettsa ndiy Jesús roo nitdoo chaan Galilea, tsa mwii Jesús Simún kuu noga le Pey ne wets Pey kuu le Ndres, rop zha ree ngeniit mbel leen nitdoo, tak zha niit mbel nak zha.

¹⁹Tsa nzhab Jesús lo rop zha: ―Bteke goo ditsʼn, tsa tsowʼn gak goo zha kuu niit men par Diox.

²⁰Ne oraaka mlaa zha yex zha ne mndeke zha dits Jesús.

²¹Ne ndaka Jesús, tsa mwii Jesús Santiag ne Juan, rop zha ree nak xgann Zebedeo, lee re xut zha nzo leen thib kano ngeyib zha yex zha, tsa mrez Jesús rop zha.

²²Ne oraaka mlaa rop zha xut zha leen kano ne mndeke zha dits Jesús. Jesús mloo lo kwathoz men (Lc. 6:17‑19)

²³Ne mndiy Jesús dita yezlyu Galilea, ne nloo Jesús lo re men ta nkaltaa re men nteed xkiiz Diox. Ne ndaa Jesús kwent Diiz Chul chaan ta nabee Diox, ne mtegwe Jesús relota yiz ne relota yalne kuu ndak re men.

²⁴Ne dita yezlyu Siria myath re kuu ntsow Jesús; ne lee re mena ndyaadno re zha kuu ne ndak, re zha kuu ndak tedib net re yiz, re zha kuu nzo mbi fyer leettsoo, re zha kuu ndak yizguthye ne re zha mthans, tsa mtegwe Jesús re zha.

²⁵Kwaro re men yezlyu Galilea, re men re tsii yez kuu nak Decápolis, re men Jerusalén, re men yezlyu Judea ne re men kuu nzo tedib lad roo yoo Jordán ndyaad lo Jesús.